AKPA ini emi n̄kokopde n̄kpọ mban̄a Mme Ntiense Jehovah ekedi ke ini n̄kosụk n̄kade n̄wed ke Kutaisi. Mbọhọidụn̄ mi ama ọdọhọ mi ke Mme Ntiense Jehovah isikamake cross ye mme n̄kpọ ntre ituak ibuot inọ Abasi, ke mmọ ẹdọhọ ke idịghe Jesus edi Ata Ọkpọsọn̄ Abasi. Mme n̄kpọ emi ke ami n̄kesikam nnen̄ede mma ke ufọkabasi nnyịn, edi mmọ ẹkedọhọ ke inenke.

Mma mfiak nnyọn̄ Tsageri obio nnyịn ke ini ndaeyo, ke 1992. Mma n̄kokop ke Mme Ntiense Jehovah ke ẹsịn idem ẹkwọrọ ikọ ke obio nnyịn. Eka mi ama okop ediwak nti n̄kpọ aban̄a mmọ. Edi ami n̄kosụk nda mmọ nte mbon abian̄a, ntre enye ama ọdọhọ ete, “Ka ke idemfo kokop se mmọ ẹsikpepde mme owo.”

 Nditọete iba, Pavle ye Paata, ẹma ẹsidi mbọhọ nnyịn ke ubọk ke ubọk ẹdise ubon kiet. Mmọ ẹkedi mme asiakusụn̄. Ekesidi mmọ ẹma ẹdi, ediwak owo ẹyeka do ẹkekop ikọ Abasi ẹnyụn̄ ẹbụp mmọ nsio nsio mbụme. Mma ntọn̄ọ ndisitiene n̄ka. Ini ekededi emi mbụpde mbụme, mmọ ẹma ẹsikụbọde Bible ẹnọ mi n̄kot ibọrọ mbụme mi. Oro ama enen̄ede an̄wam mi, sia mma nda enyịn mi iba n̄kụt se Bible etịn̄de!

Ikebịghike mma ntiene nsịne ke otu mbon emi mmọ ẹkesikpepde Bible. Ke n̄kpọ nte ufan̄ isua kiet, nnyịn owo duop ima ina baptism. Eka mi n̄ko ama editiene edi Ntiense Jehovah.

Esịt esinem mi mma nti nte nditọete oro ẹkesikụbọrede Bible ẹnọ mi ẹte n̄kot ibọrọ mbụme mi ke idemmi. Emi akanam mi n̄kụt ke idemmi se idide akpanikọ ye se idide nsu. Mmesida se mmọ ẹkenamde oro n̄n̄wam mme owo ẹkụt akpanikọ sia mmeti ke oro akan̄wam mi.