Ke Georgia, ete kiet ama asan̄a aka itie emi ẹnịmde ukpatn̄kpọ ẹdọn̄ n̄wed nnyịn ẹkwọrọ ikọ, okofiori ete: “Ndiyakke mbufo ẹkwọrọ ikọ mi! Ufọkabasi Orthodox ẹnyene idụt emi.” Eyenete emi akadade do ama obụp enye sụn̄sụn̄ m̀mê enye okot n̄wed nnyịn ndomokiet akpa. Enye ama ọdọhọ ke imọ ikotke akanam. Eyenete oro ama ọdọhọ ke ọkpọfọn enye okot ese. Nte  ẹkebọrọde enye ikọ ama anam esịt osụhọde enye, enye onyụn̄ ọbọ n̄wed ifan̄ adaha. Ke usen ifan̄ ama ekebe, enye ama afiak edi edidọhọ yak ẹkûyat esịt ke nte imọ iketịn̄de ikọ ye mmọ usen oro, onyụn̄ ọdọhọ ke ima ikot magazine oro ikọbọde inọ eka imọ emi edide nnan, ke mmimọ mbiba ima ima magazine oro, ke idi ndibọ mbufa n̄kokot. Idahaemi enye esidi ke ubọk ke ubọk edibọ mbufa magazine.

Nte nditọete nnyịn iba ẹkesụk ẹkwọrọde ikọ ke Azerbaijan, mmọ ẹma ẹkụt akparawa kiet adade ke iso ufọk, ẹnyụn̄ ẹtọn̄ọ ndikwọrọ ikọ nnọ enye. Akparawa oro ama ọdọhọ ete: “Edi idiọkn̄kpọ ami ndika iso n̄kpan̄ utọn̄ nnọ mbufo, sia editie nte n̄kokop edi nnamke.” Enye ama osio ekpri ikwa ke ekpat ọfọn̄ukot esie onyụn̄ ọdọhọ ete: “Owo akanam mi ibak, nyom ndida ikwa emi n̄kọnọ enye se enye oyomde.”

Idem ama akpa nditọete oro, edi mmọ ẹma ẹdọhọ enye ete: “Afo ndiwot owo akam edi idiọkn̄kpọ.”

Akparawa oro ama ọdọhọ mmọ ete, “Nnam didie idahaoro?” Mmọ ẹma ẹkot Rome 12:​17-21 ẹnyụn̄ ẹdọhọ ke Abasi kpọt odot ndisio usiene, ke inaha ‘iyak idiọk akan nnyịn, edi ke ana ika iso ida nti edinam ikan ndiọi ubọk.’ Mmọ ẹma ẹdọhọ ọkpọfọn enye aka ekeneme mfịna oro sụn̄sụn̄, ke edieke enye ọnọde owo unan m̀mê owotde owo ke esịt ayamia enye ufen. Se mmọ ẹketịn̄de ama enem enye; enye ama onyụn̄ adaha.

Ke n̄kpọ nte hour kiet ama ekebe, akparawa oro ama afiak okụt nditọete oro onyụn̄ ọdọhọ mmọ ete: “Ufọk owo oro n̄koyomde ndikowot ke nto ndi emi. N̄kanamke enye n̄kpọ ndomokiet, ima ibiere mfịna oro. Esịt enem mi nte mbufo  ẹken̄wamde mi man n̄kûdụk mfịna.” Nditọete oro ẹma ẹdọhọ enye ke idịghe mmimọ in̄wam enye, ke Jehovah akan̄wam enye.

Isua ifan̄ emi ebede, sista kiet ke Norway ama ọkpọn̄ esop. Ekem ẹma ẹtọn̄ọ ndidọn̄ n̄wed ke ukpatn̄kpọ nnịm n̄kwọrọ ikọ ke idụt oro. Enye ama esisan̄a ebe utọ itie emi ini enye akade ndidep n̄kpọ.

Kpa ye oro enye mîkesikaha ikeneme nneme ye nditọete oro ẹkesidade do ẹkwọrọ ikọ, enye ama esikụt ndiye ndise emi ẹkesidiande do ye se ẹkesiwetde. Nte nditọete oro ẹkesisịnede ọfọn̄ ediye ediye ye nte mmọ ẹkesinamde n̄kpọ ufan ufan ye mme owo ama anam ọdọn̄ sista oro ndifiak ntọn̄ọ mbono esop nnyụn̄ ntọn̄ọ ndinam n̄kpọ Jehovah.

Enye ama okụt n̄ko enyịn̄ ikpehe Intanet nnyịn, jw.org, onyụn̄ aka do. Ama enem enye nte enye ekekemede ndisọp n̄kụt adres Ufọkmbono Obio Ubọn̄ emi ekekperede ufọk esie ye ini mbono esop. Enye ama osion̄o ndusụk n̄wed nnyịn ke ikpehe Intanet oro onyụn̄ asan̄a ndịk ndịk aka Ufọkmbono Obio Ubọn̄. Ẹma ẹkọm ẹnyụn̄ ẹdara enye etieti, mbiowo ẹnyụn̄ ẹdọhọ eyenete an̄wan kiet ekpep enye Bible. Ikebịghike, enye ama ọtọn̄ọ ndinyene nti ufan ke esop onyụn̄ afiak ọtọn̄ọ ndinam n̄kpọ Jehovah. Idahaemi enye esidụk mbono esop kpukpru ini onyụn̄ esika ukwọrọikọ. Enem enye etieti nte enye afiakde edi ufan Jehovah.

Usen kiet ke Norway, Ronja emi edide isua 15 ama eneme nneme ye nditọ klas mmọ ita aban̄a m̀mê ẹkebobot n̄kpọ  m̀mê n̄kpọ ẹkefoforo. Nditọ oro ẹkedi irenowo. Nte mmọ ẹkefan̄ade n̄kpọ ikenemke enye. Eketie Ronja nte ke enye inen̄ekede idiọn̄ọ se enye ekpetịn̄de an̄wam mmọ, ntre enye ama ọdọhọ eka esie an̄wam imọ man idiọn̄ọ nte idiwụtde mmọ ke Abasi okobot kpukpru n̄kpọ.

Edem usen oro ke esịt bọs, Ronja ama ada se enye ekekpepde afiak eneme n̄kpọ oro ye nditọ oro. Mmọ ẹma ẹsak enye nte enye enịmde ke Jehovah edi Andibot. Owo mmọ kiet ama ofiori ete: “Owo ndomokiet ke bọs emi inịmke ke Jehovah edi Andibot! Yak ise n̄kpọ ise. Anie enịm ke kpukpru n̄kpọ ẹkefoforo, menede ubọk ise? Anie enịm ke Jehovah okobot kpukpru n̄kpọ, menede ubọk ise?” Idem ama akpa Ronja ndikụt nte ekpri eyeneren emi eketiede ekpere enye emenerede ubọk ọdọhọ ete, “Mmenịm ke Jehovah okobot kpukpru n̄kpọ!” Nditọwọn̄ iba efen ẹma ẹtiene ẹmenede ubọk ẹdọhọ ke mmimọ imenịm ke Jehovah okobot  kpukpru n̄kpọ. Ọwọrọ nditọ ufọkn̄wed eken ke ẹkekpan̄ utọn̄ ẹkop nneme Ronja ye nditọ ita oro, ndien se Ronja eketịn̄de ama anam mmọ ẹkụt ke Jehovah okobot kpukpru n̄kpọ!

Uwemeyo usen kiet, mbon Syria iba emi ẹsemde Arabic ẹma ẹdi ọfis nnyịn ke Denmark. Irenowo iba emi ẹma ẹdidọhọ nditọete iban emi ẹsidarade isenowo ẹte ke iyom Mme Ntiense Jehovah. Ke ini nditọete oro ẹkedọhọde mmọ ke nnennen itie ke mmọ ẹdi oro, esịt ama enem mmọ etieti. Mmọ ẹkesan̄a didie ẹdiọn̄ọ usụn̄ ẹdi ọfis oro? Mmọ ẹkemen fon mmọ ẹsio ndise ọyọhọ page iba ke n̄wed Nso ke Bible Enen̄ede Ekpep?, ke usem Arabic ẹnyụn̄ ẹda ndise oro ẹkewụt owo emi esisede aban̄a itie ubon n̄wed ke obio oro. Ndise oro ke owo oro akada ọdiọn̄ọ adres ọfis nnyịn asiak ọnọ mmọ.

Ama enen̄ede ọsọn̄ mmọ mbiba nditịn̄ se mmọ ẹyomde ke usem Danish, ntre ẹma ẹkot eyenete eren emi ọdiọn̄ọde Arabic edi. Ẹma ẹdikụt ke owo kiet ke otu mmọ mbiba ama enen̄ede oyom ndidiọn̄ọ Bible. Eyenete oro ọdiọn̄ọde Arabic do ama ọbọ enye adres onyụn̄ ọdọhọ ke iyasan̄a ye owo en̄wen emi esisemde Arabic idi idise enye ke mîbịghike.

Nneme emi mmọ ẹkenemede ye ete oro ke ufọk esie ama anam mmọ ẹdiọn̄ọ ke Ntiense Jehovah ndomokiet ikwọrọke ikọ inọ enye akpa. Enye ama ọdọhọ mmọ ke ikokụt n̄wed Bible Ekpep ke usem Arabic ke ekebe leta imọ, kpa ye oro imọ mîkewetke enyịn̄ imọ ke ekebe leta oro man ẹdiọn̄ọ ke owo Arab enyene. Sia enye mîkemeke ndikot n̄wed, enye ama ọdọhọ ufan esie kiet okot ọnọ enye, mmọ ẹma ẹnyụn̄ ẹkot n̄wed oro ẹma ke usen ita. Se enye okokopde ama anam enye enịm ke enye okụt akpanikọ.

 Ete emi esịne ke otu mbon emi ẹkefehede ẹkpọn̄ idụt mmọ ke ntak ekọn̄. Imemke ye enye sia Denmark emi enye odụn̄de ọniọn̄ usụn̄ etieti ọkpọn̄ ebiet emi ubon esie ẹdude, edi Bible ke enye esida ọdọn̄ idem esịt. Akpa ini emi nditọete oro ẹkekade ẹkese enye, enye ama obụp mmọ ete: “Ntak emi mbufo mîkedịghe idikwọrọ ikọ inọ mi ofụri oko? Se n̄koyomde edi emi.” Enye ke ekpep Bible ye nditọete oro, ke onyụn̄ ama se enye ekpepde.

Dmitry ekesidi akwaowo ke itie unam sika ke Ukraine. Edi ke ini enye ekedinen̄erede okụt se sika esinamde owo, enye ama ọkpọn̄ utom oro kpa ye oro ẹkesikpede enye ọfọn. Ekem, ke ufan̄ ọfiọn̄ ita kpọt, eka esie ye eka an̄wan esie ẹma ẹkpa. N̄kpa owo iba emi ama abiak enye utọ oro idụhe. Enye ekekere ke ẹyedọn̄ imọ esịt ẹnyụn̄ ẹbọrọ mbụme emi esifịnade imọ ke ufọkabasi, edi utọ n̄kpọ oro iketịbeke. Ufan esie kiet ọkọdọhọ enye ke mmimọ mbon Orthodox “inyụn̄ ikọkọn̄ọ cross ke itọn̄ isan̄a, ke mmimọ idiọn̄ọke Abasi.” Nte eketiede Dmitry ke idem ekedi oro. Dmitry ama edikụt ke imọ idiọn̄ọke n̄kpọ ndomokiet iban̄a Abasi m̀mê Bible. Enyịn ama anan enye, enye onyụn̄ ọtọn̄ọ ndibọn̄ akam ndọhọ Abasi an̄wam imọ. Ini oro ke enye eketi ke imọ ima isikop n̄kpọ iban̄a Mme Ntiense Jehovah. Enye ama okụt ikpehe Intanet nnyịn, ama onyụn̄ enem enye etieti ndikụt nte ẹwetde ata ediwak n̄kpọ ẹban̄a Bible do. Enye ama ada do oyom Ufọkmbono Obio Ubọn̄ emi ekperede enye. Ini enye esịmde itie unịm moto ke ufọkmbono oro, adaidaha kiet ama ọkọm enye onyụn̄ obụp enye m̀mê inam nso inọ enye. Dmitry ama ọdọhọ enye ete, “Nyom owo ekpep mi Bible.” Enye ekpep Bible ke ọfiọn̄ itiokiet emi ebede, esidụk mbono esop kpukpru ini, onyụn̄ ọbọrọ mbụme.

Paul ye Faith, emi ẹdụn̄de ke Britain, ẹma ẹkwọrọ ikọ ẹnọ mma kiet emi ekerede Susan ẹnyụn̄ ẹdiomi ndifiak ndineme ikọ Abasi ye enye. Ke ini mmọ ẹfiakde ẹka, mmọ ikekwe Susan ke ufọk. Mmọ ẹma ẹnam se ẹketemede ke Utom Obio Ubọn̄ Nnyịn eke November 2014, emi ọdọhọde ke ẹkeme ndiwet etop ke ekpri pepa nnọ enyeneufọk. Mmọ ẹma ẹwet ẹdọhọ ke iyafiak idi edem usen. Ke ini mmọ ẹfiakde ẹka, mmọ ẹma ẹkụt ekpri etop emi Susan akadiande ke enyịnusụn̄ ọnọ mmọ. Enye ọkọdọhọ ke imọ ika ndidep n̄kpọ, sia eyen imọ oyom ndinam ndọ. Paul ye Faith ẹma ẹwet etop efen ẹnọ enye, ẹdọhọ ke mmimọ iyafiak idi urua efen. Isan̄ enye emi, mmọ ẹma ẹkekụt Susan etiede ebet mmọ, mmọ ẹma ẹnyụn̄ ẹda n̄wed Bible Ekpep ẹtọn̄ọ ndikpep enye Bible.

Ke ntak ndọ eyen esie, Susan ama ọdọhọ mmọ ẹkûdi ke usen emi mmọ ẹkeyomde ndifiak ndi. Ke ini mmọ ẹkefiakde  ẹka nte ini akakade, mmọ ikekwe enye, ntre mmọ ẹma ẹwet ekpri n̄kpọ ẹnịm ẹnọ enye ẹnyụn̄ ẹwet nọmba fon mmọ. Ama enem mmọ etieti ini Susan ọnọde mmọ etop ke fon ọdọhọ mmọ ẹkûyat esịt nte mmọ mîkekwe imọ usen oro, ke ikodu ye mbọhọidụn̄ imọ ke in̄wan̄ edemesa ineme nneme. Susan ama ọtọn̄ọ ndisikpep Bible kpukpru ini tọn̄ọ ini oro, inyụn̄ ibịghike enye okodụk akpa mbono esop esie.

Paul ye Faith ẹma ndisiwet ekpri n̄kpọ ndian ke enyịnusụn̄ nnọ enyeneufọk. Mmọ ẹdọhọ ke mme owo ẹsima ndikot ekpri n̄kpọ emi iwetde inịm inọ mmọ, ke emi esifọn tutu!

Ke August 2014, ẹma ẹmen eyenete kiet ke Hungary ẹka ufọkibọk ke ntak ata idiọk udọn̄ọ emi ẹkotde pulmonary embolism. Edi ikebịghike eyenete oro ama akpa. N̄wan esie ama ewet n̄kpọ aban̄a Tünde, nurse oro ekenen̄erede ese aban̄a ebe esie. Enye ekewet ete:

“Mma ndụk akamba mbono ‘Kpebe Jesus’ ye eyen mi ke ndaeyo isua 2015. Nte ikosụk idade ke itie ubon moto ke mbono ama akasuana ke Sunday, n̄wan kiet ama asan̄a edida mi ke iso, ayak ekpat obon ke isọn̄, awan̄a mi ke itọn̄, ọtọn̄ọ eyet. N̄kpọ nte isua kiet ke edem, nurse emi ekese ebe mi enyịn ini enye odude ke itie emi ẹsisede ẹban̄a mbon emi idem ẹnen̄erede ọdiọk ke ufọkibọk. Nurse oro ama ọdọhọ ke ẹkesinọ owo kiet kiet owo udọn̄ọ emi enye edisede enyịn ini ekededi emi enye ọtọn̄ọde utom, ke imọ ima isibọn̄ akam ite ẹnọ imọ ikese ebe mi enyịn. Enye ọdọhọ ke se imọ ikesinamde edi oro kwa ini kwa ini!

“Tünde ọdọhọ ke eti uwem emi ebe mi ekenyenede ke ntak emi enye ekedide Ntiense Jehovah, ye nte enye  ekesiwakde nditịn̄ mban̄a idotenyịn esie akanam imọ itọn̄ọ ndikpep Bible ye Mme Ntiense Jehovah.

“Tünde ke ekpep Bible idahaemi. Enye ọdọhọ ke ọdọn̄ imọ ndikụt ebe mi ini enye edisetde idi, ke iyom ndidọhọ enye ke eti uwem esie ye mbuọtidem esie akanam imọ ididiọn̄ọ Jehovah ye nti n̄kpọ emi enye ọn̄wọn̄ọde ndinam nnọ mme owo.”

Enyene ini emi owo mîkayakke ẹto Greece ẹdụk Bulgaria m̀mê ẹto Bulgaria ẹdụk Greece ke ntak ntịme emi mme owo ẹkesịnde. Udịm moto ke usụn̄ ikedịghe ekpri. Esop kiet ke Bulgaria emi ẹkedude ẹkpere itie oro ẹma ẹda ifet oro ẹkenọ mme owo ke udịm oro n̄wed ikọ Abasi ẹkot. Mmọ ẹma ẹkama n̄wed ke usem 12 ẹka. Kpa ye emi idem ekememde ediwak mme awat ikpọ moto, esịt onyụn̄ ayatde mmọ, mmọ ẹma ẹnyịme ndineme nneme ye nditọete oro. Nditọete ẹma ẹnyene ime ẹkpan̄ utọn̄ ẹnọ mmọ, ẹnyụn̄ ẹdọn̄ mmọ esịt. Owo mmọ kiet ama ọdọhọ ete, “Ndi mbufo ẹdi Mme Ntiense Jehovah?” Ẹma ẹdọhọ enye “Ih,” enye onyụn̄ ọdọhọ ete, “Mmọdọdọhọ, Mme Ntiense Jehovah kpọt ẹkeme ndinam emi.” Owo en̄wen emi otode Austria ama ọdọhọ ete: “Ẹmesụk ẹyom nnyịn ẹdisịm mi! Ẹmenam etieti! Mbọk ẹka iso ndidọn̄ mme owo esịt ẹnyụn̄ ẹnọ mmọ idotenyịn.” Owo efen ama ọdọhọ ete: “N̄kesimaha ndikot n̄wed mbufo. Edi nyesikot idahaemi.” Owo mmọ kiet ama ọtọn̄ọ nditua ini ẹkwọrọde ikọ ẹnọ enye, onyụn̄ ọdọhọ ke imọ ikesidi Ntiense ediwak isua emi ebede. Nditọete oro ẹma ẹdọhọ enye esikot mme n̄wed nnyịn onyụn̄ afiak ọtọn̄ọ ndidụk mbono esop.