UKPEPN̄KPỌ 10
Akpasan̄a Didie Ọfiọk Ido Ukpono Akpanikọ?
1. Ndi ido ukpono akpanikọ kiet kpọt odu?
“Ẹkpeme idem ye mme prọfet nsu.”—MATTHEW 7:15.
Jesus ekekpep mme anditiene enye ete ke ido ukpono akpanikọ kiet kpọt odu. Enye edi usụn̄ emi adade aka uwem. Jesus ọkọdọhọ ke “mme andikụt enye iwakke.” (Matthew 7:14) Mbon oro ẹkponode Abasi nte Bible etemede ke Abasi enyịme. Ata mme andituak ibuot nnọ Abasi ẹkpep n̄kpọ kiet.—Kot John 4:23, 24; 14:6; Ephesus 4:4, 5.
Se vidio emi Ndi Abasi Enyịme Nsio Nsio Usụn̄ Oro Mme Owo Ẹtuakde Ibuot Ẹnọ Enye?
2. Nso ke Jesus eketịn̄ aban̄a mme nsunsu Christian?
“Mmọ ẹtan̄a an̄wan̄wa ẹte mmimọ imọfiọk Abasi, edi mmọ ẹkan̄ enye ke mme utom mmọ.”—TITUS 1:16.
Jesus ama ọdọhọ ke mme prọfet nsu ẹyebiat Ido Ukpono Christ. Edieke adade-da ese, editie nte mmọ ẹtuak ibuot ẹnọ Abasi. Mmọ ẹdọhọ ke mmimọ idi mme Christian. Edi afo emekeme ndifiọk se mmọ ẹnen̄erede ẹdi. Edinam didie ifiọk? Ẹdiọn̄ọ ata mme andituak ibuot nnọ Abasi ke nte mmọ ẹdude uwem ye nte mmọ ẹnamde n̄kpọ.—Kot Matthew 7:13-23.
3. Akpasan̄a didie ọfiọk ata ikọt Abasi?
Kere ban̄a n̄kpọ ition emi:
-
Ata ikọt Abasi ẹkpono ẹnyụn̄ ẹda Bible nte Ikọ Abasi. Mmọ ẹdomo ndida item Bible ndu uwem. Ntre, ido ukpono akpanikọ itiehe nte nsunsu ido ukpono emi ẹsikpepde ekikere owo. (Matthew 15:7-9) Mmọ isidịghe ẹma ẹtịn̄ ikọ kiet, ẹnam n̄kpọ en̄wen.—Kot John 17:17; 2 Timothy 3:16, 17.
-
Ata mme anditiene Jesus ẹkpono enyịn̄ Abasi, Jehovah. Jesus ama okpono enyịn̄ Abasi ke ndinam ẹdiọn̄ọ enyịn̄ oro. Enye ama an̄wam mme owo ẹfiọk Abasi onyụn̄ ekpep mmọ ndibọn̄ akam nte ẹnam enyịn̄ Abasi asana. (Matthew 6:9) Ewe ido ukpono ẹsinen̄ede ẹnam mme owo ẹdiọn̄ọ enyịn̄ Abasi ke edem mbufo?—Kot John 17:26; Rome 10:13, 14.
-
Ata mme Christian ẹkwọrọ etop Obio Ubọn̄ Abasi. Abasi okosio Jesus ọdọn̄ ete edikwọrọ eti mbụk Obio Ubọn̄ imọ. Obio Ubọn̄ Abasi edi n̄kukụre idotenyịn ubonowo. Jesus ama aka iso ọkwọrọ eti mbụk Obio Ubọn̄ emi tutu esịm usen n̄kpa esie. (Luke 4:43; 8:1; 23:42, 43) Enye ọkọdọhọ ke mme mbet imọ ẹyekwọrọ eti mbụk Obio Ubọn̄ oro. Edieke owo ekpedide editịn̄ n̄kpọ aban̄a Obio Ubọn̄ Abasi ọnọ fi, ekpekere ke enye esika ewe ido ukpono?—Kot Matthew 24:14.
-
Mmọ idịghe ubak idiọk ererimbot emi. Mmọ isisịnke idem ke mbre ukara m̀mê ke ekọn̄. (John 17:16; 18:36) Mmọ isitieneke mbon ererimbot emi idu ndiọi uwem.—Kot James 4:4.
-
Mmọ ẹsinen̄ede ẹma kiet eken. Bible ekpep mmọ ndikpono kpukpru owo. Mmọ isitieneke in̄wana ekọn̄ nte mbon ufọkabasi eken ẹsiwakde ndinam. (Micah 4:1-3) Utu ke oro, mmọ ẹsikam ẹda ini ye inyene mmọ ẹn̄wam mme owo ẹnyụn̄ ẹsịn udọn̄ ẹnọ mmọ.—Kot John 13:34, 35; 1 John 4:20.
4. Ndi emekeme ndifiọk ido ukpono akpanikọ?
Ewe ido ukpono ẹda kpukpru se mmọ ẹkpepde ẹto Bible, ẹkpono enyịn̄ Abasi, ẹnyụn̄ ẹkwọrọ Obio Ubọn̄ Abasi nte n̄kukụre idotenyịn ubonowo? Ewe ido ukpono ẹnen̄ede ẹma kiet eken mînyụn̄ itieneke isịn idem ke ekọn̄? Afo ekere didie?—Kot 1 John 3:10-12.
