Ke ini Jesus osụk odude ke ufọk owo Pharisee oro okokotde enye udia, ata ediwak owo ke ẹda ke an̄wa ẹbet enye. Mme owo ẹma ẹsida ntem ẹbet enye ke Galilee. (Mark 1:33; 2:2; 3:9) Ediwak owo mi ke Judea ẹyom ndikụt enye nnyụn̄ n̄kop ikọ esie; mmọ itiehe nte mme Pharisee emi ẹdude ke itie udia oro ye Jesus.

Se Jesus etịn̄de enen̄ede ebehe mme mbet esie: “Ẹkpeme idem ye leaven mme Pharisee, emi edide mbubịk.” Idịghe akpa ini emi Jesus ọnọde mmọ utọ item emi edi emi. Edi se enye okụtde ke itie udia emi owụt ke item emi edi se ẹfiakde ẹnọ. (Luke 12:1; Mark 8:15) Mme Pharisee ẹkeme ndinam nte idi mbon Abasi man mme owo ididiọn̄ọ ke mmọ ẹdi mbubịk, edi ana ẹyarade mmọ. Jesus ọdọhọ ete: “N̄kpọ idụhe eke ẹtịmde ẹdịp oro owo mîdiyarakede, ndịben̄kpọ inyụn̄ idụhe oro owo mîdifiọkke.”—Luke 12:2.

Etie nte ediwak mbon emi ẹdade ẹkop se Jesus ekpepde emi ẹto Judea, mmọ ikodụhe ke ini enye ekekpepde n̄kpọ ke Galilee. Emi anam enye afiak etịn̄ ndusụk akpan n̄kpọ emi enye ama eketetịn̄ ke Galilee. Enye ọdọhọ mbon emi ẹkopde ikọ esie ete: “Ẹkûfehe mmọ emi ẹwotde ikpọkidem ndien mîkemeke ndinam n̄kpọ n̄kan oro.” (Luke 12:4) Nte enye ama eketetịn̄ ke Galilee, enye afiak etịn̄ ntak emi anade mme mbet esie ẹbuọt idem ke Abasi ẹnyụn̄ ẹnịm ke enye eyese aban̄a mmọ. Ana mmọ n̄ko ẹdiọn̄ọ Eyen owo ẹnyụn̄ ẹdiọn̄ọ ke Abasi ekeme ndin̄wam mmọ.—Matthew 10:19, 20, 26-33; 12:31, 32.

Owo kiet ke otuowo etịn̄ se inen̄erede ibehe enye idahaoro: “Andikpep, dọhọ eyeneka mi abahade n̄kpọ-akpa ọnọ mi.” (Luke 12:13) Ibet ọdọhọ ke ana udeme n̄kpọ-akpa emi ẹnọde akpan okpon utịm ikaba, ntem idịghe emi ekedi mfịna. (Deuteronomy 21:17) Edi etie nte ufan emi okoyom ẹnọ imọ n̄kpọ awak akan se ẹkpenọde. Edi Jesus imaha ndisịn idem ke mbubehe mmọ. Enye obụp owo oro ete: “Da owo, anie ekemek mi nte ebiereikpe m̀mê edeme-udeme ke ufọt mbufo?”—Luke 12:14.

Ekem Jesus ọnọ kpukpru owo item emi: “Ẹtịn̄ enyịn ẹkpeme idem ke kpukpru orụk edisịn esịt ke n̄kpọ owo, koro idem ke ini owo enyenede n̄kpọ barasuene, uwem esie itoho ke mme n̄kpọ emi enye enyenede.” (Luke 12:15) Ọkpọkọm owo enyene se enyenyene, ndi enye idikpaha usen kiet ikpọn̄ kpukpru inyene oro? Jesus ada mbụk emi owo mîdifreke ọsọn̄ọ se enye etịn̄de emi; mbụk oro onyụn̄ owụt ke ọfọn owo enyene eti enyịn̄ ye Abasi:

“In̄wan̄ owo inyene kiet ama ọfọn n̄kpọ etieti. Mmọdo enye ekere ke esịt esie, ete, ‘Ndinam nso, ke emi mmenyeneke ebiet eke mbonde mbun̄wụm in̄wan̄ mi?’ Ntre enye ọdọhọ ete, ‘Nyanam emi: Nyowụri mme ufọk ubonn̄kpọ mi nnyụn̄ mbọp se ikponde ikan, ndien do ke nditan̄ kpukpru mbun̄wụm mi ye ofụri nti n̄kpọ mi mbon; ndien nyọdọhọ ukpọn̄ mi nte: “Ukpọn̄, afo emenyene ediwak nti n̄kpọ emi obonde ọnọ ediwak isua; duọk odudu, dia, n̄wọn̄, kop inemesịt.”’ Edi Abasi ọdọhọ enye ete, ‘Afo anana-ibuot owo, ẹyekpak ukpọn̄ fo ke ubọk fo ke okoneyo emi. Anie, ndien, edinyene mme n̄kpọ eke afo ọkọkọde obon?’ Ntem ke etie ye owo eke ọkọde n̄kpọuto obon ọnọ idemesie edi mînyeneke inyene ke n̄kan̄ Abasi.”—Luke 12:16-21.

Ekeme ndidọn̄ mme mbet Jesus ye mbon eken emi ẹkopde se Jesus ekpepde ndikọ akpakịp inyene mbon. Mîdịghe, se ẹdidiade, se ẹdisịnede, m̀mê itie udakibuot ekeme nditre mmọ ndinam n̄kpọ Jehovah. Ntem Jesus afiak ọnọ item oro enye ọkọnọde n̄kpọ nte isua kiet ye ubak ke edem ke Ukwọrọikọ Oro ke Obot:

“Ẹtre nditịmede esịt mban̄a uwem mbufo ẹte  ididia nso m̀mê ẹban̄a ikpọkidem mbufo ẹte idisịne nso. . . . Ẹtịm ẹse mme raven ẹte mmọ isuanke n̄kpasịp inyụn̄ idọkke-dọk, mmọ inyụn̄ inyeneke ebiet ubon mbun̄wụm in̄wan̄ ye ufọk ubonn̄kpọ, edi Abasi ke ọbọk mmọ. Nte mbufo isọn̄ke urua ikan mme inuen? . . . Ẹtịm ẹse ekpon̄idịm nte ẹkọride; mmọ ikpaha utom inyụn̄ ifiakke ndidi; edi ndọhọ mbufo nte, Kpa Solomon ke ofụri ubọn̄ esie ikesịneke n̄kpọ nte kiet ke otu mmọ emi. . . . Ntem ẹtre ndiyom se mbufo ẹdidiade ye se mbufo ẹdin̄wọn̄de, ẹnyụn̄ ẹtre nditịmede esịt . . . Ete mbufo ọfiọk ke mbufo ẹmeyom mme n̄kpọ emi. . . . Ẹka iso ẹyom obio ubọn̄ esie, ndien ẹyedian mme n̄kpọ emi ẹnọ mbufo.”—Luke 12:22-31; Matthew 6:25-33.

Anie ediyom Obio Ubọn̄ Abasi? Jesus owụt ke ata ekpri ibat mbon emi ẹdinamde akpanikọ, “ekpri otuerọn̄,” ẹdiyom Obio Ubọn̄. Ẹyetịn̄ nte ini akade ke mmọ ẹdi owo 144,000 kpọt. Nso ke ẹdinam inọ mmọ? Jesus ọdọhọ mmọ ete: “Ete mbufo emenyịme ndida obio ubọn̄ oro nnọ mbufo.” Mmọ idisịnke idem iyom inyene isọn̄ emi, sia inọ ekeme ndiyịp. Utu ke oro, mmọ ẹdisịn esịt iyom “n̄kpọuto eke mîdikpụhu ke heaven,” kpa ebiet emi mmọ ẹditienede Christ ikara.—Luke 12:32-34.