Ibuot 35

Nnyịn Imekeme Ndiset Ke N̄kpa!

EDIEKE nnyịn ikpade, ndi Abasi oyoyom ndinam nnyịn iset, oro edi, ndinam nnyịn ifiak ididu uwem?— Edinen owo oro Job ama enịm ke akpanikọ ete ke Abasi oyom ndinam emi. Ntre ke ini Job ekekerede ke imọ imọn̄ ikpa, enye ama ọdọhọ Abasi ete: ‘Afo oyokot, ndien ami nyeyere fi.’ Job ọkọdọhọ ke ọyọdọn̄ Jehovah Abasi, m̀mê ke enye eyenen̄ede oyom, ndinam imọ iset.—Job 14:14, 15.

Jesus akam ebiet Jehovah Abasi, kpa Ete esie. Jesus enyịme ndin̄wam nnyịn. Ke ini owo emi ọdọn̄ọde akpauben̄ ọkọdọhọde enye ete, ‘ke Afo enyịmede, emekeme ndinam mi nsana,’ Jesus ama ọbọrọ ete: “Mmenyịme.” Ndien enye ama anam akpamfia okụre owo oro.—Mark 1:40-42.

Jesus ekekpep ndiwụt ima nnọ nditọwọn̄ oto Ete esie. Ikaba ke anyanini ko, Jehovah ama ada mme asan̄autom esie anam n̄kpri nditọ ẹset ke n̄kpa. Elijah ama ekpe Jehovah ubọk ete anam eyeneren n̄wan  kiet emi ọkọfọnde ido ye imọ eset ke n̄kpa. Ndien Jehovah ama anam emi. Jehovah n̄ko ama ada asan̄autom esie Elisha anam ekpri eyeneren kiet eset ke n̄kpa.—1 Ndidem 17:17-24; 2 Ndidem 4:32-37.

Nte idịghe n̄kpọ inemesịt ndifiọk nte ke Jehovah ama nnyịn etieti?— Enye ikereke iban̄a nnyịn n̄kukụre ke ini nnyịn idude uwem. Enye n̄ko eti nnyịn edieke nnyịn ikpade. Jesus ọkọdọhọ ke Ete akam abat mme akpan̄kpa emi Enye amade nte mme odu-uwem okposụkedi mmọ ẹma ẹkekpan̄a! (Luke 20:38) Bible ọdọhọ ke ‘n̄kpa ye uwem, ye n̄kpọ eke ẹdude ke emi, ye n̄kpọ eke edidide idikemeke ndidian̄ade nnyịn ke ima Abasi.’—Rome 8:38, 39.

Ke ini Jesus okodude ke isọn̄, enye ama owụt ke Jehovah ekere aban̄a n̄kpri nditọ. Afo eyeti nte ke Jesus ama ada ini etịn̄ ikọ ye nditọwọn̄ aban̄a Abasi. Edi nte afo ama ọfiọk ete ke Abasi ama ọnọ Jesus odudu ndinam nditọwọn̄ ẹfiak ẹdidu uwem?— Yak itịn̄ iban̄a ini emi Jesus akanamde eyenan̄wan isua 12 emi ete esie ekekerede Jairus eset ke n̄kpa.

Jairus ye n̄wan esie ye n̄kukụre eyen mmọ ẹdụn̄ ẹkpere Inyan̄ Galilee. Usen kiet ekpri n̄kaiferi oro ọdọn̄ọ etieti, ndien Jairus ọfiọk nte ke enye ọmọn̄ akpa. Enye eti Jesus, kpa utịbe utịbe owo oro Jairus okokopde aban̄a emi ekemede ndikọk mme owo udọn̄ọ. Ntre Jairus aka ndiyom enye. Enye okụt Jesus nte etiede ke mben Inyan̄ Galilee ekpep ediwak owo n̄kpọ.

Jairus afaha ebe ke otuowo oro onyụn̄ ọduọ Jesus ke ukot. Enye ọdọhọ Jesus ete: ‘Ekpri eyen mi an̄wan ọdọn̄ọ etieti. Mbọk nte afo eyedi edin̄wam enye? Mbọk di.’ Jesus etiene Jairus iwiwa. Otuowo oro ẹkedide ndikụt Akwa Andikpep n̄ko ẹtiene ẹka. Edi ke mmọ ẹsan̄ade ẹka anyan, ndusụk owo ẹto ufọk Jairus ẹdi ẹdidọhọ enye ẹte: “Eyen-an̄wan fo ama akpa: nsinam afo osụk afịnade Andikpep?”

 Jesus okop mme owo ẹtịn̄de emi. Enye ọfiọk nte Jairus ofụhọde ke nditaba n̄kukụre eyen esie. Ntre Jesus ọdọhọ enye ete: ‘Kûkop ndịk. Kam nyene mbuọtidem ke Abasi, ndien eyen fo oyokop nsọn̄idem.’ Mmọ ẹka iso ẹsan̄a tutu mmọ ẹdisịm ufọk Jairus. Mi mme ufan ubon emi ke ẹtuan̄a. Mmọ ẹfụhọ koro ekpri ufan mmọ amakpa. Edi Jesus ọdọhọ mmọ ete: ‘Ẹkûtua eyet. Ekpri eyen oro ikpaha-kpa, edi edede.’

Ke ini Jesus etịn̄de emi, mme owo ẹtọn̄ọ ndisak, koro mmọ ẹfiọk ẹte ke n̄kaiferi oro ama akpa. Ndien afo ekere ke nso idi ntak emi Jesus ọdọhọde ke enye edede?— Afo ekere ke nso ukpepn̄kpọ ke enye oyom ndikpep mme owo?— Enye oyom mmọ ẹfiọk nte ke n̄kpa ekeme nditie nte ọkpọsọn̄ idap. Enye oyom ndikpep mmọ nte ke imọ imekeme ndida odudu Abasi nnam akpan̄kpa afiak odu uwem ukem nte nnyịn ikemede ndidemede owo ke idap.

Jesus anam kpukpru owo ẹwọrọ ẹkpọn̄ ufọk oro ke mîbọhọke mme apostle esie Peter, James, ye John ye ete ye eka eyenan̄wan oro. Ekem enye ebe odụk ubet emi ekpri eyen emi odude. Jesus omụm eyenan̄wan oro ubọk onyụn̄ ọdọhọ ete: ‘Eyenan̄wan, daha ke enyọn̄!’ Ndien enye adaha ada iwiwa onyụn̄ ọtọn̄ọ ndisan̄a! Ete ye  eka esie ẹnen̄ede ẹdat esịt.—Mark 5:21-24, 35-43; Luke 8:40-42, 49-56.

Idahaemi kere ban̄a emi. Sia Jesus ekekemede ndinam ekpri n̄kaiferi oro afiak edidu uwem, ndi enye ekeme ndinam ukem oro nnọ mbon efen?— Nte afo emekere ke enye eyenen̄ede anam emi?— Ih, enye ayanam. Jesus ke idemesie ama ọdọhọ ete: “Ini ke edi eke kpukpru mme andidu ke udi edikopde [Mi] uyo ẹwọn̄ọ ẹdi.”—John 5:28, 29.

Nte afo emekere ke Jesus enyịme ndinam mme owo ẹset ke n̄kpa?— Uwụtn̄kpọ efen ke Bible an̄wam ndibọrọ mbụme oro. Se itịbede usen kiet ke obio ekperede Nain owụt nte etiede Jesus ke idem ndikụt mme owo ẹfụhọde ke itie ubụkowo.

N̄wan kiet etiene otuowo ọwọrọ ke Nain aka ndibụk eyen esie. Ebe esie ama ebem iso akpa, ndien idahaemi ikpọn̄-ikpọn̄ eyen esie akpa. Enye okop mfụhọ didie ntem! Ediwak mbon Nain ẹtiene ẹsan̄a ke ini ẹmende okpo eyen esie ẹwọrọ ke obio. N̄wan oro ke atua eyet, ndien mme owo ikemeke ndinam n̄kpọ ndomokiet man ẹdọn̄ enye esịt.

Ke usen emi, Jesus ye mme mbet esie ẹnam isan̄ ẹka obio Nain. Ke ẹkperede inuaotop obio oro, mmọ ẹsobo ye otuowo emi ẹkade ndibụk eyeneren n̄wan emi. Ke ini Jesus okụtde nte n̄wan emi atuade, mbọm n̄wan emi anam enye. Ọkpọsọn̄ mfụhọ n̄wan oro otụk enye. Enye oyom ndin̄wam n̄wan oro.

Jesus etịn̄ ikọ ke uyo oro owụtde edikere mban̄a, edi oro enyenede iwụk ete: “Kûtua.” Edu ye edinam esie ẹnam kpukpru owo ẹwụk enyịn ẹse enye. Nte Jesus asan̄ade ekpere okpo oro, kpukpru owo ke ẹkere se enye oyomde ndinam. Jesus ofiori ete: “Akparawa, ndọhọ fi nte, Daha ke enyọn̄.” Enye adaha iwiwa etie! Ndien enye ọtọn̄ọ nditịn̄ ikọ.—Luke 7:11-17.

 Kere nte eketiede n̄wan oro ke idem! Ekpetie fi didie ke idem ndifiak n̄kụt owo ima emi akakpade?— Nte emi iwụtke nte ke Jesus enen̄ede ama mme owo onyụn̄ enyịme ndin̄wam mmọ?— Kam kere nte edinemde ndidara mme owo oro ẹfiakde ẹdidu uwem ke obufa ererimbot Abasi!—2 Peter 3:13; Ediyarade 21:3, 4.

Ke ini oro, ndusụk owo oro ẹdinamde ẹset ẹdidi mbon oro nnyịn ima ikọfọfiọk, esịnede nditọwọn̄. Nnyịn iyọfiọk owo emi mmọ ẹdide kpa nte Jairus ọkọfiọkde eyenan̄wan esie ke ini Jesus akanamde enye eset. Mbon eken ẹdidi mme owo oro ẹkekpan̄ade ediwak isua ikie m̀mê ediwak tọsịn isua emi ẹkebede. Edi Abasi idifreke mmọ okposụkedi mmọ ẹkedude uwem anyanini ko.

Nte idịghe n̄kpọ inemesịt ndifiọk nte ke Jehovah Abasi ye Eyen esie, Jesus, ẹma nnyịn ntre?— Mmọ ẹyom nnyịn idu uwem, ikam idịghe ke isua ifan̄ kpọt, edi ke nsinsi!

Kaban̄a utịbe utịbe idotenyịn Bible aban̄ade mme akpan̄kpa, mbọk kot Isaiah 25:8; Utom 24:15; ye 1 Corinth 15:20-22.

[Mme ndise ke page 182]

Didie ke Jehovah okowụt nte ke imọ imama n̄kpri nditọ?

[Ndise ke page 184]

Nso ke nnyịn ikpep ito Jesus ndinam eyen Jairus an̄wan eset?

[Ndise ke page 186]

Nso ke ediset ke n̄kpa n̄kukụre eyeneren n̄wan emi owụt?