Ntiense Jehovah kiet ọkọdọhọ ete: “Isua 19 edi emi n̄ketie mbet n̄kpọ emi!” Nso ke enye eketie ebet? Eketie ebet ẹsio N̄wed Abasi Usem Greek​—Edikabade Eke Obufa Ererimbot ke usem Bengali emi edide usem emana esie. Nte esinyụn̄ etiede ediwak owo ke idem edi oro ẹma ẹsio Edikabade Eke Obufa Ererimbot ke usem mmọ. Edi ndi akanam emekere utom emi esịnede ke ndikabade nnyụn̄ mmịn̄ Bible emi?

 Akpa, Kọmiti Uwetn̄wed Otu Emi Ẹsede Ẹban̄a Utom Nnyịn ẹsidọhọ ẹmek mbon emi ẹdikabarede Bible. Isua ifan̄ ke ẹsida ẹkabade? Nicholas Ahladis, emi anamde utom ke Itieutom Emi Ẹsede Ẹban̄a Ukabade N̄wed ke Warwick ke New York, ọdọhọ ete: “Enyene mme n̄kpọ emi anade ẹkere ẹban̄a, utọ nte m̀mê owo ifan̄ idu ndikabade Bible oro, m̀mê usem oro ẹdikabarede enye ẹsịn enen̄ede ọsọn̄, m̀mê mbon oro ẹsemde usem oro ẹnen̄ede ẹdiọn̄ọ nte ẹkesinamde n̄kpọ ini ẹkewetde Bible, n̄ko m̀mê nte ẹsemde usem oro ke ebiet kiet okpụhọde ye nte ẹsemde enye ke ebiet en̄wen. Esida mme akabade-n̄wed isua kiet esịm isua ita ndikabade N̄wed Abasi Usem Greek mma, onyụn̄ ada isua inan̄ m̀mê akande oro ndikabade ofụri Bible n̄kụre. Esida ini akan oro ndisio Bible ke usem idiọn̄ọ.”

 Mbon en̄wen ẹsitiene ẹn̄wam ke utom emi. Ẹsidọhọ nsio nsio nditọete, n̄kpri ye ikpọ, ẹkot Bible emi ẹkabarede ẹnyụn̄ ẹtịn̄ ebiet emi mîn̄wan̄ake owo. Ndusụk ini, ẹsikam ẹdọhọ mbon emi ẹdude ke idụt en̄wen ẹtiene ẹkot. Owo isikpehe mmọ okụk ke utom emi. Se mmọ ẹtịn̄de esin̄wam ẹkabade Bible ke usụn̄ emi enende onyụn̄ an̄wan̄ade owo. Eyenete kiet ke South Africa, emi esikpepde mme owo ndikabade Bible, ọdọhọ ete: “Mme akabade Bible ẹdiọn̄ọ ke Jehovah oyom mmimọ ikabade Ikọ esie nnennen nnennen, n̄ko ke ana ikabade enye an̄wan̄a mbon emi ẹdikotde.”

 Ke ini ẹkabarede Bible ẹma, ẹsimịn̄ ẹnyụn̄ ẹsịn ikpaedem. Man ẹnam oro, ẹsiyom ẹnyene nsio nsio n̄kpọ nte pepa, mmọn̄n̄wed, n̄kpọ emi ẹdidade inam ikpaedem, n̄kpọ emi ẹdidade inam ikpaedem ọsọn̄ idem, n̄kpọ emi ẹdidade idian ikọn̄n̄wed kiet kiet, urụk emi ẹdisịnde ke ufọt Bible, ye mme n̄kpọ eken. Ke 2019, ikabiat se ibede biliọn naira itiaba (₦7,000,000,000) idep mme n̄kpọ emi kpọt. Isua oro, mbon oro ẹnamde utom ke itie umịn̄n̄wed nnyịn ẹma ẹbiat se ibede hour 300,000 ẹmịn̄ Bible ẹnyụn̄ ẹnọ ẹka nsio nsio itie.

 Ntak emi ẹkebiatde utọ ediwak okụk ye ini ntre ẹnam utom oro? Joel Blue emi anamde utom ke Itieutom Emi Ẹsede Ẹban̄a Umịn̄n̄wed ke Ofụri Ererimbot ọdọhọ ete: “Idụhe n̄wed emi isiode, emi enyenede ufọn nte Bible. Ntre iyom Bible emi enen̄ede eye man ọnọ Abasi emi ikponode ubọn̄, onyụn̄ anam mme owo ẹma etop emi ikwọrọde.”

 Edikabade Eke Obufa Ererimbot edi ke utọ ke utọ. Ke uwụtn̄kpọ, imosio Edikabade Eke Obufa Ererimbot eke mme nnan ke usem duop. Ẹsimịn̄ Bible emi ke ikpehe ke ikpehe. Ekeme ndida hour itiaita ndimịn̄ ofụri Bible kiet kpọt. Ndien ẹma ẹmịn̄ ẹma, ekeme ndikon̄ nsịm ikpat itiaba ye ubak. Imesinyụn̄ isio san̄asan̄a Bible inọ mbon n̄kpọkọbi sia owo mîsiyakke ẹmen n̄wed emi enyenede nsọsọn̄ ikpaedem ẹdụk ndusụk ufọk-n̄kpọkọbi.

 Edikabade Eke Obufa Ererimbot esinen̄ede an̄wam mme owo. Da esop emi ẹsisemde usem Kiluba ke uwụtn̄kpọ. Esop emi odu ke Tombe ke Democratic Republic of the Congo. Ndiwawat nto ibuot obio Democratic Republic of the Congo nsịm Tombe ebe itiat 1,000. Bible kiet kpọt ke kpukpru Mme Ntiense Jehovah oro ẹdude do ẹkenyene, ndien ikọ Kiluba oro ẹkedade ẹkabade Bible oro ikan̄wan̄ake ediwak owo. Bible kiet oro ke nsio nsio nditọete oro ẹnyenede n̄kpọ ndinam ke mbono esop ẹkesida ẹtịm idem. Edi ke August 2018, ẹma ẹsio ofụri Edikabade Eke Obufa Ererimbot ke usem Kiluba. Bible enye emi enen̄ede an̄wan̄a owo, ndien kpukpru owo ke esop oro ẹnyene eke mmọ.

Kop se sista kiet emi esisemde usem German eketịn̄de mi aban̄a  Edikabade Eke Obufa Ererimbot emi ẹfiakde ẹkabade ke usem German. Enye ọdọhọ ete: “Ndikot Bible itiehe mi nte n̄kpọ emi anade nnam, edi edinenem mi ndikot idahaemi.” Owo n̄kpọkọbi kiet ekewet ete: “Ẹma ẹnọ mi Edikabade Eke Obufa Ererimbot, ndien se n̄kotde ke Bible emi ke anam n̄kpụhọde nte ndude uwem. Akanam Bible in̄wan̄ake mi nte an̄wan̄ade idahaemi. Mmenen̄ede nyom ndidiọn̄ọ n̄kpọ mban̄a Mme Ntiense Jehovah, n̄kponyụn̄ mma ndidi Ntiense Jehovah.”

 Kpukpru mbon oro ẹsikotde Edikabade Eke Obufa Ererimbot ẹnen̄ede ẹkọm mbon oro ẹsitịpde okụk man ẹda ẹnam Bible emi. Ediwak owo ẹsika donate.ps8318.com ẹketịp okụk emi. Imọkọm mbufo etieti ke nte ẹsitatde ubọk ẹtịp okụk.