Bekatua Jainkoaren arauen aurka doan edozein ekintza, sentimendu edo pentsamendu da. Bibliak bekatu egitea Jainkoaren arabera gaizki dagoena, edo bidezkoa ez dena, egitea dela dio (1 Joan 3:4, NWT; 5:17). Bekatu egitea zuzena dena ez egitea ere dela dio Bibliak (Santiago 4:17).

 Bibliaren jatorrizko hizkuntzetan, bekatu hitzak «tiroa huts egitea» esan nahi du. Adibidez, Bibliak «hutsik egin gabe», habailaz harriak jaurtitzen zituen soldadu-talde bat aipatzen du. Esamolde hau literalki itzuliko balitz, «bekatu egin gabe» esan nahiko luke (Epaileak 20:16). Beraz, bekatu egitea Jainkoaren arau perfektuak betetzen saiatzean huts egitea da.

 Jainkoa sortzailea denez, gizakiontzat arauak jartzeko eskubidea du (Apokalipsia 4:11). Horregatik, gure ekintzen bidez, kontuak eman behar dizkiogu (Erromatarrei 14:12).

Saihestu al daiteke guztiz bekatu egitea?

 Ez. Bibliak honakoa dio: «Denek egin baitzuten bekatu eta denak aurkitzen dira geroztik Jainkoaren aintzarik gabe» (Erromatarrei 3:23; 1 Erregeak 8:46; Kohelet 7:20; 1 Joan 1:8). Zergatik gertatzen da hau?

 Hasiera batean, Adam eta Ebak ez zuten bekaturik. Jainkoak perfektu sortu zituen, bere irudira (Hasiera 1:27). Baina Jainkoa desobeditu zutenez, perfekzioa galdu zuten (Hasiera 3:5, 6, 17-19). Haurrak izan zituztenean, bekatua eta inperfekzioa herentziazko akats bat bezala pasa zizkieten (Erromatarrei 5:12). Horregatik, Israelgo Dabid erregeak hurrengoa esan zuen: «Errudun jaio nintzen» (51. Salmoa 7 [51:5, NWT], etzanak gureak).

Bekatu batzuk besteak baino okerragoak al dira?

 Bai. Adibidez, Bibliak dioen bezala, antzinako Sodomako gizonak «gaiztoak ziren eta bekatu larriak egiten zituzten»; beraien bekatua «larriegia» zen (Hasiera 13:13; 18:20). Bekatu bat zein larria den jakiteko, ondorengoa hartu behar da kontuan:

1.    Larritasuna. Bibliak hurrengo bekatu larriak saihesteko esaten digu: sexu moralgabekeria, idolatria, lapurreta, mozkortzea, estortsio egitea, hilketa eta espiritismoa (1 Korintoarrei 6:9-11, NWT; Apokalipsia 21:8). Bibliaren ikuspuntutik, ez dira gauza bera bekatu larri hauek eta nahigabe edo pentsatu gabe egiten diren bekatuak, esaterako, gure ekintza eta hitzekin besteak mintzen ditugunean (Esaera Zaharrak 12:18, NWT; Efesoarrei 4:31, 32). Hala ere, Bibliak gure bekatuei garrantzirik ez kentzeko ohartarazten gaitu, honek beste bekatu larriagoak egitera eraman gaitzakeelako (Mateo 5:27, 28).

2.    Motibazioa. Bekatu batzuk Jainkoaren nahia ez ezagutzearen ondorioz egiten dira (Eginak 17:30; 1 Timoteori 1:13). Bibliak bekatu hauei ez die garrantzirik kentzen, baina nahita Jainkoaren legeen aurka egindako bekatuetatik desberdintzen ditu (Zenbakiak 15:30, 31). Nahita egiten diren bekatu hauek bihotz, edo joera, gaiztoa duten pertsonek egiten dituzte (Jeremias 16:12).

3.    Maiztasuna. Bibliaren ikuspuntutik ez da gauza bera behin bekatu egitea edo denbora luzez bekatu bat egiten ibiltzea (1 Joan 3:4-8). Ondo dagoena ezagutu ondoren «nahita bekatu egiten jarraitzen» dutenak epaituko ditu Jainkoak eta ondorioak jasan beharko dituzte (Hebrearrei 10:26, 27).

 Pertsona batzuk oso gaizki sentitu daitezke egin dituzten bekatu larriengatik. Adibidez, Dabid erregeak hurrengoa idatzi zuen: «Buruz gain ditut neure erruak, azpian hartua naute, zama astunegiak legez» (38. Salmoa 5 [38:4, NWT]). Baina Bibliak hurrengo esperantza ematen digu: «Utz beza gaiztoak bere bidea, gaizkileak bere asmo txarrak. Bihur dadila Jaunarengana, gupidaz hartuko baitu; bihurtu gure Jainkoarengana, guztiz barkabera baita» (Isaias 55:7).