JEHOVAH ADASEFO a wɔwɔ Saponara, kurow bi a ɔwɔ Sicily no nyaa nkaabobaa dze bɔɔ hɔn abaw do, osian mboa a wɔdze kɛmae aber a nsu yirii faa kurow no mu no ntsi.

Wɔ November 22, 2011 mu no, nsu kɛse bi yirii faa nkurow nye nkurobaase ahorow bi a ɔwɔ Messina mantɔw mu no. Dɛm ewimbir noara wɔ Saponara no, asaasedwuruw bi so kum nyimpa baasa​—abofraba kor nye mpanyimfo beenu.

Aber a atoyerɛnkyɛm no sii ne nda kakraabi ekyir no, Jehovah Adasefo hyehyɛɛ ekuw ahorow bi a no mufo yɛ etuhoakyɛfo, na wɔmaa hɔn dza wobehia ma woeetum ekesiesie mbea ahorow a ndɛtse nye nwura ayɛ hɔ pɔtɔɔ no.

Dɛm ekuw ahorow yi nye kurow mu hɔ mpanyimfo no bɔɔ mu yɛɛ edwuma dze mboa maa beebi a ahohia wɔ kɛse no. Aber a wodzii ehiadze a ɔgye ntsɛmpɛ paa a odzi kan no ho dwuma wiei no mpo no, nna wɔda ho ara reyɛ edwuma. Adasefo 50 kesi 80 na wɔdze hɔn ho hyɛɛ mu, a hɔn mu binom twaa kilomita 97 (akwansin 60) dze baa hɔ.

Nyimpa a wɔtsetse bea a atoyerɛnkyɛm no sii no mu pii kyerɛɛ hɔn enyisɔ maa Adasefo no. Nyia a ɔhwɛ mpotamu hɔ no do no kãa no mpɛn pii dɛ, “Ɔsɛ dɛ yesũasũa hom paa!”

Abosoom enum ekyir no, Baguanyi Fabio Vinci, gyinaa ɔmansin mpanyimfo no ananmu dze nkaabobaa maa Jehovah Adasefo asafo a ɔwɔ apaamu hɔ no.