Wɔ dawurbɔ krataa bi a wɔato dzin Frankfurter Rundschau mu no, nna asɛntsir bi wɔ mu a ɔse “Ɔtse dɛ Ebusua Bi a Woehyia mu Regye Hɔn Enyi.” Hɔn a wɔkɔr dɛm ehyiadzi no bi no so tsee nkã dɛmara.

Karla a ofi Puerto Rico baa ehyiadzi yi bi no kãa dɛ: “Wɔmaa m’enyi kãe papaapa!”

Sara a ofi Australia so kãa dɛ: “Metsee nkã dɛ gyama makɛsera mankasa m’ebusuafo bi wɔ ɔman fofor do.”

Ebɛnadze na ɔmaa wɔkãa nsɛm a ɔkã akoma dɛm? Ɔyɛ Jehovah Adasefo amanaman ntamu ehyiadzi no. Wɔyɛɛ no July 18 kesii 20, 2014 wɔ Commerzbank-Arena wɔ Frankfurt am Main, Germany. Nyimpa bɛyɛ 37,000 na wɔkɔr ehyiadzi yi bi.

Hɔn a wɔkɔr ehyiadzi no hyiaa mu sũaa Bible no. Dza nna ɔkã adzesua yi ho nye Bible akenkan, ndwontow, mpaabɔ, drama ahorow ebien, nye Bible mu ɔkasa ahorow a ɔyɛ enyigye.

Nna etsiefo no mu binom fi Germany hɔ ara, na hɔn mu bɔbor 3,000 so fi Australia, Britain, Greece, Lebanon, Serbia, South Africa, nye United States. Adasefo bɛyɛ 234 a wofifi aman 70 do a wɔsom wɔ hɛn som edwuma etsitsir no ne fã bi, tse dɛ asɛmpatserɛw edwuma no mu no so kɔr ehyiadzi yi bi.

Wɔtwee dwumadzi no n’afã bi kɔr mbea afofor 19 bi so wɔ Germany, nye mbea bi so wɔ Austria na Switzerland ma wotsiee no ber kor noara mu. Sɛ wɔkã nyimpa a woketsiee dwumadzi no nyinara bɔ mu a, hɔn dodow si 204,046.

Wɔ Frankfurt no, wɔyɛɛ dwumadzi no wɔ Borɔfo, German, nye Greek kasa mu. Wɔ mbea afofor so no, wɔkyerɛɛ ɔkasa ahorow bi ase ber kor noara mu kɔr kasa ahorow 17 mu, a Arabic, Chinese, Tamil, Turkish, nye mmum kasa ahorow ebien bi so kã ho.

Ɔwɔ mu dɛ ɔsosor kasa ahorow a Adasefo no kã, beebi a wofifi, nye hɔn amambra dze, naaso nna mpaapaamu nnyi hɔn ntamu​—ɔdɔ kãa hɔn bɔɔ mu. (John 13:34, 35) Wɔnye hɔnho dzii no dɛ enuanom mbarimba na mbaa.

Tobias a ofi Britain kãa dɛ: “Hɛnankasa yehun mbrɛ hɛn amanaman ntamu enuayɛ no tum dzi akwansidze do no.”

Davianna a ofi Puerto Rico no kãa dɛ: “Mihyiaa me mfɛfo Adasefo a wofifi aman bɔbor 20 do. Hɛn dɔ a yɛwɔ ma Nyankopɔn nye hɛnho no kã hɛn bɔ mu.”

Malcom a ɔyɛ ehyiadzifo no mu kor a ofi Australia kãa dɛ: “Mebɛyɛɛ Jehovah Adasefo no mu kor wɔ kurow kakraba bi mu. Mekenkaan hɛn wiadze nyina enuayɛ kuw soronko no ho adze na mohwɛe so wɔ video ahorow mu. Na ha dze, mankasa mehu mbrɛ osi tse. Iyi ama mabɛtse enuayɛ kuw no ase ankasa. Ha a mebae yi ahyɛ me gyedzi dzen papaapa.”

Nna Adasefo a wofifi asafo ahorow 58 a ɔwowɔ Frankfurt nye mbea a ɔbembɛn mu no esiesie akyɛdze nye enyigyedze ahorow dze rotweɔn ahɔho a wɔreba ehyiadzi no.

Cynthia a ofi United States no kãa dɛ: “Wɔdaa ahɔhoyɛ soronko edzi kyerɛɛ hɛn. Mo werɛ nnkefir enuanom no hɔn dɔ, ayamuyie nye papayɛ a no mu dɔ no da.”

Simon a ɔwɔ Germany hɔ no kãa dɛ: “Nna ɔdɔ mapa, serew papabi nye enuadɔ ahyɛ hɔ nyina ma. Hɛn nyinara botum esũa biribi efi hɛn ho nkorkor.”

Amy a ofi Australia so kãa dɛ: “Ewimbir dwumadzi no a yɛdze gyee hɛn enyi no ma muhu dɛ, Jehovah Adasefo asetsena nnyɛ katsee a enyigye biara nnyi mu. Yenyim mbrɛ wosi gye enyi​—enyigye a no ho tsew na ɔyɛ papa.”

Nna Frankfurt ehyiadzi no yɛ amanaman ntamu ehyiadzi a wɔyɛɛ no ndzidzido ndzidzido wɔ aman ahorow akron do no mu kortsee.

Aber a wobisaa dɛ ehyiadzikɔ wɔ Frankfurt tse dɛn no, ahɔho no mu kor yii ano dɛ: “Susu ho hwɛ dɛ ekehyia wo busuanyi bi a ɔbɛn wo paa, tse dɛ bi a wo nua dɛm, a nna innyim mpo dɛ ɔwɔ hɔ. Na ihyiaa no no, obue ne nsamu yɛ wo awaawaetuu ba ne fie. Enyigye a ɔbɛhyɛ w’akoma ma no, innkotum akyerɛkyerɛ mu. Afei fa dɛm enyigye no bɔ ho mpɛn 37,000. Dɛm na nna ɔtse aber a mokɔr ehyiadzi wɔ Frankfurt no.”