Jehovah Adasefo hɔn efiefi asɛnka edwuma a wɔdze nyim hɔn yie no ekyir no, afei dze, ibohu so dɛ wogyina trɔk fɛfɛɛfɛw bi a wɔahyehyɛ nwoma ahorow wɔ do ho wɔ baguamu.

Ndaansa yi, woesi dɛm kwan yi a yɛfa do yɛ asɛnka edwuma no do dua paa. Wɔ November 2011 mu no, Adasefo bi a wɔwɔ New York City hyɛɛ ase dɛ wɔnam trɔk nye apon ahorow a wɔahyehyɛ nwoma ahorow wɔ do do rema nkorɔfo enya Bible mu nkrasɛm no. Dɛm kwan yi a wɔfaa do no soow aba ara ma annkyɛr na wɔhyɛɛ ase yɛɛ bi so wɔ nkurow afofor so mu.

Obodur March 2015 no, nna wɔakyekyɛ trɔk dodow 165,390 ama Jehovah Adasefo asafo ahorow a ɔwɔ wiadze nyina no. Woenya trɔk, apon nye kiosk ahorow mpempem pii a wɔdze dzi dwuma.

Efiefi asɛnka edwuma no da ho ara yɛ ɔkwan tsitsir a Jehovah Adasefo fa do tserɛw Bible mu nokwasɛm mu. Naaso, trɔk a wɔhyehyɛ nwoma ahorow wɔ do a wɔdze edzi dwuma no so asow aba paa. Hwɛ nhwɛdo ahorow bi.

Wɔ Peru no, ɔbarimba bi a wɔfrɛ Raul twee bɛɛn Adasefo no wɔ hɔn trɔk no mu kor bi ho, na ɔkãa dɛ: “Hom kɔr hen? Mfe ebiasa nye yi na mahwehwɛ Adasefo no! Ntsi muhun hom trɔk yi, nna medaa Nyankopɔn ase.”

Ɔwɔ mu dɛ nna Jehovah Adasefo taa kɔ bea a Raul tse no dze, naaso nna dapɛn no mu o, dapɛn n’ewiei o, onnyi fie. Ɔkyerɛkyerɛɛ mu dɛ nna ɔnye Adasefo no sũa adze, na ɔpɛ dɛ ɔsan toa n’adzesua no do. Wɔyɛɛ nhyehyɛɛ maa ɔtoaa adzesua no do.

Awarfo fofor bi gyinae wɔ hɛn trɔk no kor ho wɔ Bulgaria, na wɔgyee buukuu a wɔato dzin The Secret of Family Happiness no. Dapɛn a odzi hɔ no, wɔsanee kɔr ho kɛgyee nwoma ebien yi kãa ho: My Book of Bible Stories nye Learn From the Great Teacher. Ɔdasefo no a ogyina trɔk no ho no bisaa hɔn dɛ wɔwɔ mba ahen. Woyii ano dɛ: “Yɛnnwoe, naaso yɛayɛ hɛn adwen dɛ sɛ yɛwo a, yɛbɛkyerɛkyerɛ hɛn mba no Nyankopɔn ho adze. Dɛm mbuukuu yi ara na yehia.”

Ɔbarimba bi a ɔhyɛ nsordaafo atar bɛɛn Adasefo no wɔ trɔk no kor ho wɔ Ukraine. Ɔkãa dɛ, “Nkataasia, hom nkã aber a Har-Magedon bɛba nkyerɛ me.” Nna ɔbarimba yi dze no ho ahyɛ basabasayɛ a ɔkɔr do wɔ Ukraine ndaansa yi ara no mu fee. Ndzɛmba a osisi wɔ wiadze yi mu no ma ɔgye dzi dɛ ɔnnkɛkyɛr na Har-Magedon aba, naaso onnhu siantsir a Nyankopɔn nnyɛɛ n’adze ntsɛmdo. Adawurbɔfo no fi Bible no mu kyerɛkyerɛɛ mu kyerɛɛ no dɛ Nyankopɔn wɔ siantsir papa bi ntsi a ɔmmfaa noho ngyee adasamba nsɛm mu, na dɛ ɔnnkɛkyɛr na ɔaasɛɛ emumuyɛfo. Ɔbarimba no gyee Ɔweɔn-Aban nye Awake! magazine ahorow, nye buukuu a wɔato dzin Is There a Creator Who Cares About You? no.

Wɔ Macedonia no, aberantsɛ bi kãa kyerɛɛ Adasefo no wɔ trɔk no kor ho dɛ, ɔakenkan hɔn magazine ahorow no bi pɛn, naaso afei dze ɔpɛ dɛ onya What Does the Bible Really Teach? buukuu no bi. Ɔkãa dɛ ɔrokɔ nwomakorabea hɔ dɛm aber noara na ɔaakɛhyɛ ase akenkan.

Bɛyɛ ndɔnhwer ebien ekyir no, ɔbarimba no saan n’ekyir bae a ɔakenkan nwoma no ne nkrataafã 79 a odzi kan no ewie. Ɔkãa dɛ: “Buukuu yi sesa asetsena! Mehu dɛ saana dza megye dzi no mu pii yɛ ator. Dza buukuu yi kyerɛkyerɛ mu no nyinara tɔ m’aso mu. Ɔasesa me ntseasee koraa wɔ asetsena ho!”