Nyew. Jehovah Adasefo gye dzi dɛ Bible mu no nyinara “fi Nyame ahom mu, na oye.” (2 Timothy 3:​16) Na dza wɔtaa frɛ no Ahyɛmu Dadaw nye Ahyɛmu Fofor no so kã ho bi. Mpɛn pii no, Jehovah Adasefo taa frɛ Bible n’afã ahorow yi Hebrew Kyerɛwnsɛm nye Christianfo Greek Kyerɛwnsɛm. Wɔ dɛm kwan yi do no, yekwetsir dɛ yɛbɛma ayɛ dɛ gyama Bible no ne fã bi etwa mu anaa no ho nnhia.

Nyankopɔn dze no sunsum kãa Christiannyi ɔsomafo Paul ma ɔkyerɛwee dɛ: “Na biribiara a wɔkyerɛɛw no nkan no, wɔkyerɛwee maa hɛn nkyerɛkyerɛ.” (Romefo 15:4) Ntsi, yebenya nsɛm a mfaso wɔ do wɔ Hebrew Kyerɛwnsɛm no mu. Ibi nye dɛ ɔma yenya abakɔsɛm na afotusɛm a mfaso wɔ do, nye dza ɔkekã ho.

• Abakɔsɛm a mfaso wɔ do. Hebrew Kyerɛwnsɛm no da adzebɔ nye mbrɛ adasamba bɛyɛɛ ndzebɔnyɛfo no ho kyerɛwtohɔ edzi ma ɔkɔ ekyir. Sɛ ɔnnyɛ dɛm kyerɛwtohɔ yi a, nkyɛ yennkenya mbuae a ɔtɔ aso mu ama nsɛmbisa ahorow bi tse dɛ: Henfa na yefi bae? Ebɛnadze ntsi na nyimpa wu? (Genesis 2:7, 17) Afei so, Hebrew Kyerɛwnsɛm no kã mbrɛ Jehovah Nyankopɔn nye nyimpa a wonyaa enyigye na wohyiaa nsɛndzendzen tse dɛ hɛndze no bi no dzii no ho nsɛm.​—James 5:​17.

• Afotu a mfaso wɔ do. Bible mu nwoma a ɔnye Mbɛbusɛm nye Ɔsɛnkafo a ɔkã Hebrew Kyerɛwnsɛm no ho no kura nyansa a ɔnntwa mu da, a yebotum dze ayɛ edwuma wɔ asetsena mu. Wɔma yenya mbrɛ yebenya enyigye wɔ ebusua asetsena mu no ho afotusɛm (Mbɛbusɛm 15:17), mbrɛ yebeker pɛ wɔ edwumayɛ mu (Mbɛbusɛm 10:4; Ɔsɛnkafo 4:6), nye mbrɛ mbabun botum dze hɔn mbabun ber edzi dwuma yie ma hɔn enyi aagye (Ɔsɛnkafo 11:9–​12:1).

Afei so sɛ yesũa Moses Mbra a wɔakyerɛw wɔ Torah (Bible mu nwoma ahorow enum a odzi kan no) no mu no a, yebenya mfaso pii. Ɔwɔ mu dɛ dɛm Mbra no nnkyekyer Christianfo dze, naaso okura ngyinadosɛm ahorow bi a mfaso wɔ do a obotum aboa hɛn ma yeenya enyigye wɔ asetsena mu.​—Leviticus 19:18; Deuteronomy 6:​5-7.