Matthew Asɛmpa 28:1-20
28 Da a odzi kan wɔ dapɛn no mu wɔ Ahomgyeda no ekyir no, Mary Magdalene na Mary kor no kɔr nda no ho ahanamakye kɔhwɛe.
2 Na hwɛ, nna asaasewosow kɛse bi esi, osiandɛ nna Jehovah no bɔfoe esian efi sor ebepia ɔbo no efi hɔ ma ɔtsena do.
3 Nna ɔhyerɛn dɛ enyinam, na n’atar so yɛ fitaa dɛ esukwankyɛba.
4 No ho suro tɔɔ aweɔmfo a wɔwɔ hɔ no do ma hɔn ho popoe, na wɔyɛɛ dɛ ma woewuwu.
5 Ɔbɔfo no kaa kyerɛɛ mbaa no dɛ: “Mma hom nnsuro, minyim dɛ hom rohwehwɛ Jesus a wɔbɔɔ no asɛndua mu no.
6 Onnyi ha, woenyan no efi ewufo mu dɛ mbrɛ ɔkae no. Hom mbra mbɔhwɛ beebi a nna ɔda no.
7 Afei, hom nyɛ no ntsɛm nkɛka nkyerɛ n’esuafo no dɛ woenyan no efi ewufo mu. Na hwɛ, oedzi hom enyim kan rokɔ Galilee. Hom bohu no wɔ hɔ. Hwɛ, maka akyerɛ hom.”
8 Ntsi ntsɛmara na wofii nda no ho, na wɔdze suro na enyigye kɛse tuu mbirika dɛ wɔrekɛka dza woesi no ho asɛm akyerɛ n’esuafo no.
9 Na hwɛ, Jesus hyiaa hɔn, na okyiaa hɔn dɛ: “Asomdwee nka hom o!” Nna wɔkɔr ne nkyɛn kosuoo ne nan mu, na wɔkotoow no.
10 Na Jesus kaa kyerɛɛ hɔn dɛ: “Mma hom nnsuro! Hom nkɔ nkɛka dza hom ehu yi ho asɛm nkyerɛ mo nuanom no, na hom nka nkyerɛ hɔn dɛ wɔnkɔ Galilee, na wobohu me wɔ hɔ.”
11 Aber a wɔnam kwan do rokɔ no, aweɔmfo no mu binom kɔr kurow no mu na wɔkɛkaa dza woesi no nyinara ho asɛm kyerɛɛ asɔfo mpanyimfo no.
12 Ntsi asɔfo mpanyimfo no nye ɔman no mu mpanyimfo no hyiaa mu susuu asɛm no ho. Ɔno ekyir no wɔmaa nsordaafo no sika kɛse bi,
13 na wɔkaa kyerɛɛ hɔn dɛ: “Hom nka dɛ, ‘Anafua a yɛadeda no na n’esuafo no bae bowiaa no.’
14 Sɛ ambrado no tse mpo a, mma hom nnsuro, hɛnara yebotwitwa agye hom.”*
15 Ntsi wɔgyee sika no, na wɔyɛɛ dza wɔkaa kyerɛɛ hɔn no, na asɛm yi tahyee wɔ Jewfo no mu dze besi ndɛ.
16 Na esuafo 11 no kɔr Galilee, na wɔkɔr bepɔw a nna Jesus aka akyerɛ hɔn dɛ wonkehyia no wɔ hɔ no do.
17 Aber a wohun Jesus no, wɔkotoow no, naaso binom anngye enndzi dɛ ɔyɛ ɔno.
18 Na Jesus kɔr hɔn nkyɛn, na ɔkaa kyerɛɛ hɔn dɛ: “Wɔdze tum a ɔwɔ sor na asaase do nyinara ama me.
19 Dɛm ntsi hom nkɔ nkɛyɛ amanaman nyinara m’esuafo, na hom nnuma hɔn wɔ Egya nye Ɔba nye sunsum krɔnkrɔn dzin mu,
20 na hom nkyerɛkyerɛ hɔn ma wondzi dza mahyɛ hom nyinara do. Na hwɛ, menye hom wɔ hɔ daa kesi wiadze* ewiei.”
