BƐYƐ afe 670 A.H.B. no, nna Assyria abɛyɛ wiadze ahenman a ɔsõ papaapa. British Museum wɛbsaet no kyerɛɛ mu dɛ “nna ahenman no hyɛ ase fi Cyprus wɔ anee afamu dze kɔ Iran wɔ boka afamu, na odur ber bi mpo no, nna Egypt ka ho.” Nna n’ahenkurow nye Nineveh. Nna ɔyɛ kurow a ɔsõ paa wɔ wiadze mu dɛm aber no. Nna kurow no wɔ nture a ɔyɛ fɛw, ahemfie nye nwomakorabea akɛseakɛse. Nsɛm ahorow bi a nna wɔakyerɛw wɔ tsetse Nineveh kurow no n’afasu ho no ma yehu dɛ, dɛ mbrɛ Assyria ahemfo afofor yɛe no, dɛmara na Ɔhen Ashurbanipal so frɛɛ noho “wiadze nyinara hen.” Dɛm aber no, nna wɔakɛyɛ tse dɛ mbrɛ obiara nnkotum edzi Assyria ahenman no nye n’ahenkurow Nineveh do konyim.

Naaso aber a nna Assyria ahenman no etsim papaapa no, Jehovah no nkɔnhyɛnyi Zephaniah kãe too hɔ dɛ: “[Jehovah bɛtsen] ne nsa . . . na ɔasɛɛ Assyria; na ɔbɛma Nineveh ayɛ amamfõ, na ɔawow kɛsɛɛ dɛ sar do.” Ɔno da nkyɛn a, Jehovah no nkɔnhyɛnyi Nahum so kãe too hɔ dɛ: “Hom mfa dwetɛ afo, hom mfa sika afo: . . . ɔatɔ pan, na ɔayɛ hahoo, na ɔayɛ afoafo: Na ɔbɛba dɛ hɔn a wɔhwɛ wo nyina befi wo nkyɛn eguan, na wɔase dɛ, Nineveh ayɛ ekurofõ.” (Zeph. 2:13; Nah. 2:9, 10; 3:7) Ber a nkorɔfo tsee dɛm nkɔnhyɛsɛm no, bi a wobisaa hɔnho dɛ: ‘Ana dɛm asɛm yi botum aba mu? Ana Assyriaman kɛse yi wobotum edzi do konyim?’ Obotum aba dɛ nna wɔnngye nndzi.

Naaso, ampaara ampaara wodzii Assyria do konyim! Babylonfo nye Mediafo dzii Assyria do konyim. Iyi sii wɔ mfeha a otsĩa esuon A.H.B. n’ewiei. Ewiei koraa no, Nineveh daan amamfõ na nkorɔfo annkaa kurow no bio! Metropolitan Museum of Art a ɔwɔ New York hɔn nwoma bi kã dɛ: “Nineveh kurow no sɛɛ koraa ma sɛ nna ehwehwɛ a innhu. Sɛ nnyɛ Bible no a nkyɛ obiara nnyim kurow yi ho asɛm.” Biblical Archaeology Society kã dɛ bɛyɛ 1800 n’ahyɛse no “nna obiara mpo nnyim dɛ Assyria wɔ ahenkurow bi a wɔfrɛ no Nineveh.” Wɔ afe 1845 no, Austen Henry Layard a otutu famu hwehwɛ tsetse ndzɛmba mu no kɛyɛɛ nhwehwɛmu wɔ Nineveh. Dza nhwehwɛmu no maa ɔdaa edzi no ma yehu dɛ nna Nineveh yɛ kurow a ɔwɔ dzin nye enyimnyam.

Nineveh ho nkɔnhyɛ a ɔbaa mu pɛpɛɛpɛr no hyɛ ahotodo a yɛwɔ no mu dzen dɛ Bible mu nkɔnhyɛ ahorow a ɔfa wiadze tumdzi a ɔwɔ hɔ ndɛ ho no nyina so benya ne mbamu.​—Dan. 2:44; Nyi. 19:15, 19-21.