Bible No Sesa Nyimpa N’abrabɔ

EBƐNADZE na ɔmaa Rastanyi bi twitwaa ne tsinhwi na oyii enyitan a ɔwɔ ma aborɔfo fii n’akoma mu? Aberantsɛ bi so, nna ɔpɛ kõ paa, na ɔgyegye sika ma hɔn a wɔtɔn ndubɔn. Ebɛnadze na ɔboaa no ma ɔsesaa n’abrabɔ? Kenkan dɛm nkorɔfo yi hɔn anomu nsɛm.

“Miyii Ɔtan Hun Fii Mo Mu.”​—HAFENI NGHAMA

MFE A OEDZI: 34

ƆMAN A OFI MU: ZAMBIA

DZA NNA ƆYƐ: NNA ƆYƐ RASTANYI

ME NKAN ABRABƆ: Wɔwoo me wɔ etukɔfo asoɛe bi mu wɔ Zambia. Nna me maame tse Namibia, na aber a ɔkõ sii hɔ no, otui fii ɔman no mu. Ɔdze noho kɔbɔɔ kuw bi a wɔfrɛ no South West Africa People’s Organization (SWAPO) ho. Nna dɛm ahyehyɛdze yi kõ tsia South Africa aban a odzi Namibia do tum dɛm aber no.

Midzii mfe 15 no, nna matsena etukɔfo asoɛe pii mu. Mbabun a wɔtse asoɛe a SWAPO dzi do no, nna wɔtsetse hɔn dɛ wɔmper nhwehwɛ dɛm ahyehyɛdze no n’eyiedzi. Wɔdze amanyɛsɛm duaa hɛn akoma mu na wɔkyerɛkyerɛɛ hɛn dɛ yɛntan aborɔfo.

Midzii mfe 11 no, nna mepɛ dɛ wonuma me wɔ asɔr bi mu wɔ etukɔfo asoɛe hɔ. Nna ɔyɛ asɔr a Catholicfo, Lutheranfo, Anglicanfo, nye afofor a woedzi aforafora wɔ mu. Mekãa dza nna mepɛ dɛ meyɛ no ho asɛm kyerɛɛ ɔsɔfo bi, naaso ɔkãa kyerɛɛ me dɛ nyansa nnyi mu dɛ mebɛyɛ dɛm. Ofi dɛm aber no rokɔ no, mebeyɛɛ obi a ɔnngye nndzi dɛ Nyankopɔn wɔ hɔ. Midzii mfe 15 no, nna m’enyi abɛgye reggae ho paa. Afei so, mibenyaa ɔpɛ a no mu yɛ dzen dɛ mebɛyɛ biribi afa ayaayaadze a aborɔfo dze yɛɛ Africafo no ho. Dɛm ntsi, mokɔdɔɔm Rastafo kuw bi. Memaa me tsinhwi fuwii yɛɛ atsentsen, monoom wii, migyaa nam we, na meperee hwehwɛɛ fahodzi maa ebibifo. Naaso, ɔbra bɔn a mobɔ na video a ewudzisɛm wɔ mu a mohwɛ no dze, menngyaa. Iyi da nkyɛn a, nna mekã kasafĩ.

MBRƐ BIBLE NO SESAA M’ABRABƆ: Afe 1995 mu no, aber a nna medzi mfe 20 no, mehyɛɛ ase susuu dza mepɛ dɛ medze m’asetsena yɛ no ho. Megyee ber kenkaan Rastafo buukuu biara a me nsa bɛka no. Nna binom twe adwen si Bible no do, naaso nkyerɛkyerɛmu a wɔdze ma wɔ ho no nntɔ asomu mma me. Dɛm ntsi, meyɛɛ dɛ mankasa mebɛkenkan Bible no.

Ekyir yi, me nyɛnko Rastanyi bi maa me buukuu bi a Jehovah Adasefo ayɛ a wɔdze sũa Bible. Megyee ber dze buukuu no sũaa Bible no. Mber kakraabi ekyir no, mihyiaa Jehovah Adasefo na mokɔr do nye hɔn sũaa adze.

Mobɔɔ mbɔdzen papaapa gyaa ndubɔn nom na nsãwe. (2 Corinthfo 7:1) Mutwitwaa me tsinhwi, siesiee moho yie, gyaa dɛ mobɔhwɛ video a ndwansɛm nye basabasayɛ wɔ mu, na megyaa kasafĩ kã. (Ephesusfo 5:​3, 4) Ekyir koraa no, miyii enyitan a mowɔ ma aborɔfo fii m’akoma. (Asomafo Ndwuma 10:34, 35) Dza ɔboaa me ma mutumii yɛɛ nsakyer ahorow yi nye dɛ, migyaa dɛ mibetsie ndwom a ɔhyɛ nyimpa mu nyiyimu ho nkuran. Afei so, motwee moho fii m’anyɛnkofo no ho, siantsir nye dɛ nna wɔnnhyɛ me nkuran dɛ mensesa m’abrabɔ.

Meyɛɛ dɛm nsakyer yi ekyir no, mokɔr Jehovah Adasefo Ahendzi Asa do na mekãa kyerɛɛ hɔn dɛ menye hɔn bɔsom. Wɔyɛɛ nhyehyɛɛ ma obi nye me sũaa adze. Ber a misii gyinae dɛ mebɛma woenuma me ma maabɛyɛ Jehovah Adasefo no mu kor no, m’ebusua enyi anngye ho koraa. Me maame kãa kyerɛɛ me dɛ mempɛ asɔr papa bi nkɔ, na nnyɛ Jehovah Adasefo asɔr bi a. Mo wɔfa bi a ɔyɛ aban mu panyin kasae tsiaa me dzendzenndzen wɔ gyinae a mesi dɛ mebɛyɛ Jehovah Adasefo no mu kor no ho.

Naaso, mbrɛ Jesus nye nkorɔfo dzii ho adze a mesũa nye n’afotu a medze bɔɔ me bra no boaa me ma mutumii gyinaa ɔsoɛrtsia nye kasatsia ano. Sɛ medze dza Adasefo no kyerɛkyerɛ no toto dza Bible kã no ho a, ɔma megye dzi papaapa dɛ Jehovah Adasefo hɔn som na ɔyɛ nokwar. Dɛ nhwɛdo no, wodzi ahyɛdze a Bible no dze ama dɛ yɛnkã asɛm no do. (Matthew 28:19, 20; Asomafo Ndwuma 15:14) Afei so, wɔmmfa hɔnho nnhyɛ amanyɛsɛm mu.​—Ndwom 146:​3, 4; John 15:17, 18.

MBRƐ MENYA DO MFASO: Bible mu nsɛm a medze bɔ bra no aboa me wɔ akwan ahorow pii do. Dɛ nhwɛdo no, ndubɔn nom a megyaa no aboa me ma mutum sie sika dɔla ɔhaha pii do bosoom biara. Mennyɛ m’adze bio tse dɛ obi a ɔabɔ dam, na m’apɔwmudzen ayɛ papa.

Enyigye na akomatɔyamu a ofitsi mo mbofrase mapɛ ekyir kwan no, afei dze me nsa aka. Dza ɔkyɛn ne nyina no, metum atwe abɛn Nyankopɔn.​—James 4:8.

“Mehu Mbrɛ Mibesi Ahyɛ M’ebufuw Do.”​—MARTINO PEDRETTI

MFE A OEDZI: 43

ƆMAN A OFI MU: AUSTRALIA

DZA NNA ƆYƐ: NNA ƆTƆN NDUBƆN

ME NKAN ABRABƆ: Aber a meyɛ abofra no, nna m’ebusua nntaa nntsena faakor. Ndɛ yɛtsena ha a, ɔkyena nna yeetu akɛtsena beebi fofor. Metsenaa nkurow nkakraba nye kuropɔn bi mu. Ekyir yi mekɛtsenaa kurow bi a hɔn a wɔyɛ Australiafo mapa na wɔtse hɔ. Mekaa ndzɛmba ahorow bi a ɔyɛ enyigye a dɛm aber no nna menye me maame no nuanom hɔn mba nye mo wɔfanom yɛ no. Nna yɛkɛpa nam, yɛkɔ ahayɛ, na yɛkoakoa ndua mu na yɛdze bi so wen ndzɛmba afofor.

Nna me papa bɔ ekutuku (boxer), ntsi meyɛ abofra no, ɔkyerɛɛ me mbrɛ wosi kõ. Dɛm ntsi, nna metaa nye nkorɔfo kõ paa. Ber a mudur me mbabun mfe mu no, nna mesɛɛ m’adagyer nom nsã wɔ mbea a wɔtɔn nsã. Nna menye m’anyɛnkofo kɔhwehwɛ nkorɔfo nye hɔn kõ. Nna yɛdze nsekan na mpɔtsibaa a wɔdze bɔ baseball tow hyɛ nyimpa 20 anaa dza ɔbor dɛm do.

Nna motɔn ndzɛmba a nkorɔfo ewia wɔ habɔ nye ndubɔn dze pɛ sika. Afei so, nna medze itur ahorow bi hunahuna nkorɔfo na medze dan hɔn kaw ma hɔn a wɔtɔn ndubɔn. Nna me botae nye dɛ mebɛyɛ obi a okum nyimpa. Nna me nsabran nye, Sɛ ennku me a, muboku wo.

MBRƐ BIBLE NO SESAA M’ABRABƆ: Metsee Jehovah Adasefo ho asɛm aber a meyɛ abofra. Midzii mfe 20 rokɔ no, mekaa dɛ mibisaa me maame dɛ onyim beebi a hɔn mu binom tse anaa. Ndaanu ekyir no, Ɔdasefo bi a wɔfrɛ no Dixon bɔbɔɔ m’abow mu. Ɔnye me bɔɔ nkɔmbɔ kakra na ɔtoo nsa frɛɛ me dɛ membra hɔn asafo nhyiamu no bi. Mokɔr dɛm nhyiamu no, na ofitsi dɛm aber no rokɔ no, makɔ asafo nhyiamu bobor mfe 20. Adasefo no dze Bible no buaa me nsɛmbisa ahorow no nyina.

Mubohun dɛ Jehovah pɛ obiara asɛm, a hɔn wɔnntsen so ka ho. (2 Peter 3:9) Afei so mubosũae hun dɛ, sɛ obiara yi me tokyen mpo a, Jehovah dze ɔbɔkɔ do ara ahwɛ me. Nnyɛ iyi nko, mesaan so hun dɛ sɛ mesesa m’abrabɔ a, Jehovah dze mo bɔn bɛkyɛ me. Bible mu asɛm a ɔwɔ Ephesusfo 4:​22-​24 nyaa mo do tum kɛse. Dɛm asɛm no hyɛɛ me nkuran dɛ ɔwɔ dɛ ‘miyi nyimpa dadaw no gu’ na ‘mehyɛ nyimpa fofor no a wɔabɔ no Nyame do.’

Ɔgyee ber ana murutum asesa m’abrabɔ. Dapɛn no mu no, moronnom ndubɔn. Naaso, sɛ odu dapɛn n’ewiei na menye m’anyɛnkofo pue a, m’enyi bɛba moho do no, nna m’anom bi. Mubohun dɛ, sɛ mubotum asesa m’abrabɔ a, gyedɛ motwe moho fi m’anyɛnkofo no ho. Ntsi misii gyinae dɛ mubotu akɔ ɔman fofor do. M’anyɛnkofo binom kãa dɛ wɔnye me bɔkɔ, na megyee too mu. Yɛnam kwan do rokɔ no, wɔhyɛɛ ase dɛ wɔronom wii na wɔmaa me bi dɛ monnom. Mekãa kyerɛɛ hɔn dɛ mepɛ dɛ mesesa m’abrabɔ. Asɛm yi annyɛ hɔn dɛw. Dɛm ntsi, yedur ɔman no nkwanta do no, obiara faa no kwan. Ekyir yi, minyaa no ntsee dɛ m’anyɛnkofo no dze itur a n’ano yɛ ndam akɔbɔ epoo wɔ sikakorabea bi mu.

MBRƐ MENYA DO MFASO: Motwee moho fii m’anyɛnkofo no hɔnho no, ɔyɛɛ mberɛw maa me dɛ mebɛyɛ nsesa ahorow a ohia wɔ m’abrabɔ mu. Ntsi, afe 1989 mu no, wonumaa me ma mebɛyɛɛ Jehovah Adasefo no mu kor. Wonumaa me ekyir no, me sista, me maame, na me papa bɛkaa moho ma yɛsoom Jehovah.

M’awar mfe 17 na mowɔ mba baasa a hɔnho yɛ fɛw. Mehu mbrɛ mibesi ahyɛ m’ebufuw do ber mpo a obi ahyɛ me ebufuw no. Afei so, mehu dɛ ɔwɔ dɛ meda ɔdɔ edzi kyerɛ nyimpa a “wofi aman, mbusuakuw, nye kasa nyina mu.” (Nyikyerɛ 7:9) Muhu dɛ asɛm a Jesus kãe no enya mbamu wɔ mo do. Ɔkãa dɛ: “Sɛ hom tsena m’asɛm mu a, nna hom yɛ m’esuafo ampa; na hom bohu nokwar no, na nokwar no bɛyɛ hom adehye.”​—John 8:​31, 32.

[Asɛm a wɔafa akã]

Dza ɔboaa me ma mutumii yɛɛ nsakyer ahorow yi nye dɛ, migyaa ndwom a ɔhyɛ nyimpa mu nyiyimu ho nkuran no tsie

[Asɛm a wɔafa akã]

Nna menye m’anyɛnkofo kɔhwehwɛ nkorɔfo nye hɔn kõ. Nna yɛdze nsekan na mpɔtsibaa a wɔdze bɔ baseball tow hyɛ nyimpa 20 anaa dza ɔbor dɛm