ADZESUA 01
Bible No Besi Dɛn Aboa Wo Wɔ W’asetsena Mu?
Sɛ yɛreka ankasa a, hɛn mu biara wɔ nsɛmbisa bi a ɔfa asetsena, amandzehu, owu, nye daakye ho. Ɔyɛ so a, abrabɔ mu nsɛm bi tum to hɛn dadwen; tse dɛ mbrɛ yebesi ahwɛ hɛnho nye hɛn ebusua, nye afei mbrɛ hɛn ebusua botum enya enyigye. Nyimpa piinara ehu dɛ, Bible no ma hɛn nsɛmbisa a no ho hia papaapa wɔ asetsena mu no ho mbuae, na ɔsan so ma hɛn afotu a nyansa wɔ mu a yebotum dze abɔ bra wɔ hɛn asetsena mu. Innhu dɛ Bible no botum aboa nyimpa ahorow a inyim hɔn no nyina?
1. Nsɛmbisa a Bible ma ho mbuae no, ibi nye dɛn?
Bible ma dɛm nsɛmbisa a no ho hia yi ho mbuae: Nkwa sii dɛn bae? Ebɛnadze ntsi na yɛwɔ wiadze? Nyimpa a wonndzii mfomdo biara no, ebɛnadze ntsi na wohu amandze? Sɛ yewu a, henfa na yɛkɔ? Sɛ obiara pɛ asomdwee dze a, nna ɔno ebɛnadze ntsi na akodzi kɔ do dɛm? Ebɛnadze na ɔbɔto hɛn asaase yi daakye? Bible no hyɛ hɛn nkuran dɛ yɛnhwehwɛ dɛm nsɛmbisa yi ho mbuae, na ampaara so, nyimpa ɔpepem pii enya dɛm nsɛmbisa yi ho mbuae a ɔtɔ asomu wɔ Bible no mu.
2. Bible no besi dɛn aboa hɛn ma hɛn enyiwa aagye wɔ hɛn abrabɔ mu?
Bible no ma hɛn afotu a nyansa wɔ mu. Dɛ nhwɛdo no, ɔkyerɛ mbusua dza ɔsɛ dɛ wɔyɛ ama woeenya enyigye mapa. Ɔma hɛn afotu a ɔbɔboa hɛn ma yeetum egyina dadwen nye ɔhaw ahorow ano, nye dza ɔbɔboa hɛn ma yɛdze enyigye aayɛ hɛn edwuma. Sɛ yɛbɔ mu sua nwoma yi a, ibohu dza Bible ka fa dɛm nsɛm yi nye nsɛm afofor so ho. Bi a woara so bɛgye ato mu ampaara dɛ “Kyerɛwsɛm biara [dza ɔwɔ Bible mu biara] . . . oye.”—2 Timothy 3:16.
Yɛremmfa dɛm nwoma yi nnhyɛ Bible no ananmu. Mbom no, ɔbɔboa wo ma wankasa aahwehwɛ Bible no mu akɔ ekyir. Ntsi yɛhyɛ wo nkuran dɛ, ɔyɛ a kenkan kyerɛwnsɛm ahorow a ɔwɔ adzesua nsɛm no mu no, na fa toto dza irusua no ho.
PƐNSAPƐNSA MU KƆ EKYIR
Ma yɛnhwɛ mbrɛ Bible no esi aboa nkorɔfo, mbrɛ ibotum akenkan Bible no ma wɔaayɛ wo dɛw, nye siantsir a ɔbɛyɛ papa dɛ ebɛma obi aboa wo ma aatse Bible no ase.
3. Bible no botum akyerɛ hɛn kwan
Bible no tse dɛ kandzea bi a ɔhyerɛn papaapa. Obotum aboa hɛn ma yeesisi gyinae a nyansa wɔ mu, na obotum so aboa hɛn ma yeehu dza obesi daakye.
Ma yɛnkenkan Ndwom 119:105, na yensusu nsɛmbisa yi ho:
-
Nyia ɔkyerɛɛw dɛm ndwom yi mu nsɛm no, nna ebɛn adwen na ɔwɔ wɔ Bible no ho?
-
Woara so, ebɛn adwen na ewɔ wɔ Bible no ho?
4. Bible no botum eyi hɛn nsɛmbisa ahorow ano
Basia bi bohun dɛ, nsɛmbisa a nna ɔdze mfe pii ahwehwɛ ho mbuae no, saana no ho mbuae wɔ Bible no mu. Ma yɛnhwɛ VIDEO no, na yensusu nsɛmbisa a odzidzi do no ho.
-
Aber a ehwɛɛ video no, ebɛn nsɛmbisa na ihun dɛ basia no wɔ?
-
Aber a osuaa Bible no, ɔboaa no dɛn?
Bible no hyɛ hɛn nkuran dɛ yembisa nsɛm. Ma yɛnkenkan Matthew 7:7, na yensusu dɛm asɛmbisa yi ho:
-
Ebɛn nsɛmbisa na ewɔ a Bible no botum ama wo ho mbuae?
5. Ibotum akenkan Bible no ma wɔaayɛ wo dɛw
Nkorɔfo pii dze enyigye rekenkan Bible no, na worinya do mfaso so. Ma yɛnhwɛ VIDEO no, na yensusu nsɛmbisa a odzidzi do no ho.
-
Aber a ehwɛɛ video no, ihun dɛ ahyɛse no, nna mberantsɛ na nkataasia no tse nka dɛn wɔ akenkan ho?
-
Ebɛnadze ntsi na Bible no dze, hɔn enyi gye n’akenkan ho?
Bible no ma yehu dɛ nsɛm a ɔwɔ mu no botum ama hɛn awerɛkyekyer nye enyidado. Ma yɛnkenkan Romefo 15:4, na yensusu dɛm asɛmbisa yi ho:
-
Bible no bɔhyɛ a ɔnye dɛ ibotum enya awerɛkyekyer nye enyidado no, ɔyɛ biribi a w’enyi gye ho anaa?
6. Afofor botum aboa hɛn ma yaatse Bible no ase
Nkorɔfo pii ebohu dɛ, sɛ wɔdze Bible a hɔnankasa wɔkenkan no to nkyɛn a, sɛ afofor boa hɔn ma wosua Bible mu nsɛm so a, ɔboa hɔn papaapa. Ma yɛnkenkan Asomafo Ndwuma 8:26-31, na yensusu dɛm asɛmbisa yi ho:
-
Yebesi dɛn atse Bible no ase?—Hwɛ nyiyimu 30 na 31.
Nna Ethiopianyi ɔbarimba no hia mboa ama oeetum atse Kyerɛwnsɛm no ase. Nkorɔfo pii so ebohu dɛ, sɛ afofor boa hɔn ma wosua Bible no a, ɔboa hɔn papaapa
BINOM KA DƐ: “Bible dze, sɛ egye ber sua a, nna eresɛɛ wo ber.”
-
Sɛ obi ka dɛm kyerɛ wo a, ebɛn asɛm na ebɛka akyerɛ no? Ebɛnadze ntsi na ebɛka dɛm?
DZA ESUA
Bible no ma hɛn afotu a yebotum dze abɔ bra wɔ hɛn asetsena mu, ɔma hɛn nsɛmbisa a no ho hia no ho mbuae, na ɔma yenya awerɛkyekyer nye enyidado.
Mbobɔdo
-
Ebɛn afotu na yebotum enya efi Bible no mu?
-
Nsɛmbisa a Bible ma ho mbuae no, ibi nye dɛn?
-
Ebɛnadze na epɛ dɛ isua fi Bible no mu?
HWEHWƐ PII KA HO
Hwɛ mbrɛ afotusɛm a ɔwɔ Bible mu no botum aboa hɛn ndɛ.
“Bible Mu Afotusɛm—No Do Wɔ Mfaso Aber Nyina” (Ɔweɔn-Aban No. 1 2018)
Ofitsi banyin bi no mbofraber mu nyina, nna n’enyiwa nngye wɔ n’asetsena mu, naaso hwɛ mbrɛ Bible boaa no ma odzii dɛm ɔhaw yi do.
Hwɛ afotusɛm a Bible no dze ma fa ebusua asetsena ho.
“Ndzɛmba 12 Bi A Ɔma Ebusua Asetsena Yɛ Enyigye” (Nyan! No. 2 2018)
Adwen a nkorɔfo kura wɔ nyia odzi wiadze yi do ankasa ho no nnyɛ nokwar, naaso hwɛ mbrɛ Bible no kyerɛkyerɛ dɛm asɛm yi mu ma no mu da hɔ.
Ebɛnadze Ntsi Na Ɔsɛ Dɛ Isua Bible No?—Video Mu No Nyina (3:14)
Bi A W'enyi Bɛgye Iyi So Ho
NSƐM A WƆTAA BISA
Ebɛnadze Nye Bible Adzesua A Jehovah Adasefo Nye Nkorɔfo Yɛ No?
Wɔ dɛm Bible adzesua a Jehovah Adasefo nye nkorɔfo yɛ yi mu no, ibotum dze Bible nkyerɛase biara a ewɔ no esũa adze. Ibotum afrɛ w’ebusuafo anaa w’anyɛnkofo binom mpo ma wɔaabɛka woho ma hom eesũa.
