Ena ika25 ni Me 2022, e yaco bula e Denmark o Dennis Christensen. Qori ni sere oti mai ena valeniveivesu e Rusia, qai vakatalai i Denmark. E lima na yabaki nona vesu tu.

E kaya o Dennis: “Au marau niu sa sere, qai sotavi watiqu tale. Na nodra veitokoni kei na nodra veivakayaloqaqataki na mataveitacini e veiyasa i vuravura, e dua dina na iloloma talei mai vei Jiova. Au na masulaki ira tiko ga na tacida era vakacacani qai vesu ena vuku ni nodra vakabauta.”

Era veivuke vakayago, vakayalo tale ga vei Dennis kei Irina na mataveitacini kei na nodrau vuvale. Erau kaya: “Keirau sa waraka tu ga qo na gauna me keirau sokaloutaki Jiova kina ena galala kei ira na tacida e Denmark.”

Ena ika25 ni Me 2017, era curuma vakaukaua na vakailesilesi era vakaiyaragi e Rusia e dua na vale ni soqoni e Oryol ena gauna e caka tiko kina na soqoni. E qai vesu o Dennis. Toso na gauna, e beitaki koya na mataveilewai ni vakaitavi tiko ena kena tuvanaki na cakacaka ni isoqosoqo e vakavuna na tikoyavavala. Qori ni oti ga e dua na vula nona vakatabuya na Mataveilewai Cecere e Rusia na noda cakacaka.

Na vakatatabu e caka qori ena 2017, era kaya kina na vakailesilesi e Rusia ni sega vauci kina na veika vakalawa me baleti ira na tacida. Era kaya ni na sega ni vakaleqai kina na nodra dodonu yadua na tacida me baleta na nodra vakabauta. Ia na nona vesu o Dennis e itekitekivu sara ga ni nodra vakacacani, ra qai vesu na mataveitacini ena veivanua kece e Rusia kei Crimea.

Me yacova mai qo, e 91 na tacida era se vesu tiko. Meda masulaka ni o Jiova ena mareqeti ira tiko ga na “yalodina vua.”—Same 4:3.