Ena 2010, rau sa qai tovolea vakadua o Ed kei watina o Jennie na vunau ena talevoni. a E kaya o Jennie, “Au sega sara ga ni rawata, au kaya vei watiqu, ‘Au sega ni via vunau tale ena talevoni!’” E va tale ga qori na rai nei Ed. E kaya, “Au sega mada ga ni dau taleitaka nira qiriti au mai na dauvolivolitaki, me qai rawa vakacava vei au meu vunau ena talevoni?”

 Ni tekivu na matedewa na COVID-19, era sa sega ni vunau e veivale na iVakadinadina i Jiova. Ia era tomana tiko ga na nodra vunau nira talairawarawa ina vakaro i Jisu me kacivaki na itukutuku vinaka. Era cakava qori nira volaivola qai vunau ena talevoni. (Maciu 24:14; 28:19, 20) Ena gauna vata qori, e caka na soqoni kei na soqoni ni cakacaka vakavunau nira sema ena internet. Dua na gauna, a tovolea o Ed na vunau ena talevoni, dina ga ni dredre vua. E vakacava na imatai ni gauna e vunau kina ena talevoni? E kaya, “Dua na ka noqu rere, au mani masu! Oti au qiri sara. Keirau veivosaki sara kei Tyrone.”  b

 Rau vakaitikotiko o Tyrone kei watina o Edith ena taudaku ni tauni e Kentucky mai Merika. E yabaki 83 o Tyrone qai sega ni rai vinaka. Ia e vakadonuya me vulica na iVolatabu kei Ed. E dau wilika na nona ivola ni vakayagataka na iloilo ni vakalevutaki ka. Rau dau vuli vakawasoma kei Ed ena talevoni.

 Ni oti e dua na vula, rau dau sema o Tyrone kei Edith ina dua na soqoni e caka vakavoleka vei rau. E sega nodrau internet, ia rau dau vakarorogo ina soqoni ni vakayagataki na talevoni. Na cava e vakavuna me tataleitaki o Edith?

 Ni dau vuli iVolatabu o Tyrone, rau dau rogoca o Ed kei Jennie ni vukei koya tiko o Edith ena nona kunea na isaunitaro kei na tikinivolatabu. Ia e sega ni tukuna ni via vulica na iVolatabu. E kaya o Jennie, “Keirau rawa ni kila ena rorogo ni domona ni dua na ka e rarawataka tiko.”

 Dua na siga, e nanuma o Jennie me tarogi Edith. E waraka e dua na gauna veiganiti me kerea vei Ed me vosa ena talevoni. E kaya, “Tyrone, au rogoca tiko na domoi watimu ni vosa tiko mai. Au kerea ga ke rawa ni wilika e dua na tikinivolatabu se me vakamacala.”

 Oti ga vakalailai qai vosa mai o Edith. E vosa vakamalua qai kaya: “Au a vinakata tiko meu vosa vei iko. Au dua na iVakadinadina i Jiova. Au sa malumalumu tu vakayalo me 40 na yabaki.”

 E kidacala sara ga o Jennie. E tukuna, “O iko na taciqu!” Oti qori, rau qai veitagicaki.

 E solia sara o Ed vei Edith na brochure Mo Lesu Vei Jiova. Oti e vica na macawa, e raica o Ed kei Jennie na veisau vei Edith. E kaya o Ed, “E liu keirau dau rogoca e domona ni rarawa. Ia qo e sa mamarau.” E volekati Jiova tale o Edith, ena gauna qo e sa dua tale na dautukutuku gugumatua. E papitaiso o watina me iVakadinadina i Jiova ena Julai 2022.

 Ni vakasamataka lesu o Ed na nona rai me baleta na vunau ena talevoni, e dau nanuma na nodrau veitalanoa kei Tyrone. Ni wilika oti o Ed na Joni 6:44, e vakamacalataka sara vua ni o Jiova e vagolei keda mai ina dina. E duavata kei koya o Tyrone, qai kaya: “Au waraka sara tiko ga nomu qiri.” E marau tale ga o Jennie, ni rau doudou vakaveiwatini me rau vunau ena talevoni. E kaya, “O Jiova ena vakalougatataki keda nida qarava na itavi eda nanuma ni dredre.”