Me vaka ga na veivanua tale eso, dua na ka na tubu ni kedra iwiliwili na itabaqase e Ositerelia. Eso vei ira qori era sa lai tiko ena vale e vakarautaki vakatabakidua vei ira na malumalumu. Dua na ka nodra veivuke o ira na cakacaka ena vanua qori, era vakarautaka tale ga na ka mera bula kina na itabaqase e veisiga.

E levu na itabaqase era tiko ena vale ni malumalumu era vinakata tale ga mera kauaitaki vakayalo. Ena so na gauna ena rairai vakavucesa tu vei ira na bula, galili, ra qai nanuma ni sega ni dua e vukei ira. E dau veivakacegui qai vakanuideitaki ira na nodra dau veisiko yani na iVakadinadina i Jiova ena rua na vale ni malumalumu e toka e Portland ena tauni e Victoria, mai Ositerelia.

Era sota na mataveitacini e kea kei na dua na ilawalawa itabaqase era vakaitikotiko ena vale ni malumalumu mera veivosakitaka mai na iVolatabu na ka e yaco ena gauna i Jisu. E kaya o Jason: “Keimami na wilika vata kei ira na itabaqase e dua na wase ni iVolatabu, oti keimami qai veivosakitaka.” E levu vei ira qori era tautauvimate, era tu vakarau gona na iVakadinadina mera vakamacalataka vei ira na inuinui qai vakayaloqaqataki ira me baleta na yalayala ni Kalou ni na vakaotia na tauvimate kei na mate.

E kaya o Tony e dua na iVakadinadina i Jiova: “E veimama ga na aua na neimami veisiko, ia era vinakata na itabaqase me keimami tiko tale. Sa qai dau toso me dua sara na aua, e kaya kina e dua na bubu ni via tomana na veivosaki me dua tale na aua!” Eso vei ira na itabaqase era mataboko, so tale era sa davo tu ga, eso tale era sega ni rawa ni qumia vinaka na ka. Ia era tu vakarau na iVakadinadina mera vukei ira ena ka e veivosakitaki, era uqeti ira tale ga mera vakaitavi ena veivosaki ena kena levu era vinakata.

E okati tale ga ena nodra veisiko na iVakadinadina mera lagata eso na sere kei ira na itabaqase ena nodra vakacaucau vua na Kalou. E levu na gauna era na vinakata na itabaqase mera lagata eso tale na sere. Dua na tutu na yacana o John *, e kaya: “Keimami taleitaka na sere oni dau lagata. E vukei keimami me keimami kila, qai doka na Kalou.” O Judith e dua na bubu mataboko, e katona na qaqanisere kece e taleitaka!

Era kauaitaka vakalevu na iVakadinadina na nodra bula yadua na itabaqase. E kaya o Brian e dua na iVakadinadina i Jiova a bolecakacaka ena nodra vukei na itabaqase, ke ra sega ni bula vinaka tu na itabaqase era na veisiko sara ga na iVakadinadina ena nodra rumu. E kaya tale ga: “Keimami na vosa vei ira, qai saga me keimami kila na lomadra. Ena so na gauna keimami na gole ena siga e tarava me keimami kila sa vakacava na kedra ituvaki.”

Era dau taleitaka e levu na itabaqase era tiko ena vale ni malumalumu na nodra veisiko na iVakadinadina i Jiova. Dua vei ira na tiko wasoma ena veivosaki qori o Peter, e kaya: “Au dau rai vakanamata ina siga mera gole mai kina.” E kaya o Judith vua e dau qaravi koya: “Siga Vukelulu nikua! Kerekere vakarautaki au rawa ena vuli iVolatabu. Au sega ni via bera!”

Era taleitaka na itabaqase na ka era vulica, era vakila tale ga nira toro voleka vua na Kalou. Ni oti nodra veivosakitaka e dua na ka a vakavulica o Jisu, e kaya Robert: “Au a sega tu ni kila na ibalebale ni italanoa qori ena iVolatabu. Ia qo au sa kila!” E vulica tale ga o David na bibi ni masu, e kaya: “Na masu e vukei au meu veitokani kina kei na Kalou, au vakadinadinataka tale ga ni bula dina o koya.”

Era marautaka vakalevu na itabaqase na nodra sa mai kila na inuinui e tukuni tu ena iVolatabu me baleta na veigauna se bera mai. E kaya o Lynette me baleti ira na iVakadinadina i Jiova: “Vinaka vakalevu na nomuni mai wasea na itukutuku veivakacegui ena iVolatabu.” E kaya e dua tale na bubu: “E talai kemuni sara ga mai na Kalou!”

Na levu ni nona taleitaka o Margaret na veisiko qori, sa gole wasoma ena na nodra soqoni na iVakadinadina i Jiova ena nodra Vale ni Soqoni. E ka ni sasaga dina vua, baleta na kena ituvaki vakayago, e sega ni rawa tale ga ni veitosoyaki vakalevu. E kaya me baleti ira na iVakadinadina: “Oni vukei keimami sara ga me keimami raica ni vakainaki na bula.”

Era marautaka na cakacaka ena vanua qori na nodra dau veisiko yani na iVakadinadina. E kaya o Anna, e dua na iVakadinadina i Jiova: “Era dau uqeti ira na itabaqase o ira na cakacaka ena vale ni malumalumu mera dau tiko ena vuli baleta nira raica nira dau mamarau na itabaqase ni oti na vuli.” E kaya o Brian, sa cavuti oti mai: “Era dau yalovinaka qai veitokoni o ira era cakacaka ena vale ni malumalumu. Era yalorawarawa tale ga ni veivuke.”

Era marautaka na wekadra na tiko ena vale ni malumalumu na nodra taleitaka vakalevu na itabaqase na veivosaki kei ira na iVakadinadina. E kaya kina e dua na yalewa me baleta nona veimaliwai o tinana kei ira na iVakadinadina: “E talei dina na ka oni cakava tiko vei tinaqu.”