Ni keimami vulica na iVolatabu keimami vakayagataka e levu na vakadewa. Ia keimami marautaka vakalevu ni vakayagataka na Vakadewa ni Vuravura Vou ni volai kina na yaca ni Kalou, e donu, qai matata.

•   Volai kina na yaca ni Kalou. Eso era tabaka na iVolatabu era sega ni rokovi koya e vakavuna na kena volai. Kena ivakaraitaki, e volai ena dua na vakadewa na yacadra e sivia na 70 vakacaca era veitokoni ena kena tabaki. Ia na iVolatabu vata qori e sega sara ga ni volai kina na yaca ni Kalou o Jiova, o koya e vakavuna!

   E duidui sara na Vakadewa ni Vuravura Vou ni volai kina na yaca ni Kalou ena vica vata na udolu na vanua me vaka e laurai ena ilavelave taumada ni iVolatabu. E sega tale ga ni volai kina na yacadratou na lewe ni komiti e vakarautaka na vakadewa qori.

•   Donu. Na vakadewa kece e sega ni vakadewataka vakadodonu na ka e volai ena ilavelave taumada ni iVolatabu. Kena ivakaraitaki, e volai ena dua na vakadewa na Maciu 7:13: “Dou curu ina matamata qiqo, ni rabailevu na matamata i eli qai rawarawa na kena sala.” Ia na ilavelave taumada e volai kina na vosa “rusa,” sega ni “eli.” De dua era biuta na dauvakadewa na vosa “eli” nira vakabauta nira na vakararawataki tawamudu na tamata ca ena bukawaqa i eli. E sega ni tokona na vakasama qori na iVolatabu. E donu gona na Vakadewa ni Vuravura Vou: “Dou curu ina matamata qiqo, ni rabalevu na matamata qai galala na sala e basika ina rusa.”

•   Matata. Na vakadewa vinaka e sega wale ga ni donu, ia e matata qai kilai rawarawa. Qo e dua na kena ivakaraitaki. E vakayagataka na yapositolo lotu vaKarisito o Paula ena Roma 12:11 e dua na matavosa. Ke vakadewataki vakadodonu, e kena ibalebale “me buebue na yalo.” Ia e sega ni vakaibalebale ena vosa vakavalagi na vakadewa qori. E vakadewataka gona vakarawarawa na Vakadewa ni Vuravura Vou me matata. E kaya ni dodonu me ‘uqeti keda na lotu vaKarisito na yalo tabu.’

 E duidui gona na vakadewa ni Vakadewa ni Vuravura Vou ni volai kina na yaca ni Kalou, e donu, qai matata. E sega tale ga ni volitaki. Rawa gona nira wilika na iVolatabu e vica vata na milioni ena nodra vosa ga, wili kina o ira na sega ni volia rawa e dua na iVolatabu.