Vakacava Keimami Vakasaurarataki Ira Eso Tale Mera Veisautaka Nodra Lotu?

SARAVA/ROGOCA

Sega. E tukuni ena neimami mekesini na Vale ni Vakatawa: “E sega ni dodonu mera vakasaurarataki eso mera veisautaka nodra lotu.” a Qo e vica na vuna keimami sega ni vakasaurarataki ira kina na lewenivanua:

O Jisu e sega ni vakasaurarataka e dua me ciqoma na nona ivakavuvuli. E kila nira na le lailai ga era na rogoca na nona itukutuku. (Maciu 7:13, 14) Ni ratou tarabe eso nona tisaipeli ena ka e tukuna, e sega ni via tarova o Jisu na nodratou biubiu.—Joni 6:60-62, 66-68.
E vakavulici ira nona imuri o Jisu mera kua ni vakasaurarataki ira eso tale mera veisautaka nodra vakabauta. Mera kua ni vakasaurarataki ira mera ciqoma na itukutuku vinaka ni Matanitu ni Kalou, mera vakasaqarai ira ga era via vulica na ka dina.—Maciu 10:7, 11-14.
Ena sega ni vakaibalebale ke dua e veisau ena voraki. Na Kalou e vakadonuya ga na sokalou e vu mai lomada.—Vakarua 6:4, 5; Maciu 22:37, 38.

Vakacava keimami veisautaka nodra lotu eso?

Me vaka e vakarota na iVolatabu, keimami dau wasea na itukutuku ena iVolatabu “ena veivanua yawa sara kei vuravura,” qori ena neimami “cakacaka vakavunau e veivale.” (Cakacaka 1:8; 10:42; 20:20) Me vakai ira ga na lotu vaKarisito taumada, eso tale ga na gauna keimami beitaki ni keimami veisautaka nodra lotu eso. (Cakacaka 18:12, 13) Ia e sega ni dina na veibeitaki qori. Keimami sega ni usuraka neimami vakabauta vua e dua. Ia keimami kila ni dodonu mera vakatulewa ga vakataki ira ena ka dina era sa mai kila.

Keimami sega ni vakasaurarataki ira na lewenivanua mera veisautaka na nodra lotu, vakaitavi ena politiki ena veivakamuai ni lotu, se keimami veivuke vakayago se soli ilavo mera rawai kina e levu. Qo e duidui sara mai ena nodra kaya eso nira lotu vaKarisito, ia era beci Jisu ena ka era cakava. b

Vakacava e tu vua e dua na dodonu me veisautaka nona lotu?

E sega ni muria na parofita o Eparama na ivakarau ni nodra sokalou na wekana

Io. E kaya na iVolatabu ni tu vei keda na dodonu meda veisautaka noda lotu. E volai kina na kedra itukutuku e levu era vakatulewataka mera kua ni muria na ivakarau ni sokalou era dau cakava tu na wekadra. Era vakayagataka nodra galala ni vakatulewa mera sokaloutaka na Kalou dina. Kena ivakaraitaki, o Eparama, Ruci, eso na kai Aceni, kei na yapositolo o Paula. (Josua 24:2; Ruci 1:14-16; Cakacaka 17:22, 30-34; Kalatia 1:14, 23) E tukuna mada ga na iVolatabu eso era vakatulewa cala mera vakanadakuya na sokalou e vakadonuya na Kalou.—1 Joni 2:19.

E tokona na Yavu ni Lawatu ni Noda Dodonu na Lewenivanua na noda rawa ni veisautaka na noda lotu. E vakatoka na Matabose kei Vuravura me “yavu ni lawa ni dodonu ni lewenivanua e veiyasa i vuravura.” E tukuni ena lawa qori ni tu vei keda kece na dodonu meda “veisautaka noda lotu se vakabauta.” Eda rawa tale ga ni “qara, ciqoma se vakavulica na itukutuku vei ira eso tale,” e okati kina na ivakavuvuli ni lotu. c Qori e wili tale ga kina na noda doka na nodra dodonu eso tale era sega ni via veisautaka nodra lotu, ra qai sega ni vakabauta na ivakavuvuli era sega ni duavata kina.

Eda sega ni doka noda vuvale se itovo vakavanua nida veisautaka noda lotu?

Sega. E uqeti keda na iVolatabu meda dokai ira kece na lewenivanua se mani lotu cava era lewena. (1 Pita 2:17) Keimami muria tale ga na iVakadinadina i Jiova na ivakaro ni iVolatabu me keimami dokai ira neimami itubutubu, ke duatani na lotu era lewena.—Efeso 6:2, 3.

Ia e levu era sega ni duavata kei na rai ni iVolatabu. E kaya e dua na yalewa e susu e Zambia: “Ena noqu itikotiko, ena okati e dua me sega ni daudina . . . Ke veisautaka na nona lotu. E vaka ga e liumuritaka na nona vale se vanua e cavutu mai kina.” Qori sara ga na ka e sotava na yalewa qo ena gauna se itabagone kina. E vulica na iVolatabu kei ira na iVakadinadina i Jiova, mani vakatulewataka me veisautaka nona lotu. E kaya: “Rau dau tukuna wasoma vei au na noqu itubutubu ni rau sega ni taleitaka na ka au cakava, qai vakamadualaki rau. E mosimosi dina, baleta niu dau vakamareqeta na nodrau veivakadonui. . . . Noqu digia meu dina vei Jiova, qai sega ni muria na ivakarau ni lotu keitou cakava tu mai, e sega ni kena ibalebale niu beca noqu vuvale.” d

a Raica na ilavelave ni Vale ni Vakatawa Janueri 1, 2002, tabana e12, parakaravu 15.

b Kena ivakaraitaki, rauta na 785 G.V., e vakarota o Charlemagne mera vakamatei o ira na lewenivanua era sega ni via papitaiso mera lotu vaKarisito e Saxony, mai Jamani. Ena 1555 G.V., e sainitaka tale ga na Peace of Augsburg e dua na veidinadinati kei na ito ena Matanitu Tabu Vakaroma, mera lotu Katolika se lotu Lutheran o ira na iliuliu ni vanua. Mera lewena tale ga na lotu qori o ira na kena lewenivanua. Era na vakatalai ena dua tale na matanitu ke ra sega ni via lewena na lotu qori.

c E tiko tale ga na dodonu qori ena isoqosoqo na African Charter on Human and Peoples’ Rights, na American Declaration of the Rights and Duties of Man, na 2004 Arab Charter on Human Rights, na ASEAN (Association of Southeast Asian Nations) Human Rights Declaration, na European Convention on Human Rights, kei na International Covenant on Civil and Political Rights. Ia o ira mada ga na matanitu era kaya nira solia tiko na dodonu qori, e duidui na ka era cakava mera vakarautaka kina.

d E tukuni ena iVolatabu ni yaca ni Kalou dina o Jiova.