Sega. Keimami dau vakaitavi vakalevu ena vunau e veivale, ia keimami sega ni vakabauta ni qori ena vakabulai keimami. (Efeso 2:8) Na vuna?

 Vakasamataka mada qo: E dua na turaga yalovinaka e yalataka me na solia na iloloma isau levu vei ira kece na yaco yani ena kena gauna donu ena vanua e tukuna. Ke o vakabauti koya na turaga qori, vakacava o na vakamuria na idusidusi e tukuna? Sega ni vakabekataki, o na cakava vaka kina! O na rairai tukuna tale ga vei ira na nomu itokani kei na nomu vuvale, me rawa ni ratou vakailoloma tale ga. Ia nomu muria na idusidusi e sega ni vakadeitaka ni o na taura na iloloma. O taura ga na iloloma qori ni a vinakata me solia vei iko na turaga yalovinaka oya.

 E tautauvata vinaka qori kei na neimami vakabauta na iVakadinadina i Jiova, ni yalataka na Kalou na bula tawamudu vei ira na talairawarawa vua. (Roma 6:23) Keimami tukuna vei ira eso tale na neimami vakabauta, me yaga tale ga vei ira na vosa ni yalayala ni Kalou. Ia keimami sega ni vakabauta ni na vakabulai keimami na neimami cakacaka vakaitalatala. (Roma 1:17; 3:28) Eda na sega ni rawata vakataki keda na veivakalougatataki ni Kalou. “E vakabulai keda ena vuku ni nona yalololoma, sega ena vuku ni ka vinaka eda cakava.”—Taito 3:5, Contemporary English Version.