Na Cava e Kaya na iVolatabu me Baleta na Matedewa?
Kena isau vakaivolatabu
E parofisaitaka na iVolatabu ni na yaco na tauvimate (na tete ni matetaka, wili kina na matedewa) ena iotioti ni veisiga. (Luke 21:11) Qori e sega ni itotogi ni Kalou. Ia sa voleka qo ni vakayagataka na Kalou na nona Matanitu me vakaotia na tauvimate kece, wili kina na matedewa.
Sa parofisaitaka tu na iVolatabu na matedewa?
E sega ni parofisaitaki ena iVolatabu na yaca ni matedewa, se tauvimate me vaka na COVID-19, AIDS, se na Spanish flu. Ia e parofisaitaka ga na yaco ni “matedewa” kei na “mate rerevaki.” (Luke 21:11; Vakatakila 6:8) Era okati qori me ivakatakilakila ni “iotioti ni veisiga,” e kilai tale ga me “ivakataotioti ni veika vakavuravura.”—2 Timoci 3:1; Maciu 24:3.
Sa bau veitotogitaki oti na Kalou ena tauvimate?
E volai ena iVolatabu e vica na ituvaki e vakayagataka kina na Kalou na tauvimate me totogitaki ira na kina na tamata. Kena ivakaraitaki, e vakavuna mera vukavuka eso. (Tiko Voli Mai na Lekutu 12:1-16; 2 Tui 5:20-27; 2 Veigauna 26:16-21) Ena ituvaki qori, e sega ni tete na matedewa vei ira na sega na nodra cala, ia e totogitaki ira ga eso na Kalou mera tauvimate nira beca nona lawa.
E itotogi ni Kalou na veitauvi ni matedewa ena gauna qo?
Sega. Eso era kaya ni vakayagataka na Kalou na matedewa kei na tauvimate me totogitaki ira kina na tamata nikua. Ia e sega ni tokona qori na iVolatabu. Na vuna?
Dua oya nira dau tauvimate tale ga na tamata ni Kalou ena gauna makawa, kei na gauna qo. Kena ivakaraitaki na gonetagane yalodina o Timoci, e ‘tauvi koya tale ga e dua na mate.’ (1 Timoci 5:23) Ia e sega ni tukuna na iVolatabu ni cudruvi koya na Kalou. Era dau tauvimate tale ga nikua na tamata ni Kalou. Levu na gauna e dau yaco qori nira tu ena vanua kei na gauna cala.—Dauvunau 9:11.
Koya e bibi sara, e kaya na iVolatabu ni se bera na gauna me totogitaki ira kina na tamata ca na Kalou. Ia eda se donuya tu qo na “siga ni veivakabulai”—ni se sureti ira tiko na tamata kece na Kalou mera volekati koya me rawa nira bula. (2 Korinica 6:2) Dua na sala e cakava kina qori oya na kena kacivaki e veiyasa i vuravura na “itukutuku vinaka . . . ni Matanitu ni Kalou.”—Maciu 24:14.
Ena oti na matedewa?
Io. E parofisaitaka tu na iVolatabu ni sa voleka na gauna me oti kina na tauvimate. Ena vakaotia na Kalou na tauvimate kece ena gauna sa na liutaka kina na vuravura na nona Matanitu. (Aisea 33:24; 35:5, 6) Ena vakaotia na rarawa, na mosi kei na mate. (Vakatakila 21:4) Ena vakabulai ira tale mai na mate ena ibulubulu mera marautaka na bula uasivi e vuravura ni sa na sega na tauvimate.—Same 37:29; Cakacaka 24:15.
Tikinivolatabu me baleta na matedewa
Maciu 4:23: “E qai lakova o Jisu na yasayasa taucoko o Kalili me veivakavulici ena nodra valenilotu, me vunautaka na itukutuku vinaka ni Matanitu, me vakabulai ira tale ga na lewenivanua ena veimataqali mate e tauvi ira kei na malumalumu kece.”
Kena ibalebale: Na nona cakamana e vuravura o Jisu e dua ga na ivakaraitaki lailai ni ka ena vakarau cakava na Matanitu ni Kalou vei keda.
Luke 21:11: “Era na yaco . . . na matedewa.”
Kena ibalebale: Na levu ni tauvimate e ivakatakilakila ni iotioti ni veisiga.
Vakatakila 6:8: “Au raica sara e dua na ose vulaci, o koya e vodo tiko kina e yacana o Mate. E muri koya voleka tiko o Bulubulu. E soli vei rau me rau lewa . . . me rau veivakamatei ena . . . mate rerevaki.”
Kena ibalebale: Na parofisai me baleti ratou na va na dauvodo ose ena Vakatakila e dusia ni na yaco ena gauna qo na matedewa.
Rawa ni o Wilika Tale ga
NA VALE NI VAKATAWA
Na Rarawa—E iTotogi ni Kalou?
Vakacava e itotogi ni Kalou vei ira na valavala ca na tauvimate se leqa e yaco tu ena gauna qo?
ESSENTIAL BIBLE TEACHINGS
Na cava e Vakatara Tiko Kina na Kalou na Rarawa?
Levu era vakataroga na cava sa rui levu kina na veicati kei na rarawa. E tiko ena iVolatabu na kena isau veivakacegui.
NA VALE NI VAKATAWA
Gauna Cava ena Yaco Kina na Veivakarusai? Ka e Tukuna o Jisu
O vakadinadinataka ni sa yaco tu nikua na veika e tukuna qori o Jisu?
SAUMI NA TARO VAKAIVOLATABU
Cava na iVakatakilakila ni “iOtioti ni Veisiga” se “Gauna ni iCavacava”?
E parofisaitaka na iVolatabu ni levu na ka ena yaco vata ga ena dua na gauna.
SAUMI NA TARO VAKAIVOLATABU
Na Cava ena Cakava na Matanitu ni Kalou?
Dikeva na ka meda namaka ni sa veiliutaki na Matanitu ni Kalou e vuravura.
IVAKAVUVULI VAKAIVOLATABU
Tovolea na Vuli Qo
Na vuli iVolatabu qo ena sega ni saumi qai tiko e dua mo drau na veivosakitaka na iVolatabu.