Na veivosoti e okati kina noda vosoti koya e cala. Na vakadewa vaKirisi ni “veivosoti” ena iVolatabu, e kena ibalebale na nona “guilecava” e dua na cala e caka vua. Ni vakavulici ratou nona imuri o Jisu, e vakayagataka na vakatautauvata qo: “Ni vosota na neimami valavala ca, ni keimami sa vosoti ira kece era cala vei keimami.” (Luke 11:4) Me vaka na vakatautauvata ni dauveiqaravi tawayalololoma, e vakatauvatana o Jisu na veivosoti ina kena bokoci na dinau.—Maciu 18:23-35.

 Noda guilecava na cala e caka vei keda kei na noda sega ni sauma na ca, e vakaraitaka nida veivosoti. E tukuna na iVolatabu, ni yavu ni veivosoti dina na loloma, baleta “e sega ni katona na ca.”—1 Korinica 13:4, 5.

Na veivosoti e sega ni

•   Vakadonuya na cala. sega ni duavata na iVolatabu kei na rai, ni cala e yaco e sega ni dua na kena leqa.—Aisea 5:20.

•   Vakalecalecava na ka e yaco. E vosoti Tui Tevita o Jiova ena cala bibi e cakava, ia e sega ni taqomaki koya mai na kena revurevu. E volatukutukutaka kina o Jiova na ka e cakava o Tevita meda vuli kina nikua.—2 Samuela 12:9-13.

•   Vakalaiva eso tale mera rawaka vei iko. Kena ivakaraitaki, e dua e dinau vei iko, e vakasabusabutaka qai sega ni rawa ni sauma lesu me vaka e yalataka. E kere veivosoti. O rawa ni vosoti koya ni o sega ni katona na ca, o na sega ni kauta cake tiko ga mai na dinau, o na tukuna mada ga me kua ni sauma. Ia, o rairai vakatulewataka me kua ni dinau tale vei iko.—Same 37:21; Vosa Vakaibalebale 14:15; 22:3; Kalatia 6:7.

•   Tukuni me sega na kena yavu. O Jiova e sega ni vosoti ira era nakita nodra cala, era cala bibi ra qai sega ni vakaraitaka vakadodonu, era sega ni veisautaka nodra ivalavala, se ra sega ni kere veivosoti ena cala era cakava. (Vosa Vakaibalebale 28:13; Cakacaka 26:20; Iperiu 10:26) O ira qori era vakatokai mera meca ni Kalou, e vinakata o koya meda kua ni vosoti ira me vaka ga nona sega ni vosoti ira.—Same 139:21, 22.

   Vakacava ke dua e vakalolomataki iko qai sega ni kere veivosoti se me tukuna ni cala o koya? E veivakasalataki na iVolatabu: “Mo biuta na cudru qai vakanadakuya na katakata.” (Same 37:8) Ke o vakadinata ni o cala, o na sega ni cudru tale tiko. Nuitaka na Kalou ni na lewai koya e cala. (Iperiu 10:30, 31) E veivakacegui dina ni na yaco na gauna sa na sega tale ni vakilai na rarawa se na mosi eda vakila ena gauna qo.—Aisea 65:17; Vakatakila 21:4.

•   Mo “veivosoti” ena veigauna. Eso na gauna ena sega ni gadrevi meda kere veivosoti, meda tukuna ga vakadodonu nida cala. E kaya na iVolatabu: “Mo kua ni cudru totolo, ni tiko na cudru e lomaseredra na lialia.”—Dauvunau 7:9, ivakamacala e ra.

Mo veivosoti vakacava

1.   Nanuma na ka e okati ena veivosoti. O sega ni vakadonuya na cala, o vakadinata ni yaco dina, qai guilecava.

2.   Kila na yaga ni veivosoti. Ni o sega ni dau cudru se katona na ca ena vukei iko mo yalomalua, o na bulabula, o na marau tale ga vakalevu. (Vosa Vakaibalebale 14:30; Maciu 5:9) O koya e bibi sara, ena vosoti iko na Kalou.—Maciu 6:14, 15.

3.   Mo veinanumi. Eda ivalavala ca kece. (Jemesa 3:2) Eda dau marautaka ni dua e vosoti keda, meda cakava tale ga qori vei ira na cala vei keda.—Maciu 7:12.

4.   Mo yalorawarawa. Nida dau didivaka eso na ka lalai, meda muria mada ga na ivakavuvuli vakaivolatabu qo: “Moni dau yalorawarawa.”—Kolosa 3:13.

5.   Kua ni lokuyara. Mo veivosoti vakatotolo ena gauna ga e yaco kina na leqa, ni o cakava qori o na sega kina ni dau cudru totolo.—Efeso 4:26, 27.