Eso na masu e sega ni rogoca na Kalou. Raica mada e rua na vuna ena sega ni rogoca kina na Kalou na nona masu e dua.

1. Na ka e masulaka e sega ni salavata kei na loma ni Kalou

 Ena sega ni rogoca na Kalou na masu e sega ni salavata kei na lomana, se ka e vinakata e volai tu ena iVolatabu. (1 Joni 5:14) Kena ivakaraitaki, e vakaroti keda na iVolatabu meda kua ni dau kocokoco. Na veimauilavo e uqeta na kocokoco. (1 Korinica 6:​9, 10) Koya gona, ena sega ni rogoci iko na Kalou ke o masulaka mo qaqa ena veimauilavo. Na Kalou e sega ni kalouvu me cakava na ka kece o vinakata. Meda kua ni rarawataka na tikina qori. Ke rogoca na Kalou na masu kece, vakasamataka mada na ka ena yaco ke rogoca na nodra masu na daucaka ca.—Jemesa 4:3.

2. E nakita me talaidredre

 Na Kalou e sega ni rogoca na nodra masu na beca na nona lawa. Kena ivakaraitaki, e tukuna na Kalou vei ira na sokaloutaki koya ra qai sega ni talairawarawa vua: “Oni masu vakalevu, ia au sega ni rogoca, ni lomoci na ligamuni ena dra.” (Aisea 1:15) Io, ke ra veisautaka nodra ivakarau ra qai “veivosaki vakadodonu” kei na Kalou, ena rogoca na nodra masu.—Aisea 1:18.