Na veivakararawataki levu ya na gauna dredre duadua eda na vakila na kawatamata. E parofisaitaka na iVolatabu ni na yaco qori ena “iotioti ni veisiga,” se na “gauna ni icavacava.” (2 Timoci 3:1; Taniela 12:4, New American Bible) Ena gauna ya ena “qai yaco na veivakararawataki ena ivakatagedegede e sega ni bau vakilai vakadua me tekivu mai na nona bulia na vuravura na Kalou, ena sega tale ga ni yaco e muri.”—Marika 13:19; Taniela 12:1; Maciu 24:21, 22.

Ka ena yaco ena veivakararawataki levu

•   Vakarusai o lotu lasu. Ena vakasauri ga nona vakarusai o lotu lasu. (Vakatakila 17:1, 5; 18:9, 10, 21) Na veiliutaki vakapolitiki e vakatakarakarataka na Matabose kei Vuravura ena vakayacora na loma ni Kalou ni vakarusai lotu lasu.—Vakatakila 17:3, 15-18. a

•   Vakatotogani na lotu dina. Na nona raivotu o Isikeli me baleti “Koki ena vanua o Mekoki,” e vakatakarakarataka na matanitu cokovata ena saga me vaqeavutaka na lotu dina. Ia ena taqomaki ira nona dauveiqaravi na Kalou mera kua ni vakarusai.—Isikeli 38:1, 2, 9-12, 18-23.

•   Era na lewai na lewe i vuravura. Ena lewai ira kece na kawatamata o Jisu, “qai tawasei ira na lewenivanua me vaka ga na nona dau tawasei ira na sipi mai na me na ivakatawa.” (Maciu 25:31-33) Na lewa qori e vakatau sara ga ena noda tokoni ira na ‘taci’ Jisu era na lai veiliutaki vata kei koya i lomalagi.—Maciu 25:34-46.

•   Kumuni o ira na veiliutaki ena Matanitu ni Kalou. O ira na yalodina era na digitaki mera lai veiliutaki kei Jisu era na vakacavara nodra veiqaravi e vuravura, era na vakaturi ina bula i lomalagi.—Maciu 24:31; 1 Korinica 15:50-53; 1 Cesalonaika 4:15-17.

•   Amaketoni. Na “ivalu ni siga levu ni Kalou Kaukaua Duadua” e kilai tale ga me “siga i Jiova.” (Vakatakila 16:14, 16; Aisea 13:9; 2 Pita 3:12) O ira era lewai vakaukaua vei Jisu era na vakarusai. (Sefanaia 1:18; 2 Cesalonaika 1:6-10) Qori e okati tale ga kina na kena vakarusai taucoko na isoqosoqo vakapolitiki ni vuravura qo, e vakatakarakarataka na vitu na ulu ni manumanu kila e vakamacalataki ena iVolatabu.—Vakatakila 19:19-21.

Ka ena yaco ni oti na veivakararawataki levu

•   Vesu o Setani kei ira na timoni. E dua na agilosi cecere e kolotaki Setani kei ira na timoni “ina qara e sega ni vakabotona.” Kena ibalebale, ena sega ni dua na ka ena caka rawa ena vanua qori. (Vakatakila 20:1-3) Na ituvaki sa na tu kina o Setani ena qara sega ni vakabotona, e vaka ga e dua e tu e valeniveivesu, qai sega ni rawa ni veivakamuai ina dua tale na vanua.—Vakatakila 20:7.

•   Tekivu na Duanaudolu na yabaki. Ena tekivu veiliutaki na Matanitu ni Kalou me 1,000 na yabaki, ena kauta vata mai na veivakalougatataki vei ira na kawatamata. (Vakatakila 5:9, 10; 20:4, 6) Na “isoqosoqo levu” e sega ni wiliki rawa era na “bula sivia na veivakararawataki levu,” ra qai raica tale ga na kena vakarau tekivu veiliutaki ena vuravura qo na Matanitu ni Kalou me Duanaudolu na yabaki.—Vakatakila 7:9, 14; Same 37:9-11.