Sega. E sega ni tukuni ena iVolatabu ni ca na ilavo, se vakavuna na veika ca. Na ivosavosa kilai levu ni “ka ca e vu mai na ilavo,” e yavutaki ena dua na tikinivolatabu e cavuti umauma ga, sega ni wiliki taucoko. Ia e kaya na iVolatabu ni “ka ca e vu mai na lomani ni ilavo.” a—1 Timoci 6:10, King James Version, neitou na matanivola kata.

•  Cava e kaya na iVolatabu me baleta na ilavo?

•  Cava e veivakasalataki kina na iVolatabu me baleta na lomani ni ilavo?

•  Ena yaga vakacava na ivakasala vakaivolatabu me baleta na ilavo?

•  Tikinivolatabu me baleta na ilavo

 E kaya na iVolatabu e yaga na ilavo ke vakayagataki vakavuku, e rawa sara mada ga ni “itataqomaki.” (Dauvunau 7:12) Kuria ya, na iVolatabu e vakacaucautaki ira na dau lomasoli, rairai okati kina nodra dau soli ilavo me iloloma.—Vosa Vakaibalebale 11:25.

 Ia e veivakasalataki tale ga na iVolatabu me qarauni me kua ni vakaliuci na ilavo ena noda bula. E kaya: “Me kua ni laurai ena nomuni bula ni oni lomana na ilavo, ni lomavakacegu ga ena ka e sa tiko vei kemuni.” (Iperiu 13:5) Eda vulica kina meda vakayagataka ga vakavuku na ilavo, me kua ni qarai kina na bula vutuniyau. Koya gona meda lomavakacegu ga ena ka eda gadreva dina me vaka na kakana, isulu kei na vale.—1 Timoci 6:8.

 Era na sega ni rawata na bula tawamudu na tamata kocokoco. (Efeso 5:5) Na kocokoco e okati me qaravi matakau, se sokalou lasu. (Kolosa 3:5) Dua tale oya nodra saga mera vakaceguya ga na ka era vinakata, era sega kina ni muria na ivakavuvuli vinaka. E kaya na Vosa Vakaibalebale 28:20: “O koya e kusava me vutuniyau ena sega ni dina tiko ga.” Era na rawa ni temaki mera basulawa, me vaka nodra kovea na ka, tauri vakavesu, veidabui, veivaqumi, se laba.

 Ke sega mada ga ni tini ena itovo ca na lomani ni ilavo, ena tiko ga na ka ca e rawa ni yaco kina. E kaya na iVolatabu “o ira na qara na bula vutuniyau era na temaki, era na coriti, ena curumi ira tale ga e levu na gagadre ca e veivakaleqai.”—1 Timoci 6:9.

 Ke da muria na ka e dodonu kei na ka e vakamarautaki Jiova ena vuku ni ilavo, eda na dokai, ena vakadonui keda na Kalou, ena tokoni keda tale ga. E yalataka na Kalou vei ira e vu dina mai lomadra mera vakamarautaki koya: “Au na sega sara ni laivi iko, au na sega tale ga ni biuti iko.” (Iperiu 13:5, 6) E vakadeitaka tale ga ni “tamata yalodina ena vakalougatataki vakalevu.”—Vosa Vakaibalebale 28:20.