IVAKAMACALA NI TIKINIVOLATABU

Joni 3:16—“Na Levu ni Nona Lomani Vuravura na Kalou”

SARAVA/ROGOCA

“Na levu ni nona lomani vuravura na Kalou e solia kina na Luvena e duabau ga e bulia, mera kua ni rusa kina o ira na vakaraitaka nodra vakabauti koya, mera rawata ga na bula tawamudu.”—Joni 3:16, Vakadewa ni Vuravura Vou.

“Ni sa lomani ira na kai vuravura vakaoqo na Kalou, me solia kina na Luvena e dua bauga sa vakatubura, me kakua ni rusa ko ira yadua era sa vakabauti koya, me ra rawata ga na bula tawa mudu.”—Joni 3:16, King James Version.

iBalebale ni Joni 3:16

E lomani keda na Kalou qai vinakata meda bula tawamudu. Qori na vuna e tala mai kina e vuravura na Luvena, o Jisu Karisito. E levu sara na ka bibi e rawata o Jisu ni se bula voli e vuravura. Dua oya ni vakavulica na veika me baleta na Kalou na Tamana vei ratou na nona imuri. (1 Pita 1:3) Dua tale oya ni solia na nona bula ena vukudra na kawatamata. Me rawa nida bula tawamudu, e bibi meda vakabauti Jisu.

E laurai na levu ni nona loloma na Kalou ena matavosa “e solia na Luvena e duabau ga.” a E duatani duadua na Luvena o Jisu Karisito. Ena sala cava? Ni buli Jisu duadua ga na Kalou. (Kolosa 1:17) O koya “na ulumatua ni kabuli kece.” (Kolosa 1:15) Era mai buli na veika bula kece, wili kina o ira na agilosi ena veivuke i Jisu. Ia e yalorawarawa o Jiova b me tala mai na Luvena lomani me mai ‘veiqaravi me solia tale ga na nona bula me kedra ivoli e le levu.’ (Maciu 20:28) E mai vakararawataki qai mate o Jisu me rawa ni vakabulai keda mai na ivalavala ca kei na mate. Qori e vakadewa mai vei keda na imatai ni tamata, o Atama.—Roma 5:8, 12.

E levu tale na ka e okati ena noda vakaraitaka nida vakabauti Jisu, se na noda kila na ka e cakava ena vukuda. E dodonu meda vakaraitaka na noda vakabauta na Luve ni Kalou ena noda talairawarawa vua qai muria na we ni yavana. (Maciu 7:24-27; 1 Pita 2:21) E kaya na iVolatabu: “Ena bula tawamudu o koya e vakaraitaka ni vakabauta na Luvena, o koya e talaidredre vua na Luvena ena sega ni vakabulai.”—Joni 3:36.

iKotokoto ni Joni 3:16

E cavuta na veivosa qori o Jisu ni vosa tiko vua e dua na iliuliu ni lotu vakaJiu o Nikotimo. (Joni 3:1, 2) E cavuta tale ga ikeri o Jisu na veika me baleta na Matanitu ni Kalou c kei na noda “sucu tale.” (Joni 3:3) E parofisaitaka tale ga na sala ena mate kina, ni kaya: “E dodonu gona me laveti cake na Luve ni tamata [vakoti ena kau], mera bula tawamudu kina o ira kece na vakabauti koya.” (Joni 3:14, 15) Sa qai vakabibitaka ni rawa ga nida mai rawata na bula, ena levu ni nona lomani keda na Kalou. Sa qai tukuna o Jisu, meda vakabulai, ena bibi meda vakaraitaka na vakabauta, qai salavata na noda ivalavala kei na ka e vinakata na Kalou.—Joni 3:17-21.

a Na vakadewa ni “duabau ga” ena vosa vaKirisi na monogenes, e kena ibalebale na “dua ga, . . . dua ga na kena mataqali, se e duatani duadua.”—A Greek-English Lexicon of the New Testament and Other Early Christian Literature, t. 658.

b O Jiova na yaca ni Kalou.—Same 83:18.

c Na Matanitu ni Kalou, e kilai tale ga me “Matanitu vakalomalagi,” e veiliutaki tiko mai lomalagi. (Maciu 10:7; Vakatakila 11:15) E lesi Karisito na Kalou me Tui ni Matanitu ni Kalou. Ena vakayagataka na Kalou na nona Matanitu me vakayacora na nona inaki me baleta na vuravura. (Taniela 2:44; Maciu 6:10) Mo rawa ni kila eso tale na ka, rai ena ulutaga “Na Cava na Matanitu ni Kalou?”