IVAKAMACALA NI TIKINIVOLATABU
Kolosa 3:23—“Na ka Kece Oni Cakava, ni Cakava ena Nomuni Vinaka Taucoko”
“Na ka kece oni cakava, ni cakava ena nomuni vinaka taucoko me vaka oni cakava tiko vei Jiova, sega vua na tamata.”—Kolosa 3:23, Vakadewa ni Vuravura Vou.
“Na ka kece o cakava, mo cakava ena nomu vinaka kece, me vaka o cakava tiko vua na Turaga, sega vua na tamata.”—Kolosa 3:23, New International Version.
iBalebale ni Kolosa 3:23
E dodonu me cakacaka vakaukaua na lotu Vakarisito, baleta e veisemati qori ena nona sokalou vua na Kalou o Jiova.
“Na ka kece oni cakava.” O ira na via qaravi Jiova era na muria na ka e kaya na iVolatabu ena ka kece era cakava. Era saga mera mamakutu, daudina, qai nuitaki ena ka era cakava e vale, vanua ni cakacaka, e koronivuli tale ga.—Vosa Vakaibalebale 11:13; Roma 12:11; Iperiu 13:18.
“Cakava ena nomuni vinaka taucoko.” Na matavosa “ena nomu vinaka taucoko,” e vakadewataki mai na vosa vaKirisi e kena ibalebale, “nona saga e dua me cakava ena nona igu taucoko na inaki ni Kalou.” a
O koya e dau cakacaka ena vakayagataka gona nona kaukaua kece, kei na nona vakasama me cakava vinaka kina nona itavi. E tukuni ena so tale na vakadewa ni iVolatabu me “vu mai lomamu” (New Catholic Bible), se “lomamu taucoko” (King James Version).—Raica “ Eso Tale na Vakadewa ni Kolosa 3:23.”
“Cakava tiko vei Jiova, sega vua na tamata.” Se mani cakacaka cava era cakava na lotu vaKarisito, e dodonu mera raica vakabibi ni vakatau kina nodra veiwekani kei na Kalou o Jiova. E bibi duadua vei ira mera vakamarautaki koya, sega ni nodra boso, se dua tale. Ni dua na lotu vaKarisito e cakacaka vakaukaua qai vinaka nona itovo, ena vinaka kina na kena irogorogo, e lagiti tale ga na Kalou e qarava. Ena cakava na ka kece e rawata “me kua ni vosavakacacataki kina na yaca ni Kalou kei na nona ivakavuvuli.”—1 Timoci 6:1; Kolosa 3:22.
Tikina Wavolita na Kolosa 3:23
E vola na yapositolo o Paula na ivola na Kolosa vei ira na lotu vaKarisito era tiko ena koro makawa o Kolosa. b E rairai vola rauta na 60-61 G.V., ni vakarau cava na imatai ni gauna e vesu kina e Roma.
E tu ena ivola qori na ivakasala e vukei ira na lotu vaKarisito era duikaikai, e duidui tale ga na ituvaki era sotava, me rawa nira qarava na Kalou ena duavata. (Kolosa 3:11) E uqeti ira mera vakasamataka nona itovo na Kalou, me vaka na loloma kei na yalovinaka. (Kolosa 3:12-14) E vakamacalataka tale ga na sala ena yaga kina ena nodra bula taucoko nodra qarava na Kalou.—Kolosa 3:18–4:1.
Eso Tale na Vakadewa ni Kolosa 3:23
“Ka kece o cakava, me vu mai lomamu, vaka ga o cakava tiko vua na Turaga, sega ni vei ira eso tale.”—New Catholic Bible.
“Na ka kece o cakava, solia kina na lomamu taucoko, ni o cakava tiko vua na Turaga, sega ni tamata.”—King James Version.
“Se mani cava o cakava [itavi cava ga o qarava], me vu mai lomamu [mo solia nomu vinaka taucoko], me [vaka ga o cakava] vua na Turaga sega vua na tamata.”—The Amplified Study Bible, nodratou na ikovu.
“Se itavi cava o qarava, cakava mai vu ni lomamu, me vaka ni o cakacaka tiko vua na Turaga, sega ni tamata.”—The New Testament in Modern English, by J. B. Phillips.
Sarava na ivakamacala lekaleka ni ivola na Kolosa.
Rawa ni o Wilika Tale ga
NA VALE NI VAKATAWA
Sala me Marautaki Kina na Cakacaka Vakaukaua
Dikeva eso na ivakasala yaga vakaivolatabu me marautaki kina na cakacaka, me veivakacegui tale ga.
VAKAMACALATAKI NA TIKINIVOLATABU
iVakamacala ni Filipai 4:6, 7—“Moni Kua ni Lomaocaocataka e Dua na Ka”
Na ivakarau ni masu cava ena vukei keda meda kua ni lomaleqa qai vakila na vakacegu?
IVAKAVUVULI VAKAIVOLATABU
iVukevuke ni Vuli iVolatabu
Digia na iwalewale ena rawa ni vukei iko me yaga, qai marautaki nomu vulica na iVolatabu.
IVAKAVUVULI VAKAIVOLATABU
Tovolea na Vuli Qo
Na vuli iVolatabu qo ena sega ni saumi qai tiko e dua mo drau na veivosakitaka na iVolatabu.
