“Au qai raica na lomalagi vou kei na vuravura vou, ni sa takali na lomalagi kei na vuravura a tu e liu, sa sega tale ga na wasawasa.”—Vakatakila 21:1, iVakadewa ni Vuravura Vou.

 “Au sa qai raica e dua na lomalagi vou kei na dua na vuravura vou, ka ni sa takali tani na lomalagi makawa kei na vuravura makawa, ka sa sega ni tiko tale na wasawasa.”—Vakatakila 21:1, New International Version.

 Na tikinivolatabu qori e vakayagataka na vosa vakatautauvata me vakamacalataka ni na sosomitaka na matanitu kece e vuravura na Matanitu ni Kalou. Ena vakarusai ira na tamata ca, qai liutaka e dua na isoqosoqo tamata vou era talairawarawa ena nona veiliutaki.

 E vakamacalataki ena Vakatakila na “ivakatakilakila.” (Vakatakila 1:1) E macala gona ni lomalagi, kei na vuravura e vakamacalataki ena tikinivolatabu qori e ivakatakarakara ga. E vakamacalataki tale ga ena so tale na tikinivolatabu na “lomalagi vou,” kei na “vuravura vou” ivakatakarakara. (Aisea 65:17; 66:22; 2 Pita 3:13) Noda dikeva na tikinivolatabu qori kei na itukutuku vakaivolatabu, eda na rawa ni kila kina na ibalebale ni tikinivolatabu kece qori.

 “Na lomalagi vou.” Eso na gauna na iVolatabu e vakayagataka na vosa “lomalagi,” me dusia na veiliutaki se matanitu. (Aisea 14:12-14; Taniela 4:25, 26) E tukuni ena dua na ivola me baleta na raivotu vakaparofisai, ni lomalagi e dusia na veiliutaki se matanitu.” a Na “lomalagi vou” gona e tukuni ena Vakatakila 21:1, e dusia na Matanitu ni Kalou. Na matanitu qori e dau vakatokai ena Vakatakila kei na so tale na ivola ena iVolatabu me “Matanitu vakalomalagi.” (Maciu 4:17; Cakacaka 19:8; 2 Timoci 4:18; Vakatakila 1:9; 5:10; 11:15; 12:10) E kena Tui o Jisu, ena sosomitaka na veika e “lomalagi tu e liu,” ya na matanitu kece vakatamata.—Taniela 2:44; Luke 1:31-33; Vakatakila 19:11-18.

 “Na vuravura vou.” E tukuni ena iVolatabu ni na sega ni vakarusai, se sosomitaki na vuravura qo. (Same 104:5; Dauvunau 1:4) Cava gona na ibalebale ni vuravura vakaivakatakarakara ena tikinivolatabu qo? Ena iVolatabu na vosa “vuravura,” e dau vakaibalebaletaki vakalevu ina kawatamata. (Vakatekivu 11:1; 1 Veigauna 16:31; Same 66:4; 96:1) Koya gona, na “vuravura vou” e dusia tiko e dua na isoqosoqo tamata vou era talairawarawa ena veiliutaki ni matanitu vakalomalagi ni Kalou. Ena takali na “vuravura tu e liu,” se o ira na kawatamata era saqata na Matanitu ni Kalou.

 “Sa sega tale ga na wasawasa.” Me salavata kei na veika e vakamacalataki ena Vakatakila 21:1, e ivakatakarakara tale ga “na wasawasa” e tukuni kina. E dau voravora na wasawasa, e veiganiti kina na ivakatakilakila qori me dusi ira na tamata era dauvakavu ca nira sega ni vinakata mera muria na ivakatagedegede ni Kalou. (Aisea 17:12, 13; 57:20; Vakatakila 17:1, 15) Era na vakarusai tale ga. E kaya na Same 37:10: “Malua mada vakalailai, sa na sega vakadua na daucaka ca, o na rai ena vanua era tu kina e liu, era na yali kina.”

 E parofisaitaka na Vakatakila na ka e yaco ena “siga ni Turaga.” (Vakatakila 1:10) Me salavata kei na parofisai vakaivolatabu, e tekivu na siga qori ena 1914 ni tekivu veiliutaki o Jisu me Tui ni Matanitu ni Kalou. b Ia e sega ni liutaka na vuravura taucoko. E tukuni tale ga ena so tale na parofisai ni na ca sara na ituvaki ni vuravura ena itekitekivu ni “siga ni Turaga.” E vakatokai na gauna qori me “iotioti ni veisiga.” (2 Timoci 3:1-5, 13; Maciu 24:3, 7; Vakatakila 6:1-8; 12:12) Ni oti na gauna e vakilai kina e levu na ka dredre, ena qai vakarusa na Matanitu ni Kalou na lomalagi kei na vuravura vakaivakatakarakara. Ena kauta mai na vakacegu kei na duavata e vuravura. O ira na bula ena “vuravura vou,” era na marau qai bula uasivi ena veiliutaki ni Matanitu ni Kalou.—Vakatakila 21:3, 4.

 Sarava na ivakamacala lekaleka ni ivola na Vakatakila.