E parofisaitaka na iVolatabu ni na kilai na iotioti ni veisiga ena ivakatakilakila me vaka na ivalu, uneune, matedewa kei na “veika vakadomobula.” (Luke 21:10, 11) Na vosa ni parofisai qori e yaco sara tiko ga ena yabaki vakacakacaka ni 2022. a Kena ivakaraitaki, e vica vata na milioni era vakila na rarawa ena ivalu e yaco tiko e Ukraine. Levu e veiyasa i vuravura era se vakila tiko qo na revurevu ni COVID-19. Dua tale ga na iwiliwili levu era vakaleqai ena leqa tubukoso me vaka na uneune e Haiti, na vakacaca ni cagi kaukaua e Merika e Loma, Yatu Filipaini kei na ceva kei Aferika. Sala cava eda veivuke kina na iVakadinadina i Jiova vei ira na vakaleqai?

 Ena yabaki vakacakacaka ni 2022, e veivuke na noda isoqosoqo ena rauta ni 200 na leqa tubukoso! Kena isoqoni kece, e rauta ni 12 na milioni na dola e vakayagataki ena vakacoko. b Dikeva mada qo na sala e yaga kina na cau vei ira na vakaleqai ena leqa tubukoso.

 Ena ika14 ni Okosita 2021, e vakacaca ena ceva kei Haiti e dua na uneune e 7.2 na kena kaukaua. E ka ni rarawa ni ratou mate kina e rua na tacida yalewa, kei na dua na tacida tagane. O ira na bula ena uneune qori era vosota na leqa, kei na rarawa e vakilai kina. E kaya e dua na tacida tagane o Stephane: “E levu era mate, qai sivia e rua na vula na caka tiko ni veibulu e veimacawa ena levu na siti.” E kaya tale ga e dua na tacida tagane o Éliézer: “Levu na tacida e sega nodra vale, isulu, ivava kei na so tale na ka. Vica vata na vula e levu se tarai ira tu ga na revurevu ni uneune.”

 E totolo ga na veivuke ni noda isoqosoqo. E vakarautaka na valenivolavola ni tabana e Haiti e dua na ibinibini levu na kakana, na valelaca, tavuleni, meteresi, kei na sola me jaji kina na talevoni. E tara tale se vakavinakataki e sivia ni 100 na vale. Na veivuke qori e vakayagataki kina e sivia na dua na milioni na dola.

 Dua na ka nodra vakavinavinaka na tacida ena veivuke e caka qo. E kaya o Lorette: “E vakarusa vakadua na uneune na neitou vale, e vakaleqa tale ga neitou bisinisi. E sega na ka me keitou kania. Ia sa qai vukei keitou na isoqosoqo i Jiova, e vakarautaka na ka kece keitou gadreva.” E kaya o Micheline: “E vakacacana na uneune na vanua au tiko kina kei rau na luvequ tagane. Au sega sara ga ni kila na ka meu cakava. Ia au masuti Jiova, e qai vukei keitou ni vakayagataka na nona isoqosoqo. Qo sa dua sara neitou vale vinaka. Au vakadeitaka meu cakava na ka kece au rawata meu vakaraitaka kina noqu vakavinavinaka vei Jiova.”

 Era raica tu na vakailesilesi na noda veivuke ena vakacoko. E kaya e dua na dairekita ni olo e vakayagataka na matanitu o L’Asile: “Au vakavinavinakataka na totolo ni nomuni veivuke. Oni vakaraitaka kina ni oni dokai ira vakalevu na vakailesilesi. Au marautaka ni oni sega ni vinakata ga na ilavo, ia oni via vukei ira na lewenivanua. Na ka oni cakava e laurai kina na loloma dina.”

 Ena ika24 ni Janueri 2022, e vakacaca na cava o Ana e Mozambique, kei na ra kei Malawi. Dua na ka na bi ni uca kei na kaukaua ni cagi e rauta ni 100 na kilomita dua na aua. E vakacacana na wa ni livaliva, na wavu, e yaco tale ga na waluvu.

 Era vakaleqai e sivia ni 30,000 na tacida e Malawi kei Mozambique. E kaya o Charles e dua na tacida tagane a veivuke ena vakacoko: “Niu raica na ka era vakila na tacida kei na ka era vakayalia, dua na ka noqu rarawa, au sega tale ga ni kila na ka meu cakava.” Koya e ca sara, ni kuitaki kece na kedra kakana kei na nodra itei. E levu e vakarusai nodra vale. E ka ni rarawa, ni mate na watina e dua na tacida tagane kei na rua na luvedrau yalewa. Ratou luvu ni tavuki na waqa ratou vodo tiko kina.

 E vakadomobula na vakacaca ni cava qori. Rauta na dua na kaloko ena bogilevu ratou rogoca na vuvale na Sengeredo na kui ni wai ena tauni o Nchalo e Malawi. Sa waluvu tu e rua na uciwai! E nanuma o Brother Sengeredo me ratou sa biuta nodratou vale. E vakatulewa vinaka dina qori, ni sega ni dede e bale nodratou vale. E vakacacani qai kuitaki na ka ratou taukena. Ratou mani dro vakavuvale ena Vale ni Soqoni, e rauta ni 30 na miniti na kena yawa ni taubaletaki mai nodratou vale. Ia qo e voleka ni rua na aua nodratou gole tiko. Ni ratou yaco yani, dua na ka nodratou wawale ia ratou taqomaki vinaka.

 E totolo ga nodra veivuke na valenivolavola ni tabana e Malawi, kei Mozambique. Era dusimaki na ivakatawa ni tabacakacaka kei na qase mera raica na ka era gadreva na tacida, era veivakayaloqaqataki tale ga. E lesi e vica vata na Komiti ni Vakacoko (DRC) mera raica na veivuke ena vakacoko, ra vakarautaka tale ga na kakana kei na so tale na ka era gadreva na tacida. E vakayagataki e sivia e $33,000 mera vukei kina na tacida, qai vakayagataki e sivia e $300,000 me tara se vakavinakataki kina na nodra vale.

 Era vakayagataka vinaka na ilavo na DRC, vakabibi ena tubu ni isau ni iyaya. Kena ivakaraitaki, ena imatai ni vitu na vula ni vakacoko e tubu ina 70 na pasede na isau ni falawa e Malawi. Qori e dua na kakana e dau vakayagataki vakalevu. E tubu tale ga na isau ni benisini. Era mani volia umauma ga e kea na tacida na kakana, kei na iyaya ni taravale me rawa ni vakabula ilavo. E lutu kina vei ira na isau ni iyaya, e sau lailai tale ga na vakau ni iyaya.

 E uqeti ira e levu na tacida na cakacaka ni vakacoko qori. E kaya o Felisberto, e dua na tacida tagane e Mozambique: “Se qai vakadua meu raica e dua na isoqosoqo e vakarautaka e levu na iyaya ni taravale, lori e vakavodoki kina, ira na veivuke, kakana, kei na veidusimaki vakayalololoma. Qo e dua na ivakaraitaki vakasakiti ni loloma e tukuna o Jisu ena Joni 13:34, 35.” O Ester e dua na tacida yalewa e yada, e vakarusai na nona vale e Malawi. E kaya: “Au nanuma ni sa sega na betequ, ni sega na ka e tu vei au meu tara tale kina noqu vale. Ia nira gole mai na tacida mera mai tara noqu vale, e vaka ga au tu ena parataisi.”

 Nida volekata yani na vuravura vou, eda namaka ni na qai levu ga na leqa tubukoso. (Maciu 24:7, 8) Ia oni vakavinavinakataki ena nomuni lomasoli ena cau, eda nuidei ni na veivuke vakalevu vei ira na tacida era vakaleqai. E laurai tale ga ena donate.ps8318.com eso tale na sala ni cau. Vinaka vakalevu na lomasavu.