E veivula eda dau nanamaki meda sarava na porokaramu vakayalo, kei na vidio ena JW Broadcasting. Ia e levu na tacida mai Aferika era sega ni rawa ni sarava qori ena internet. Na vuna?

 E levu na vanua mai Aferika e sega kina na internet. Ke mani tiko na internet ena rawa ni malumalumu, se saulevu. Kena ivakaraitaki, e dua na ivakatawa ni tabacakacaka e download taka na JW Broadcasting ni dua na vula ena vanua ni internet. E kena isau e $16, qori e sivia na kedra isau eso ena dua na macawa! a

 Dina ni sotavi na dredre qori, ia era sa marautaka tiko e levu na JW Broadcasting ke sega mada ga na internet. E rawa vacava?

 Ena 2017, o ira na tiko ena Sahara mai Aferika era sa tekivu sarava na JW Broadcasting ena dua na siteseni ni tivi ni vakayagataki na satellite, qo e dua na mataqali misini ni kakaburaki. E sega ni saumi na siteseni qori, qai rawa ni saravi e veisiga ena 16 na vosa.

 E rawa ga qori ni sauma na isoqosoqo ni iVakadinadina i Jiova, e dua na kabani ni tivi me kaburaka na noda vidio ena satellite. E rawa gona ni saravi noda vidio ena rauta ni 35 na vanua ena Sahara. E sivia ni $12,000 na isau ni konitaraki qori e veivula. Eso na gauna ena tubu na kena isau, qori me saravi kina na noda soqo, me vaka na soqo ni veiwasewase, kei na soqo lavotaki ni mata mai na vale ni tabana.

 Levu era dau sarava ena tivi na siteseni qori ena nodra dui vale, wili kina o ira na sega ni iVakadinadina i Jiova. Ia eso na tacida era sega ni volia rawa na ka e vinakati me saravi kina na siteseni qori. E mani vakarautaki ena sivia na 3,670 na Vale ni Soqoni na misini ni satellite, mera sarava kina na tacida na JW Broadcasting. Ke sa tiko rawa ena Vale ni Soqoni na tivi se na projector, ena rauta ni $70 na isau ni yaya qori kei na kena usani. Ia ke sega, ena viavia $530 na kena isau taucoko.

 Era marautaka vakalevu na tacida na siteseni qo. E kaya e dua na qase ni ivavakoso mai Cameroon: “Vei keitou vakavuvale, qo e vaka na mana e vakarautaki mai ena vanua dravuisiga.” E kaya o Odebode e dua na tacida tagane mai Nigeria: “Vakatolu ena dua na macawa keitou dau sarava vakavuvale na siteseni qo. Eratou dau nanamaki kina na luvequ. Eso mada ga na gauna ni keitou sarava tale tiko eso na ka, ratou na tukuna na gone me veisau tale ina siteseni ni JW satellite.” E kaya tale ga o Rose mai Nigeria: “Au marau niu sa sarava na siteseni ni JW satellite, sa qai lailai kina noqu dau sara nius. Na nius e dau vakararawataka na lomaqu, dau tubu kina noqu dra. Ia na JW Broadcasting e veivakauqeti sara ga qai veivakacegui. Qo e dua na iloloma levu mai vei Jiova.”

 E kaya e dua na ivakatawa ni tabacakacaka mai Mozambique, ni sa vakarautaki tu ena Vale ni Soqoni na iyaya ni satellite. Ni se vo tu mada ga e dua na aua se sivia, era sa dau yaco yani na mataveitacini mera lai sarava na JW Broadcasting.

 Ena soqo ni veimatanitu ni 2019 mai Johannesburg, e Sauca Aferika. E vakayagataki na siteseni qori me kaburaki kina eso na ivunau e digitaki, wili kina nona ivunau na lewe ni iLawalawa Dauvakatulewa. E saravi qori ena ciwa na vanua. E kaya o Sphumelele, e veiqaravi ena tabana ni Broadcasting ena valenivolavola ni tabana e Sauca Aferika: “I liu se dau vakayagataki na internet me kaburaki kina na ivunau. Ia ena vinakati me kaukaua vinaka na internet, me tiko tale ga na kena isau. Ia na JW satellite e sau vinaka qai taladrodro tale ga.”

 Vinaka vakalevu na nomuni cau ena cakacaka e vuravura raraba, era sarava rawa kina e levu na tacida mai Aferika na JW Broadcasting ena satellite. E vakavinavinakataki na nomuni cau ena iwalewale e vakatututaki ena donate.ps8318.com.