“Ena veigauna sa oti eda sega ni tadra nida na mai vakayagataka tu na internet meda vakani kina vakayalo.” Oni vakadinadinataka qori? E cavuta qori o Geoffrey Jackson ena iKaono ni Rogo Mai na iLawalawa Dauvakatulewa 2020. E tomana: “Ia ena gauna qo eda vakadinata ni yaga sara vakalevu ena gauna ni matedewa qo me vaka na JW Library. Io, o Jiova sa vakarautaki keda voli mai me vicavata na yabaki me baleta saraga na ituvaki nikua.”

 E cakava vakacava qori o Jiova? E vakarautaki vakacava na JW Library? Cava e dau caka me vakavoutaki tiko ga kina?

 Ena Me 2013, e kerea na iLawalawa Dauvakatulewa ena tabana ni MEPS ena itikotiko liu, me vakarautaki e dua na prokaramu ni talevoni me tiko kina na New World Translation e vakavoutaki. E kaya o Brother Paul Willies e veiqaravi ena tabana ni MEPS: “Keitou se bera vakadua ni vakarautaka e dua na porokaramu me biu ena talevoni. E lesi gona eso na mataveitacini mera qarava qori. E cegu tu eso na itavi, ra qai cakacaka vata kei na so tale na tabana mera bulia na prokaramu qo. Dua na ka neitou masu wasoma, ia oti ga e lima na vula e sevutaki na JW Library ena bose vakayabaki. Keitou raica kina nona veivuke o Jiova!”

 Dua tale na dredre e vakilai, ya me biu na ivola vakaivolatabu ena JW Library, me vakarautaki tale ga ena levu tale na vosa. Ena Janueri 2015, e biu kina e levu na ivola vakaivolatabu ena vosa vakavalagi. Oti ga e ono na vula, sa rawa ni download na ivola vakaivolatabu ena vica vata na drau na vosa.

 Tekivu mai na gauna qori e vakavoutaki tiko ga na JW Library. Me vaka na kena biu kina na vidio, tuvanaki vinaka na ivola vakaivolatabu, biu ena dua ga na vanua na ivola, sere kei na vidio me vakagataki ena soqoni. E rawa tale ga ni laurai na veitikinivolatabu yadua ena iDusidusi ni Vakekeli.

 E vakayagataki e veisiga na JW Library ena 8 na milioni na iyaya vakalivaliva, e veivula e vakayagataki ena sivia na 15 na milioni na iyaya vakalivaliva! Cava e caka me laurai vinaka tiko na ka kece e biu ena JW Library? E kaya o Brother Willies: “Ena vinakati me vakavoutaki tiko ga ena talevoni. Me biu kina eso na ka vovou qai vakavinakataki me rawarawa na kena vakayagataki. Levu na gauna e dau vakavoutaki na porokaramu ni talevoni. Ni caka qori, e vinakati tale ga me vakavoutaki na JW Library me rawa ni cakacaka vata kei na porokaramu vou ni talevoni. Ni toso cake tiko ga na levu ni ivola kei na katokatoni e biu ena JW Library, ena vinakati tale ga me vakavoutaki. Sa tiko ena JW Library e rauta ni 200,000 na ivola vakaivolatabu, kei na sivia na 600,000 na katokatoni kei na vidio!

 Me rawa ni vakayagataki tiko ga na JW Library, ena vinakati kina e levu na iyaya ni kompiuta. Kena ibalebale, ena vinakati tale ga e levu na ilavo me voli kina na porokaramu ni kompiuta. E dua ga mada ga na porokaramu ni kompiuta e rauta ni $1,500 na ilavo ni Merika na kena isau e veiyabaki. E sauma tale ga na tabana ni MEPS e rauta ni $10,000 na ilavo ni Merika e veiyabaki vei ira na kabani ni iyaya ni livaliva. E caka qori me rawa ni vakayagataki vinaka na JW Library ena kompiuta vou, tablet kei na talevoni.

 Na JW Library e vakalailaitaka na vakayagataki ni cau ena kena tabaki, dabani kei na vakau ni ivola vakaivolatabu. Kena ivakaraitaki, ena 2013 e tabaki e rauta ni 12 na milioni na ivola Dikeva na iVolatabu e Veisiga. Ena 2020, e tubu na iwiliwili ni daututuku e vuravura taucoko ena rauta na 700,000. Ia ena yabaki qori e tabaki ga e rauta ni lima na milioni na ilavelave ni ivola qo. Na vuna? Ni levu na mataveitacini era sa raica ga nodra tikinivolatabu e veisiga ena JW Library. a

 Levu na sala e yaga kina na JW Library. E raica o Geneviève ni rawa ni vulica kina vakawasoma na iVolatabu. E kaya: “Ke meu kauta kece mai noqu ivola ni vuli, ena dredre sara ga meu vulici ira ena veimataka. Ia niu vakayagataka na JW Library, au na kauta ga mai noqu tablet ni sa tu kece kina na ka meu vulica. Noqu vuli wasoma e vaqaqacotaka noqu vakabauta, au matua tale ga kina vakayalo.”

 E yaga vakalevu na JW Library ena gauna ni matedewa na COVID-19. E kaya o Charlyn mai Merika: “Rauta ni dua na yabaki noqu sega ni raica tu na noda ivola tabaki ena vuku ni matedewa. Ia eda vakani tiko ga vakayalo ena JW Library, au vakavinavinaka gona vakalevu vei Jiova.”

 Eda na duavata kei na ka e kaya o Faye mai na Yatu Filipaini: “Na porokaramu qo e vakavolekati au vei Jiova. Qo na imatai sara ga ni ka au dau wilika e veimataka, qai dau vakarorogo kina niu qarava noqu cakacaka e vale. Au vakayagataka tale ga niu vakavakarau ena soqoni kei na caka vuli iVolatabu. Ena noqu gauna galala, au dau sarava kina na vidio. Niu wawa tu mada ga ena dua na vanua, au rawa ni wilika kina na iVolatabu se so tale na ulutaga vakaivolatabu. Sa bau talei dina.”

 E yaga tale ga vakalevu na JW Library ena cakacaka vakavunau. Kena ivakaraitaki, e via vakayagataka e dua na tacida yalewa mai Cameroon e dua na tikinivolatabu. Ia sa guilecava na vanua me rai kina. Ena vica na macawa yani i liu, e rogoca ni a wilika e dua na tacida yalewa. E kaya: “Vinaka ga niu nanuma tiko e dua na matavosa ena tikinivolatabu qori. Au mani gole ena iwasewase ni iVolatabu ena JW Library, au vaqara na matavosa qori. Totolo ga noqu raica na tikinivolatabu. Na JW Library e vukei au meu kunea e levu na tikinivolatabu au sa guilecava.”

 Nomuni lomasavu ena cau ena donate.ps8318.com e rawa kina ni vakarautaki, qai vakavinakataki tiko ga na JW Library mera vakayagataka na tacida e veiyasa i vuravura. Oni vakavinavinakataki vakalevu ena nomuni lomasavu.

1. Okotova 2013—Sevutaki na JW Library qai tu kina na New World Translation e vakavoutaki

2. Janueri 2015—Biu eso tale na ivola vakaivolatabu ena vosa vakavalagi, e vakarautaki tale ga ena vica vata na drau na vosa

3. Noveba 2015—maka duiroka (highlighter)

4. Me 2016—iwasewase na Meetings

5. Me 2017—ka meda volavola kina (note-taking)

6. Tiseba 2017—Study Bible

7. Maji 2019—Rawa ni download na katokatoni, saravi na vidio (streaming), laurai tale ga na iDusidusi ni Vakekeli ena tikinivolatabu yadua

8. Janueri 2021—Vakarautaki na ka ni vuli ni ivola Marau me Tawamudu!