A susu o Jisu e Nasareci, dua na koro lailai ga e sega ni kilai levu. E toka ena vualiku kei Jutia, ena veidelana ni yasayasa o Kalili, ena muaira ni drano levu na Wasa o Kalili.

Sa rairai yabaki rua o Jisu ena gauna ratou biubiu kina vakaveitamani mai Ijipita. De dua e se bera ni dua tale na luvedrau o Meri kei Josefa ena gauna qori. Ia e muri ratou qai sucu na tacina vakacabecabe​—o Jemesa, Josefa, Saimoni, kei Jutasa. Erau vakaluveni yalewa tale ga o Meri kei Josefa, eso kina na ganei Jisu vakacabecabe. Eratou rairai le ono na taci Jisu kei na ganena.

Era tu tale eso na weka i Jisu. Eda sa kilai rau tiko o Ilisapeci kei na luvena o Joni. E vica vata na kilomita na yawa ni vanua e vakaitikotiko kina o Joni ena ceva kei Jutia. Ia e tiko volekati Kalili o Salome, e rairai taci Meri. Na wati Salome o Sepeti, rau rairai veitatacini kina kei Jisu na luvedrau tagane o Jemesa kei Joni. E sega ni kilai ke rau tiko kei Jisu ena levu na gauna na rua na cauravou qori ni ratou tubu cake tiko. Ia rau qai nona itokani voleka ena dua na gauna e muri, rau nona yapositolo tale ga.

E vinakati me cakacaka vakaukaua o Josefa me qarava kina nona vuvale levu. E cakacaka vakamatai o koya. Ni susugi Jisu o Josefa me vaka ga e luvena dina, e vakatokai kina o Jisu me “luve ni matai.” (Maciu 13:55) A vakavulici Jisu o Josefa me  matai tale ga, qai kenadau sara kina. Era tukuna mada ga eso tale me baleti Jisu ena dua na gauna e muri “ni o koya qo na matai.”​—Marika 6:3.

Eratou vakaliuca na vuvale i Josefa na sokalou vei Jiova. Me salavata kei na Lawa ni Kalou, erau vakavulici ratou vakayalo na luvedrau o Josefa kei Meri ‘ni ratou dabe ena nodratou vale, ni ratou taubale e gaunisala, ni ratou davo, ni ratou duri cake tale ga.’ (Vakarua 6:6-9) E tiko mai Nasareci e dua na valenilotu. Macala ga ni dau kauti ratou e kea nona vuvale o Josefa me ratou lai sokalou. A tukuni ena dua na gauna e muri ni dau lako ina valenilotu o Jisu “ena Siga ni Vakacecegu me vaka na nona ivakarau.” (Luke 4:16) Eratou marautaka tale ga vakavuvale me ratou lako wasoma ina valenisoro i Jiova mai Jerusalemi.