LESONI 19
Era Lotu vaKarisito Dina na iVakadinadina i Jiova?
Keimami vakabauta na iVakadinadina i Jiova ni keimami lotu vaKarisito dina. Na vuna? Dikeva na yavu ni neimami vakabauta, na yaca keimami kilai kina kei na neimami dau veilomani.
1. Na cava nodra yavu ni vakabauta na iVakadinadina i Jiova?
E kaya o Jisu: “E ka dina na [Vosa ni Kalou].” (Joni 17:17) Me vakataki Jisu, era yavutaka e veigauna na iVakadinadina i Jiova nodra vakabauta ena Vosa ni Kalou. Kena ivakaraitaki, ena icavacava ni ka19 ni senitiuri, eratou tekivu dikeva na iVolatabu e dua na ilawalawa. Eratou yavutaka mai kina na ka ratou vakabauta, dina ni duidui kei na ka era vakavuvulitaka na vo ni lotu. Ratou sa qai wasea na ka dina vakaivolatabu qori. a
2. Na cava keimami vakatokai kina ena iVakadinadina i Jiova?
O Jiova e raici ira na qaravi koya mera nona ivakadinadina, nira tukuna na ka dina me baleti koya. (Iperiu 11:4–12:1) Kena ivakaraitaki, ena gauna makawa e kaya na Kalou vei ira nona tamata: “O kemuni na noqu ivakadinadina.” (Wilika Aisea 43:10.) E vakatokai o Jisu me “iVakadinadina Yalodina.” (Vakatakila 1:5) Me tekivu gona ena 1931, keimami sa vakatokai ena iVakadinadina i Jiova. E ka dokai me keimami vakatokai ena yaca qori.
3. Era vakatotomuria vakacava na loloma i Jisu na iVakadinadina i Jiova?
E lomani ira vakalevu nona tisaipeli o Jisu, era vaka ga e dua na vuvale. (Wilika Marika 3:35.) E va tale ga qori nodra duavata na iVakadinadina i Jiova, era dua na vuvale e vuravura raraba. Oya na vuna keimami na veikacivi kina na brother kei na sister. (Filimoni 1, 2) Keimami muria tale ga na ivakaro: “Lomani ira na mataveitacini kece.” (1 Pita 2:17) E levu sara na sala keimami vakaraitaka kina na loloma qori, me vaka nodra vukei na taci keimami e veiyasa i vuravura nira vakaleqai.
VAKEKELI
Dikeva na itukutuku makawa me baleti keimami na iVakadinadina i Jiova qai raica eso tale na ivakadinadina ni keimami lotu vaKarisito dina.
Era yavutaka ena iVolatabu nodra vakabauta na lotu vaKarisito dina ra qai wasea yani
4. E yavutaki na neimami vakabauta ena iVolatabu
Sa tukuna tu mai o Jiova ni na vakatakilai na ka dina vakaivolatabu. Wilika Taniela 12:4 kei na ivakamacala e ra, qai veivosakitaka na taro qo:
-
Na cava ena “vakalevutaki” vei ira na tamata ni Kalou nira dikeva tiko na iVolatabu?
Dikeva na sala e vulica kina na iVolatabu o Charles Russell kei na nona ilawalawa. Sarava na VIDIO, qai veivosakitaka na taro qo.
-
Ena vidio, e vulica vakacava o Charles Russell kei na nona ilawalawa na iVolatabu?
O bau kila?
Eso na gauna, e veiveisau na ka keimami kila. Na vuna? Me vaka ga na cabe ni matanisiga e vakararamataka vakamalua na irairai ni vanua, e va tale ga qori nona vakamatatataka na Kalou nona Vosa ni toso na gauna. (Wilika Vosa Vakaibalebale 4:18.) E sega ni veisau na ka e tukuna na iVolatabu, e veisau ga na ka keimami kila ni sa qai matata.
5. Keimami cakava na ka keimami vakatokai kina
Na cava keimami vakatokai kina ena iVakadinadina i Jiova? Sarava na VIDIO, qai veivosakitaka na taro qo.
-
Na cava e veiganiti kina na yaca iVakadinadina i Jiova?
Cava e digitaki ira kina nona tamata o Jiova mera nona iVakadinadina? Era na vakatakila ni o koya na Kalou dina, ni levu na ka lasu sa tukuni tu me baleti koya. Dikeva mada e rua na lasu qori.
Era vakavulica eso na lotu ni vinakata na Kalou me vakayagataki na ivakatakarakara ena nodra sokalou. Ia wilika Vunau ni Soro 26:1, qai veivosakitaka na taro qo:
-
Na cava o raica e keri? Na cava na rai i Jiova me baleta na matakau?
Era vakavulica eso na iliuliu ni lotu ni Kalou o Jisu. Ia wilika na Joni 20:17, qai veivosakitaka na taro qo:
-
Na cava o raica e keri? Vakacava rau dua ga na Kalou kei Jisu?
-
Cava nomu rai ni o sa mai kila, ni o Jiova e talai ira nona ivakadinadina mera tukuna na ka dina me baleti koya kei Luvena?
6. Keimami dau veilomani
Na iVolatabu e vakatauvatani ira na lotu vaKarisito ina duidui tikiniyago. Wilika 1 Korinica 12:25, 26, qai veivosakitaka na taro qo:
-
Na cava ena cakava na lotu vaKarisito dina ni rarawa e dua na tacina?
-
Na cava o dikeva rawa ena nodra veilomani na iVakadinadina i Jiova?
Nira vakaleqai na iVakadinadina i Jiova ena dua na yasa i vuravura, ena totolo nodra veivuke na tacidra mai na veiyasa i vuravura. Kena ivakaraitaki, Sarava na VIDIO, qai veivosakitaka na taro qo.
-
E laurai vakacava e keri nodra veilomani na iVakadinadina i Jiova?
Era dau veivuke na lotu vaKarisito dina vei ira na vakaleqai tu
KA ERA KAYA ESO: “E lotu vou na iVakadinadina i Jiova.”
-
Se tekivu mai na gauna cava nona kacivi ira nona tamata o Jiova mera iVakadinadina?
KA O VULICA
Era lotu vaKarisito dina na iVakadinadina i Jiova. Keimami lewe ni dua na vuvale e vuravura raraba, e yavutaki neimami vakabauta ena iVolatabu qai tukuna na ka dina me baleti Jiova.
Railesuvi
-
Na cava keimami vakatokai kina ena iVakadinadina i Jiova?
-
Eda raici ira vakacava eda vakabauta vata?
-
O nanuma nira lotu vaKarisito dina na iVakadinadina i Jiova?
IKURI
Vulica e levu tale na ka me baleti keimami.
Jehovah’s Witnesses—Faith in Action, Part 1: Out of Darkness (1:01:53)
Raica e dua na ivakaraitaki ni nodra vakatakila na ivakavuvuli lasu na iVakadinadina i Jiova.
Ena saumi na nomuni vakatataro me baleti ira na iVakadinadina i Jiova.
“Taro e Tarogi Wasoma me Baleti Keimami na iVakadinadina i Jiova” (Ulutaga ena jw.org)
E dau vakamavoataki ira na dui kaikai o Stephen. Dikeva se veisautaki koya vakacava na ka e raica vei ira na iVakadinadina i Jiova
“Torosobu Noqu iVakarau ni Bula” (Na Vale ni Vakatawa, 1 Julai, 2015)
a Keimami dau vakayagataka vakalevu Na Vale ni Vakatawa, e tabaka sara mai na ka dina ena 1879.
Rawa ni o Wilika Tale ga
TARO E TAROGI WASOMA
Era Veivakavulici Vakacava na iVakadinadina i Jiova ena iVolatabu?
E sega ni saumi nodra veivakavulici na iVakadinadina i Jiova ena iVolatabu. O rawa ni vakayagataka ga na ivakadewa ni iVolatabu o vinakata. Rawa tale ga ni o sureti ratou nomu vuvale, se itokani me ratou veitomani ena vuli.
