E vinakata o Jiova meda “taleitaka na yalodina.” (Maika 6:8) E bibi vakalevu na yalodina ena nomu vakawati. Ke sega na itovo qori, ena sega na veinuitaki. E bibi tale ga na veinuitaki ni na vaqaqacotaki kina nomudrau veilomani.

Nikua, e vakilai vakalevu ena bula vakawati na tawayalodina. Ke o vinakata mo taqomaka nomu vakawati, e rua na ka e vinakati mo cakava.

NA KA E TUKUNA NA IVOLATABU: “Vakadeitaka . . . na veika era bibi sara.” (Filipai 1:10) Na vakawati e dua vei ira na ka bibi duadua ena nomu bula. E dodonu me kauaitaki vakalevu.

E vinakata o Jiova mo dau kauaitaki watimu, mo drau “marautaka” vata “na bula.” (Dauvunau 9:9) E tukuna vakamatata na Kalou mo kua vakadua ni vakawaletaki watimu, mo drau qara na sala mo drau marau tiko ga kina vakaveiwatini. (1 Korinica 10:24) Me vakila sara ga o watimu ni o taleitaki koya, o vakamareqeti koya tale ga.

NA KA O RAWA NI CAKAVA:

• Vakadeitaka me levu na gauna mo drau dau vakayagataka vata, mo kauaitaki watimu kina

• Ni o sa vakawati, veisautaka nomu rai mai na “yau” ina “keirau”

NA KA E TUKUNA NA IVOLATABU: “O koya e vakaraica tiko ga na yalewa ena nona garosa, e sa veibutakoci oti kei na yalewa ya e lomana.” (Maciu 5:28) Ke dua e vakasamataka tiko ga na ka vakasisila, sa na okati me tawayalodina vei watina.

E tukuna o Jiova ni bibi “mo taqomaka na lomamu.” (Vosa Vakaibalebale 4:23; Jeremaia 17:9) Me rawa ni o cakava qori, ena vinakati mo taqomaka na matamu. (Maciu 5:29, 30) Vakatotomuri koya na peteriaki o Jope, a veiyalayalati kei na matana me kua vakadua ni raica se gaganotaka e dua tale na yalewa. (Jope 31:1) Vakadeitaka mo kua vakadua ni sarava na iyaloyalo vakasisila. Mo nakita dei tale ga mo kua ni taleitaka e dua tale, vakavo ga o watimu.

NA KA O RAWA NI CAKAVA:

• Mera raica na tamata ni o yalodina vei watimu

• Kauaitaka na ivakarau ni loma i watimu, muduka vakatotolo na veikilai ena sega ni taleitaka o watimu