iMatai ni iVola Vei Ira mai Korinia 14:1-40
14 Saga moni dau loloma, ia saga tiko ga me solia vei kemuni na Kalou eso na isolisoli vakayalo, vakabibi moni parofisai.+
2 Ni o koya e duivosavosa e sega ni vosa vei ira na tamata, e vosa ga vua na Kalou, ni sega ni dua e kila,+ ia e vosataka na ka vuni tabu+ ena veiuqeti ni yalo tabu.
3 Ia o koya e parofisai e veivakayaloqaqataki, e veiuqeti, e veivakacegui tale ga na nona vosa.
4 O koya e duivosavosa e vakayaloqaqataki koya ga, ia o koya e parofisai e vakayaloqaqataka na ivavakoso.
5 Au vinakata moni duivosavosa kece,+ ia e vinaka cake vei au moni parofisai.+ O koya e parofisai e uasivi koya e duivosavosa, vakavo ke tukuna na kena ibalebale, me vakayaloqaqataki kina na ivavakoso.
6 Ia ena gauna qo raveitacini, keu mai duivosavosa vei kemuni, na cava na kena yaga vei kemuni keu sega ni vakatakila+ kina e dua na ka, seu vakayagataka na vosa ni vuku,+ na vosa ni parofisai, se meu vakavulica e dua na ka?
7 Na ka mate me vaka na bitunivakatagi kei na api e dau rorogo. Ke sega ni matata na ivakatagi, ena kilai vakacava na ka e vakatagitaki tiko ena bitunivakatagi se api?
8 Ke sega ni matata na rorogo ni biukila, o cei ena tu vakarau me lako ena ivalu?
9 Ena vaka tale ga kina o kemuni, ke sega ni matata na ka oni tukuna, ena qai kilai rawarawa vakacava? Oni sa na vosa tiko ga ina cagi.
10 Ena levu na mataqali rorogo ni vosa e vuravura, ia era vakaibalebale kece.
11 Ia keu sega ni kila na ibalebale ni vosa, au sa na vulagi vei koya e vosa tiko, o koya tale ga e vosa tiko e vulagi vei au.
12 E vaka tale ga kina o kemuni, ni oni gadreva vagumatua na isolisoli vakayalo, ni vakasaqara moni vinaka kina, me rawa ni vakayaloqaqataki na ivavakoso.+
13 O koya gona, o koya e duivosavosa me masulaka me rawa ni tukuna na kena ibalebale.+
14 Keu masu tiko ena duivosavosa, na masu qori e isolisoli ni yalo tabu vei au, e sega ni vakaitavi kina na noqu vakasama.
15 Na cava gona me qai caka? Au na masu ena isolisoli ni yalo tabu, au na masu tale ga ena noqu vakasama. Au na lagasere ena isolisoli ni yalo tabu, au na lagasere tale ga ena noqu vakasama.
16 Ia ke o veivakacaucautaki ena isolisoli ni yalo tabu, ena qai kaya vakacava “Emeni” ina nomu vakavinavinaka o koya e dabe tiko ena idabedabe ni tamata wale, ni sega ni kila na ka o tukuna?
17 E daumaka na nomu vakavinavinaka, ia e sega ni vakayaloqaqataki kina o koya adua.
18 Au vakavinavinakataka na Kalou, ni levu sara na mataqali vosa au kila ni vakatauvatani kei kemuni kece.
19 Ia ena ivavakoso, e vinaka cake vei au meu cavuta e lima na vosa ena noqu vakasama, meu rawa ni vakavulici ira eso, mai na noqu kila sara e tininaudolu na vosa ena dua tale na mataqali vosa.+
20 Raveitacini, ni kua ni vakasama tiko me vaka na gone,+ moni vaka ga na gone ena ka ca,+ ia moni tamatabula ena ivakarau ni nomuni vakasama.+
21 E volai ena Lawa: “‘Au na vosa vei ira na tamata qo ena nodra vosa na duikaikai kei na nodra vosa* na vulagi, ia era na sega ni rogoci au,’ e kaya o Jiova.”*+
22 Na duivosavosa gona e sega ni ivakatakilakila vei ira na vakabauta, vei ira ga na sega ni vakabauta,+ ia na parofisai e sega ni ivakatakilakila vei ira na sega ni vakabauta, vei ira ga na vakabauta.
23 O koya gona, ke soqoni vata ena dua na vanua na lewe ni ivavakoso kece ra qai duivosavosa, ia era lako tale ga yani kina na tamata wale se o ira na sega ni vakabauta, era na sega beka ni tukuna ni oni sa lialia?
24 Ia ke oni parofisai kece tiko qai lako yani e dua e sega ni vakabauta se tamata wale, ena lauti koya na ka e rogoca vei kemuni, ena qai liaci koya.
25 Ena kilai mai kina na ka vuni ni lomana, ena tekicuva me sokalou vua na Kalou, ena kaya: “E tiko dina kei kemuni na Kalou.”+
26 Cava gona me qai caka raveitacini? Ni oni soqoni vata, e dua ena tukuna na same, e dua e veivakavulici, dua e vakamacalataka na ka e vakatakilai vua, e dua e vosataka e dua tale na vosa, e dua tale e tukuna na kena ibalebale.+ Me caka na ka kece moni veivakayaloqaqataki kina.
27 Ke dua e duivosavosa, me lewe rua ga se lewe tolu, me kua ni sivia, me veitaravi nodra vosa, me laurai tale ga e dua me tukuna na kena ibalebale.+
28 Ia ke sega ni laurai e dua e kila na kena ibalebale, mera galu ga ena ivavakoso, mera vosa lo ga vua na Kalou.
29 Me vosa e rua se tolu na parofita,+ mera qai saga na kena vo mera kila na kena ibalebale.
30 Ia ke dua e dabe toka e kea qai vakatakilai mai vua e dua na ka, me galu o koya e vosa tiko.
31 Oni rawa kece ni parofisai ia moni parofisai yadudua, moni vuli, moni vakauqeti kece tale ga kina.+
32 Ia na isolisoli ni yalo tabu vei ira na parofita e dodonu mera lewa vakamatau na parofita.
33 Ni Kalou e sega ni Kalou ni yakusurasura, ia e Kalou ni vakacegu.+
Me vaka ena nodra ivavakoso kece na yalosavasava,
34 mera galu na yalewa ena ivavakoso, e tabu nira vosa,+ ia mera vakamalumalumutaki+ ira me vaka e tukuni ena Lawa.
35 Ke ra via kila e dua na ka, mera tarogi watidra mai vale, ni ka vakamadua vua na yalewa me vosa ena ivavakoso.
36 Vakacava, e vu ga vei kemuni na vosa ni Kalou, me na yala tale ga vei kemuni?
37 Ke dua e nanuma ni parofita se soli vua na isolisoli ni yalo tabu, me kila mada ni ka au vola tiko yani qo vei kemuni e nona ivakaro na Turaga.
38 Ia ke dua e vakalecalecava, laiva me lecava.
39 O koya gona raveitacini, ni saga tiko ga moni parofisai,+ ia moni kua ni tarova na duivosavosa.+
40 Na ka kece e caka me rakorako qai tuvanaki vakamatau.+
