iMatai ni Tui 8:1-66
8 E soqoni+ ira na qase ni Isireli o Solomoni ena gauna oya, o ira kece na turaga ni yavusa, kei ira na turaga ni nodra mataqali na Isireli.+ Era lako vei Tui Solomoni e Jerusalemi mera kauta cake na kato ni veiyalayalati i Jiova mai na Koro i Tevita,+ oya o Saioni.+
2 Era soqoni kece na lewe i Isireli e mata i Tui Solomoni ena soqo* e dau vakayacori ena vula o Ecanimi,* na ikavitu ni vula.+
3 Era mani lako kece yani na qase ni Isireli, era colata sara na Kato na bete.+
4 Era kauta cake na Kato i Jiova, na valelaca ni veitavaki,+ kei na iyaya vakatabui kece e tiko ena valelaca. Era kauta cake na bete kei ira na Livai.
5 E tiko ena mata ni Kato o Tui Solomoni kei na isoqosoqo taucoko ni Isireli era kacivi mera sota vata kei koya. E mani cabori na sipi kei na bulumakau+ e sega ni wili se tukuni rawa na kedra levu.
6 Era qai kauta na bete na kato ni veiyalayalati i Jiova ina kena vanua,+ ena rumu sara e loma ni vale, na Loqi Tabu Sara, ena ruku ni tabadrau na jerupi.+
7 Erau vakatetaba tu na jerupi ena vanua e tiko kina na Kato, erau vakaruguta tu na Kato kei na kena ivua.+
8 Sa rui balavu na ivua+ e laurai rawa na muana mai na Loqi Tabu ena mata ni rumu sara e loma, e sega ga ni laurai mai tuba. Erau se toka ga e kea me yacova mai na siga qo.
9 E sega ni dua na ka e tiko ena loma ni Kato, e rua ga na vatu raraba+ a biuta kina+ o Mosese mai Orepi ni veiyalayalati o Jiova+ kei ira na Isireli nira biuta mai na vanua o Ijipita.+
10 Nira biuta mai na bete na loqi tabu, e solega na vale i Jiova+ na o.+
11 Era sega ni tu rawa na bete mera veiqaravi ena vuku ni o, ni solega na vale i Jiova na lagilagi i Jiova.+
12 E kaya o Solomoni ena gauna oya: “E tukuna o Jiova ni na tiko ena o vavaku.+
13 Au sa tara vakavinaka e dua na valececere me nomuni, e dua na nomuni itikotiko tudei moni tiko kina me tawamudu.”+
14 E qai vuki na tui me vosa vakalougatataka na ivavakoso taucoko ni Isireli ni tucake tu na ivavakoso taucoko ni Isireli.+
15 E kaya: “Me vakacaucautaki mada ga o Jiova na Kalou ni Isireli, e yalataka e gusuna vei Tevita na tamaqu, e vakayacora tale ga e ligana, ni kaya,
16 ‘Mai na siga au kauti ira tani kina na noqu tamata na Isireli mai Ijipita, au sega ni digia e dua na koro ena yavusa kece e Isireli me tara kina e dua na vale me tiko kina na yacaqu,+ ia au digitaki Tevita ga me lewai ira na noqu tamata na Isireli.’
17 E vu dina mai loma i Tevita na tamaqu me tara e dua na vale ena yaca i Jiova na Kalou ni Isireli.+
18 Ia e tukuna o Jiova vei Tevita na tamaqu, ‘E vu dina mai lomamu mo tara e dua na vale ena yacaqu, e vinaka sara ga ni o vinakata qo e lomamu.
19 O na sega ga ni tara na vale qori, ia na luvemu tagane ena sucu mai vei iko* ena tara na vale ena yacaqu.’+
20 E vakayacora sara o Jiova na ka e yalataka, niu sosomitaki Tevita na tamaqu meu dabe ena idabedabe vakaturaga e Isireli me vaka ga e yalataka o Jiova. Au tara tale ga na vale ena yaca i Jiova na Kalou ni Isireli+
21 au vakarautaka e kea na vanua me biu kina na Kato e tu kina na veiyalayalati+ i Jiova kei ira na tukada ni kauti ira mai na vanua o Ijipita.”
22 E qai tucake o Solomoni ena mata ni icabocabonisoro i Jiova, e matadra na ivavakoso taucoko ni Isireli, e dodoka i lomalagi na ligana ruarua,+
23 e kaya: “Kemuni Jiova na Kalou ni Isireli, e sega ni dua na Kalou me vakataki kemuni+ mai lomalagi e cake se vuravura e ra, oni dei tiko ena veiyalayalati, oni vakaraitaka na dei ni nomuni loloma+ vei ira na nomuni dauveiqaravi era lako tiko e matamuni mai vu ni lomadra taucoko.+
24 Oni dei tiko ena ka oni yalataka vua na nomuni dauveiqaravi o Tevita na tamaqu. Oni yalataka e gusumuni oni qai vakayacora e ligamuni+ ena siga qo.
25 Ia qo kemuni Jiova na Kalou ni Isireli, moni dei tiko ga ena ka oni yalataka vua na nomuni dauveiqaravi o Tevita na tamaqu ni oni tukuna: ‘Ena tiko ga e mataqu e dua ena nomu iyatukawa me dabe ena idabedabe vakaturaga e Isireli, ke ra qarauna wale ga na luvemu na nodra ivalavala mera lako tiko e mataqu me vaka ga nomu lako e mataqu.’+
26 Qo kemuni na Kalou ni Isireli, au kerea me nuitaki mada ga na ka oni yalataka vua na nomuni dauveiqaravi o Tevita na tamaqu.
27 “Ia ena tiko dina na Kalou e vuravura?+ Raica! O lomalagi, io, na veilomalagi e sega ni rauti kemuni,+ sa qai lailai sara na vale au tara qo!+
28 Moni rogoca na nona masu na nomuni dauveiqaravi kei na nona kerekere, kemuni Jiova na noqu Kalou, moni vakatudaliga ena nona tagi ni kere veivuke kei na nona masu na nomuni dauveiqaravi e masuti kemuni tiko nikua.
29 Me wanonova mada ga na matamuni na vale qo ena bogi kei na siga, na vanua oni a tukuna, ‘Ena tiko e kea na yacaqu,’+ moni rogoca na nona masu na nomuni dauveiqaravi e cabora tiko ena vanua qo.+
30 Moni rogoca na nona vakamamasu na nomuni dauveiqaravi kei na nodra kerekere na nomuni tamata na Isireli era masu tiko ena vanua qo, moni rogoca mada ga ena vanua oni tiko kina mai lomalagi,+ io moni rogoca, moni vosoti ira.+
31 “Ni valavala ca e dua na tamata vua na wekana qai tukuni me bubului, ena cudruvi ni sega ni vakayacora na nona bubului, mani lako yani o koya ena mata ni nomuni icabocabonisoro ena vale qo ena gauna ni nona bubului,+
32 moni qai rogoca mada ga mai lomalagi, moni vakayacora, moni vakatulewataki ira na nomuni dauveiqaravi ni oni totogitaki koya e cala moni sauma vua na ka e cakava, moni vakadonui koya e sega ni cala* ni oni vakaicovitaki koya me vaka na nona cakadodonu.+
33 “Nira vakadrukai ira na nomuni tamata na Isireli na meca nira valavala ca tiko ga vei kemuni,+ ra qai lesu vei kemuni mera vakalagilagia na yacamuni,+ mera masu, mera kerekere vei kemuni ena vale qo,+
34 moni rogoca mada ga mai lomalagi, moni vosota na nodra ivalavala ca na nomuni tamata na Isireli, moni qai vakalesui ira ina vanua oni a solia vei ira na tukadra.+
35 “Ni tasogo na lomalagi me kua ni tau na uca+ nira valavala ca tiko ga vei kemuni,+ ra qai masu ena vanua qo mera vakalagilagia na yacamuni, mera biuta na nodra ivalavala ca ni oni vakamalumalumutaki* ira,+
36 moni rogoca mada ga mai lomalagi, moni vosota na nodra ivalavala ca na nomuni dauveiqaravi, o ira na nomuni tamata na Isireli, ni oni na vakavulici ira+ ena sala vinaka mera lakova, moni vakatauca na uca ena nomuni vanua+ oni solia vei ira na nomuni tamata me nodra ivotavota.
37 “Ke dausiga na vanua,+ se dua na matedewa, e ca na iteitei, e malai na kau,+ e basika na yavusa vodre, se vodre daukana, se viribaiti ira na kedra meca ena dua na koro ena nodra vanua,* se basika e dua tale na leqa, se mate,+
38 na masu kece ga, na vakamamasu kece ga e kerea+ e dua, se o ira kece na nomuni tamata na Isireli (nira dui kila tu na rarawa ni lomadra)+ nira dodoka yani na ligadra ina vale qo,
39 moni rogoca mada ga mai lomalagi ena nomuni itikotiko,+ moni vosoti+ ira, moni vakayacora, moni sauma vei ira yadua me vaka na nodra ivalavala kece,+ ni oni kila na lomadra (o kemuni ga oni kila vinaka na lomadra na tamata kece),+
40 mera dokai kemuni ena gauna taucoko era bula tiko kina ena vanua oni a solia vei ira na tukai keimami.
41 “Na vulagi tale ga e sega ni wili vata kei ira na nomuni tamata na Isireli, e lako sara mai vakayawa ena vuku ni yacamuni,*+
42 (nira na rogoca na yacamuni cecere,+ na ligamuni kaukaua kei na ligamuni e dodo tu), e lako mai o koya me masu ena vale qo,
43 moni rogoca mada ga mai lomalagi ena nomuni itikotiko,+ moni vakayacora na ka taucoko e kerei kemuni kina na vulagi, mera kila na lewe ni veivanua kece e vuravura na yacamuni, mera dokai kemuni me vaka na nodra dokai kemuni+ na nomuni tamata na Isireli, mera kila kina ni vakayacani vei kemuni na vale au tara qo.
44 “Ke ra lai valuti ira na kedra meca na nomuni tamata ena sala oni talai ira kina,+ ra qai masuti+ Jiova nira qara ina koro oni digitaka+ kei na vale au tara ena yacamuni,+
45 moni rogoca mai lomalagi na nodra masu kei na nodra kerekere mera lomani, moni vakataulewa ena vukudra.
46 “Ke ra valavala ca vei kemuni (nira valavala ca na tamata kece),+ oni qai cudruvi ira, oni soli ira vua na meca, ra qai kau vakabobula ina nodra vanua na meca, e yawa se voleka,+
47 era mani kilai yalodra ena vanua era vakabobulataki tu kina,+ ra qai lesu vei kemuni+ mera kerei kemuni mera lomani ena vanua era vesu tu kina,+ era kaya, ‘Keimami sa valavala ca keimami cakacala, e ca na neimami ivalavala,’+
48 era lesu vei kemuni ena lomadra taucoko+ kei na nodra vinaka* taucoko ena nodra vanua na meca era kauti ira vakabobula, ra qai masuti kemuni nira qara ina nodra vanua oni a solia vei ira na tukadra, na koro oni digitaka kei na vale au tara ena yacamuni,+
49 moni rogoca mai lomalagi ena nomu itikotiko+ na nodra masu kei na nodra kerekere, moni vakataulewa ena vukudra
50 moni vosoti ira na nomuni tamata era valavala ca vei kemuni, moni vosota kece na nodra cala vei kemuni. Oni na vakayalovinakataki ira era veivakabobulataki mera lomani ira, era na lomani ira+
51 (nira nomuni tamata, era nomuni ivotavota+ oni kauti ira tani mai Ijipita,+ mai na loma ni lovo ni vakawaicala kaukamea).+
52 Me raica mada ga na matamuni na nona kerekere+ na nomuni dauveiqaravi kei na nodra kerekere na nomuni tamata na Isireli, ni oni vakarorogo nira masuti kemuni.*+
53 Oni wasei ira mera nomuni ivotavota vei ira na lewe ni veivanua kece e vuravura,+ me vaka ga oni tukuna ena gusu i Mosese na nomuni dauveiqaravi, ni oni kauti ira tani na tukai keimami mai Ijipita, kemuni na Turaga Cecere Duadua, Jiova.”
54 Ni cabora oti ga vei Jiova o Solomoni na masu kece qo kei na kerekere, e tucake sara mai na mata ni icabocabonisoro i Jiova, ni a tekiduru tiko qai dodo tu na ligana i lomalagi.+
55 E tucake qai vosa vakalougatataka na ivavakoso taucoko ni Isireli ena domolevu, e kaya:
56 “Me vakacaucautaki o Jiova, o koya e solia na vakacegu vei ira na nona tamata na Isireli me vaka e yalataka.+ E sega vakadua ni cala e dua na vosa ena ka vinaka kece e yalataka ena gusu i Mosese na nona dauveiqaravi.+
57 Me tiko vata mada ga kei keda o Jiova na noda Kalou me vaka ga na nona tiko kei ira na tukada.+ Me kua mada ga ni biuti keda se vakanadakui keda.+
58 Me vagolea mada ga vua na lomada,+ meda muria na nona sala kece, meda vakayacora na nona ivakaro, na nona lawa kei na nona lewa e vakaroti ira kina na tukada mera muria.
59 Me volekati Jiova mada ga na noda Kalou ena siga kei na bogi na vosa kece au kerea vei Jiova, me vakataulewa mada ga vua na nona dauveiqaravi kei ira na nona tamata na Isireli me vaka e vinakati e veisiga,
60 mera kila kina na lewe ni veivanua e vuravura taucoko ni o Jiova ga na Kalou dina.+ E sega ni dua tale!+
61 Me taucoko* mada ga na lomamuni+ vei Jiova na noda Kalou ni oni muria tiko na nona lawa, oni vakayacora tale ga na nona ivakaro me vaka ena siga qo.”
62 E cabora sara na tui kei ira kece na Isireli era tiko vata kei koya e dua na isoro levu vei Jiova.+
63 E cabora o Solomoni na isoro ni veiyaloni+ vei Jiova: E cabora e 22,000 na bulumakau, e 120,000 na sipi. E mani vakatabuya na vale i Jiova na tui kei ira kece na Isireli.+
64 Ena siga oya e vakatabuya na tui na lomadonu ni raranivale ena mata ni vale i Jiova me cabora kina na isoro kama, na isoro kakana, kei na tikina uro ni isoro ni veiyaloni, ni rui lailai na icabocabonisoro kopa+ e tu ena mata i Jiova me rauta na isoro kama, na isoro kakana, kei na tikina uro+ ni isoro ni veiyaloni.
65 E qai marautaka na soqo+ ena gauna oya o Solomoni kei ira kece na Isireli, e dua na ivavakoso levu sara era lako mai Lepo-emaci* me yaco sara ina Waimaca* o Ijipita,+ ena mata i Jiova na noda Kalou me 7 na siga, me 7 tale na siga, e 14 taucoko na siga.
66 Ena siga tarava* e talai ira yani na lewenivanua, era vakavinavinakataka sara na tui ra qai lako ina nodra vale nira reki tiko, e marautaka tale ga na lomadra na ka vinaka+ kece e vakaraitaka o Jiova vei Tevita na nona dauveiqaravi kei ira na Isireli na nona tamata.
iVakamacala e ra
^ Qo na Soqo ni Valetabanikau.
^ Ipe., “na luvemu tagane e basika mai tolomu.”
^ Ipe., “cakadodonu.”
^ Se “vakararawataki.”
^ Ipe., “na vanua ni nona matamata.”
^ Se “kemuni irogorogo.”
^ Raica na iVakamacala ni Vosa.
^ Se “rogoca na ka kece era kerea vei kemuni.”
^ Se “yalodina.”
^ Se “na icurucuru i Emaci.”
^ Raica na iVakamacala ni Vosa.
^ Ipe., “ikawalu,” oya na siga e oti kina na ikarua ni vitu na siga.
