iKarua ni Tui 18:1-37
18 Ena ikatolu ni yabaki i Osia+ na luvei Ela na tui Isireli, sa qai tui o Esekaia+ na luvei Tui Easi+ e Juta.
2 E tui ni sa yabaki 25, e veiliutaki e Jerusalemi me 29 na yabaki. Na yaca i tinana o Apai* na luvei Sakaraia.+
3 E vakayacora tiko ga na ka e donu ena mata i Jiova,+ me vaka na ka e cakava o Tevita na tukana.+
4 O koya ga e kauta tani na vanua cecere,+ e vorolaka na vatu ni sokalou, e tatalaka na duru ni sokalou.*+ E vurumemeataka tale ga na gata kopa a cakava+ o Mosese, nira cabora tiko kina na isoro kubou na Isireli me yacova mai na gauna oya, e dau yaca ni matakau oya na gata kopa.*
5 E nuitaki Jiova+ na Kalou ni Isireli, e sega ni dua e taravi koya vei ira kece na tui Juta me vakataki koya, se o ira mada ga na liu vua.
6 E kabiti Jiova+ tiko ga. E sega ni gole tani me kua ni muri koya, e muria tiko ga na ivakaro e vakaroti Mosese kina o Jiova.
7 E tiko vata ga kei koya o Jiova. E lewa maqosa ena vanua kece e lakova. E qai vorata na tui Asiria, e sega ni via qaravi koya.+
8 E vakadrukai ira tale ga na kai Filisitia+ me yacovi Kesa kei na kena veiyasana, mai na valeniyadra me yacova na koro vakabai.*
9 Ena ikava ni yabaki i Tui Esekaia oya ena ikavitu ni yabaki i Osia+ na luvei Ela na tui Isireli, e lako cake i Samaria o Tui Salimanisa e Asiria me tekivu viribaita.+
10 Era valuta+ ni sa cava e tolu na yabaki, ena ikaono ni yabaki i Esekaia, oya ena ikaciwa ni yabaki i Tui Osia e Isireli qai valuti o Samaria.
11 E mani kauti ira vakavesu+ na Isireli i Asiria na tui Asiria, e vakatikori ira e Ela kei Apori volekata na uciwai na Kosani kei na nodra koro na kai Mitia.+
12 E yaco qo nira sega ni rogoca na vosa i Jiova na nodra Kalou, era beca tiko ga na nona veiyalayalati, na ka kece e vakarota+ o Mosese na tamata i Jiova. Era sega ni rogoca se muria.
13 Ena ika14 ni yabaki i Tui Esekaia, e lako cake o Senakaripi na tui Asiria+ me valuta kece na nodra koro vakabai na Juta qai vakamalumalumutaka.+
14 E talatala sara o Tui Esekaia e Juta vei tui Asiria i Lakisi, e kaya: “Au sa cala. Mo suka mo kua ni valuti au, au na solia na ka kece o lavaka vei au.” E lavaka na tui Asiria vei Tui Esekaia e Juta e 300 na taledi* siliva kei na 30 na taledi koula.
15 E qai solia o Esekaia na siliva kece e kune ena vale i Jiova kei na valeniyau ni valenitui.+
16 Ena gauna oya e luvata o Esekaia na katuba ni valenisoro+ i Jiova kei na duru ni katuba e botana* ga o Tui Esekaia,+ e solia sara vei tui Asiria.
17 E mani tala na Taritani,* na Rapisarisi,* kei na Rapisake* kei na dua na mataivalu levu mai Lakisi+ o tui Asiria vei Tui Esekaia i Jerusalemi.+ Era lako cake sara i Jerusalemi, era lai tu volekata na isalisaliniwai ni tobu e cake ena gaunisala levu ena vanua ni sava isulu.+
18 Nira kaci yani vua na tui me lako mai, e lako yani vei ira o Eliakimi+ na luvei Ilikaia e lewa na vale,* o Sepina+ na vunivola, kei Joa na luvei Esafa e dauvola na ka ni matanitu.
19 E kaya sara na Rapisake: “Yalovinaka dou tukuna vei Esekaia, ‘Qo na ka e tukuna na tui levu, na tui Asiria: “Na cava o vakanuinui tiko kina?+
20 O kaya, ‘E tu vei au na vuku kei na kaukaua meu vala kina,’ ia qori e vosa wale ga. O cei o nuitaka mo beci au kina?+
21 Raica! O vakanuinui ina ititoko gasau sa dasila tu qo o Ijipita,+ ke dua mada ga e ravita ena curuma na qeteqeteniligana qai cula. E vaka kina o Fero na tui Ijipita vei ira kece era vakanuinui vua.
22 Ke oni tukuna vei au, ‘Keimami nuitaki Jiova na neimami Kalou,’+ vakaevei a sega ni kauta tani o Esekaia na nona vanua cecere kei na icabocabonisoro+ qai tukuna vei Juta kei Jerusalemi, ‘Moni cuva ena mata ni icabocabonisoro qo e Jerusalemi’?”’+
23 Ia qo mo bolea mada na noqu turaga na tui Asiria: Au na solia vei iko e 2,000 na ose ke o kunea rawa na tamata mera vodoka.+
24 O na vakadruka vakacava e dua na kovana e dauveiqaravi lailai duadua ni noqu turaga, ni o vakanuinui vei Ijipita me solia vei iko na qiqinivalu kei ira na dauvodo ose?
25 Ia qo e sega ni vakadonuya o Jiova meu lako cake mai meu valuta na vanua qo meu vakarusa? O Jiova sara ga e tukuna vei au, ‘Mo lako cake mo valuta na vanua qo, mo vakarusa.’”
26 E kaya sara o Eliakimi na luvei Ilikaia, o Sepina+ kei Joa vua na Rapisake:+ “Yalovinaka, mo vosa vei ira na nomuni dauveiqaravi ena vosa vakaArame*+ ni keimami kila, mo kua ni vosa vei keimami ena nodra vosa na Jiu nira na rogoca o ira na tiko ena bai.”+
27 Ia e kaya vei ratou na Rapisake: “Vakacava, e talai au ga mai na noqu turaga meu tukuna na vosa qo vei kemudou kei na nomudou turaga? E sega ni talai au tale ga vei ira na tiko ena bai, o ira era na kania na nodra benu ra qai gunuva na nodra suasua vata kei kemudou?”
28 E duri sara na Rapisake qai kacivaka ena domolevu ena nodra vosa na Jiu, e kaya: “Moni rogoca na ka e tukuna na tui levu, na tui Asiria.+
29 Qo na ka e tukuna na tui, ‘Me kua ni lawakitaki kemuni o Esekaia, ni na sega ni vakabulai kemuni rawa mai ligaqu.+
30 Me kua ni rawai kemuni o Esekaia moni nuitaki Jiova ni kaya: “Ena vakabulai keda sara ga o Jiova, ena sega ni soli na koro qo e liga i tui Asiria.”+
31 Moni kua ni vakarorogo vei Esekaia, qo na ka e tukuna na tui Asiria: “Meda veiyaloni, moni soro,* oni na dui kana ga ena nomuni vunivaini kei na nomuni vunilolo, oni na gunu wai tale ga ena nomuni dui mataniwai,
32 meu lako mada yani meu kauti kemuni ina dua na vanua e vaka ga na nomuni vanua,+ na vanua ni covuata kei na waini vou, na vanua ni madrai kei na loganivaini, na vanua ni vuniolive kei na oni. Oni na bula oni na sega ni mate. Moni kua ni vakarorogo vei Esekaia ni vakacalai kemuni, e kaya, ‘O Jiova ena vakabulai keda.’
33 Era bau vakabula na kalou ni veivanua na nodra vanua mai na liga i tui Asiria?
34 I vei o ira na kalou ni Emaci+ kei Apati? I vei o ira na kalou ni Sifavemi,+ Ena kei Iva? Era sa bau vakabulai Samaria mai ligaqu?+
35 O cei mada vei ira kece na kalou ni veivanua e bau vakabula na nodra vanua mai ligaqu me vakabulai Jerusalemi kina o Jiova mai ligaqu?”’”+
36 Ia era galu tiko ga na lewenivanua, era sega ni sauma na nona vosa ni a vakarota na tui, “Moni kua ni vosa vua.”+
37 Eratou lako yani vei Esekaia o Eliakimi na luvei Ilikaia e lewa tiko na vuvale,* o Sepina na vunivola, kei Joa na luvei Esafa e dauvola na ka ni matanitu ni sa dresulaki tu na nodratou isulu, eratou tukuna sara vua na vosa ni Rapisake.
iVakamacala e ra
^ iVakaleka ni Apaija.
^ Raica na iVakamacala ni Vosa.
^ Se “vakatokai me Niusitani.”
^ Oya ena vanua kece, e lewe lailai se lewe levu.
^ Dua na taledi e tautauvata kei na 34.2 na kilokaramu (1,101 na onisi). Raica na iKuri B14.
^ Oya ni botani ena koula.
^ Se “na nodra iliuliu na kauta na mena.”
^ Se “na vakailesilesi liu.”
^ Se “na komada.”
^ Se “valenitui.”
^ Se “vakaSiria.”
^ Ipe., “Moni vosavakayalovinaka vei au, moni lako mai vei au.”
^ Se “valenitui.”
