Vola o Marika 12:1-44
12 E vosa tale vei ira o Jisu ena vosa vakatautauvata ni kaya: “E dua na turaga e tea e dua na loganivaini,+ e vakabaitaka, e kelia e dua na ikeliniwaini, e tara e dua na valececere,+ e lisitaka vei ira eso na dauteitei, qai lako i vanuatani.+
2 Ni sa vulaimatua, e qai tala e dua nona tamata cakacaka me lai kauta mai eso na vuanivaini vei ira na dauteitei.
3 Ia era vesuki koya, ra mokulaka, ra qai vakatalai koya me lesu ligalala.
4 E tala e dua tale nona tamata cakacaka, ia era mokuta na uluna ra qai vosavakacacataki koya.+
5 E qai tala e dua tale, era vakamatei koya tale ga, kei na so tale, eso vei ira qo era mokulaki, so era vakamatei.
6 Sa qai vo vua e dua, na luvena tagane lomani.+ E talai koya sara e muri, e kaya, ‘Era na doka na luvequ.’
7 Ia era kaya na dauteitei, ‘O koya sara ga qo ena taukena na loganivaini.+ Mai, tou vakamatei koya me nodatou na nona ivotavota.’
8 Era kauti koya, ra vakamatea, ra qai kolotaki koya ina taudaku ni loganivaini.+
9 Na cava ena cakava na itaukei ni loganivaini? Ena lako mai me vakamatei ira na dauteitei, qai solia na loganivaini vei ira eso tale.+
10 Oni a sega ni wilika na tikinivolatabu qo? ‘Na vatu era a cata na matai e sa mai ivakadei ni tutunivale.*+
11 Qo e vu mai vei Jiova,* e veivakurabuitaki e matada.’”+
12 Era sa qai via vesuki koya nira kila ni nona vosa vakatautauvata e baleti ira sara ga, ia era rerevaki ira na lewenivanua. Era mani biuti koya tu ra lako yani.+
13 Oti era talai tale mai eso na Farisi kei ira na ito i Eroti mera mai vakavosaka me rawa ni tauca e dua na vosa mera beitaki koya kina.+
14 Nira yaco ga yani era kaya vua: “Qasenivuli, keimami kila ni dau dina na nomuni vosa, oni sega tale ga ni rerevaka e dua, ni oni sega ni kauaitaka na kena irairai e sau, ia oni vakavuvulitaka ga na sala ni Kalou me salavata kei na ka dina. E dodonu me saumi vei Sisa na ivakacavacava se sega?
15 Me keimami sauma se kua?” Ni siqema o Jisu na nodra inaki ca, e kaya vei ira: “Na cava oni vakatovolei au kina? Ni kauta mai vei au e dua na dinari* meu raica.”
16 Era kauta mai vua e dua, e qai kaya vei ira: “Na mata i cei kei na yaca i cei qo?” Era kaya vua: “Nei Sisa.”
17 Mani kaya vei ira o Jisu: “Ni solia vei Sisa na ka e nei Sisa,+ vua na Kalou na ka e nona na Kalou.”+ Dua na ka na nodra qoroi koya.
18 Era lako yani vua na Setoki, o ira na sega ni vakabauta na veivakaturi,+ ra qai tarogi koya:+
19 “Qasenivuli, a vola vei keda o Mosese ke mate e dua na tagane qai sega na luvena, me vakawati o tacina kei na nona yada me rawa ni bau vakaluveni kina.+
20 Eratou le vitu na veitacini tagane. E vakawati na kena imatai qai mate, ia e sega na luvena.
21 Erau qai vakawati o nona yada kei na ikarua ni tacina, ia e mate tale ga ni bera ni vakaluveni, e yaco na ka vata ga qo vua na ikatolu ni tacina.
22 Eratou sega ni vakaluveni kece na le vitu. E qai mate sara e muri o yalewa.
23 Ena gauna ni veivakaturi, o cei vei ratou qo ena watina? Ni ratou a vakawatitaki koya kece na le vitu.”
24 E kaya vei ira o Jisu: “Vakacava, e sega ni vu ni nomuni rai cala na nomuni sega ni kila na iVolatabu se na kaukaua ni Kalou?+
25 Nira vakaturi mai na mate, era na sega ni vakawati na tagane, era na sega tale ga ni soli na yalewa mera vakawati, era na vakataki ira ga na agilosi mai lomalagi.+
26 Ia me baleta na nodra vakaturi na mate, oni sega beka ni wilika na itukutuku ni kau vakavotona ena ivola i Mosese, ni a kaya vua na Kalou: ‘O yau na Kalou i Eparama, na Kalou i Aisake, kei na Kalou i Jekope’?+
27 E sega ni nodra Kalou na mate o koya, e nodra Kalou ga na bula. Sa cala sara ga na nomuni rai.”+
28 E lako mai e dua na vunivola qai rogoca na nodra veivosaki, e kila ni sauma vinaka o Jisu na nodra vakatataro, mani taroga: “Cava na imatai ni ivunau?”*+
29 E sauma o Jisu: “Qo na imatai ni ivakaro, ‘Rogoca, kemuni na Isireli, o Jiova,* na noda Kalou, e dua ga na Jiova,*
30 ia mo lomani Jiova* na nomu Kalou ena lomamu taucoko, ena nomu vinaka taucoko, ena nomu vakasama taucoko, kei na nomu kaukaua taucoko.’+
31 Qo na kena ikarua, ‘Mo lomana na kainomu me vaka nomu lomani iko.’+ E sega tale ni dua na ivunau e uasivi rau na ivunau qo.”
32 E kaya vua na vunivola: “Qasenivuli, e dina na ka oni tukuna, ‘E dua ga o koya, e sega tale ni dua erau le rua,’+
33 na noda lomani koya ena lomada taucoko, noda vakasama taucoko, noda kaukaua taucoko, kei na noda lomani ira na kainoda me vaka noda lomani keda, e uasivia na isoro kama kei na isoro kece.”+
34 Ni kila o Jisu ni sauma vinaka sara ga na vunivola na taro ya, mani kaya vua: “O sa volekata sara na Matanitu ni Kalou.” Oti ya, e sega tale ni dua e doudou me tarogi koya.+
35 E tomana o Jisu nona veivakavulici ena valenisoro ni tukuna: “Era kaya tu vakacava na vunivola ni luvei Tevita o Karisito?+
36 Ni o Tevita mada ga e tukuna ena veiuqeti ni yalo tabu,+ ‘E kaya o Jiova* vua na noqu Turaga: “Dabe ena ligaqu imatau meu vakamalumalumutaki ira mada na kemu meca e ruku ni yavamu.”’+
37 E vakatokai koya o Tevita me ‘Turaga,’ me qai luvena tu vakacava?”+
Era marautaka na ilala levu ya na vakarogoci koya tiko.
38 E kuria nona veivakavulici: “Ni qarauni ira na vunivola nira dau via vakaraitaka wavoki nodra isulu balavu, mera kidavaki ena vanua ni veivoli+
39 mera dabe tale ga ena idabedabe e liu ena valenilotu kei na idabedabe dokai ena gauna ni vakayakavi.+
40 Era dau namuti ira na yada, ra qai masu vakarairai nira masu vakabalavu. O ira qo ena bibi sara na kedra itotogi.”
41 E qai dabe o Jisu ena vanua e raici ira mai kina na lewenivanua nira biuta nodra ilavo ena kato ni cau+ e tu e kea, e levu na vutuniyau era mai biuta kina e levu na ilavo.+
42 E lako mai e dua na yada dravudravua qai biuta e rua na ilavo lailai sara.*+
43 Mani kacivi ratou nona tisaipeli qai kaya vei ratou: “Au tukuna vakadodonu vei kemudou, vei ira kece na mai biu ilavo ena kato ni cau, e levu duadua na kena e biuta na yada dravudravua qo.+
44 Nira biuta na ivovo ni nodra ilavo, ia na yada qo e biuta na qavuna e toka vua, na ka sara ga me bula kina.”+
