Taniela 6:1-28
6 E vinakata o Taraiasi me lesia e 120 na vakailesilesi liu ni yasana mera lewa na matanitu taucoko.+
2 E liutaki ira e tolu na vakailesilesi lelevu, e dua vei ratou o Taniela,+ mera dau tukutuku yani vei ratou o ira na vakailesilesi liu ni yasana+ me kua ni leqa kina na tui.
3 E vakaraitaka tiko ga o Taniela ni duatani vei rau na vakailesilesi lelevu kei ira na vakailesilesi liu ni yasana, ni duatani sara nona vakasama,+ mani nakita na tui me vakacerecerei koya ena matanitu taucoko.
4 Erau qara tiko ena gauna oya na vakailesilesi lelevu, kei ira na vakailesilesi liu ni yasana eso na ka mera beitaki Taniela kina me baleta na matanitu, ia era sega ni kunea e dua na cala se ilawaki ni dau nuitaki o koya, e sega ni kune ni dau vakawelewele se lawaki.
5 Era qai kaya na tagane qo: “Eda na sega sara ga ni raica e dua na ka meda beitaki Taniela kina, eda na kunea ga na ka me vakacalai kina ena lawa ni nona Kalou.”+
6 Era tabili yani vua na tui na vakailesilesi lelevu kei ira na vakailesilesi liu ni yasana, era kaya vua: “Kemuni Tui Taraiasi, moni bula balavu mada ga.
7 Era bosea vata kece na vakailesilesi lelevu, o ira na iliuliu, o ira na vakailesilesi liu ni yasana, o ira na vakailesilesi ena valenitui, kei ira na kovana me vakaturi e dua na lawa ni nona vakatatabu na tui, oya me biu ina qara ni laione o koya e sega ni masu vei kemuni na tui, e masuta ga e dua tale na kalou se tamata ena loma ni 30 na siga.+
8 Ia qo kemuni na tui moni vakatura na lawa moni qai sainitaka+ me kua ni veisau, me vaka ga na lawa ni Mitia kei Perisia, e sega ni boko rawa.”+
9 E sainitaka sara o Tui Taraiasi na lawa kei na vakatatabu.
10 Ia ni kila o Taniela ni sa sainitaki na lawa, e curu sara ina nona vale e dola tu na katubaleka ni nona rumu ena tabavale e cake donui Jerusalemi.+ E tekiduru vakatolu e veisiga me masu, me vakavinavinaka vua na nona Kalou me vaka e dau vakayacora e liu.
11 Ena gauna qori era curu yani na tagane qo era raici Taniela sara ni masu tiko qai kerea me lomani koya na nona Kalou.
12 Era mani torova na tui mera tukuna tale vua na vakatatabu: “Kemuni na tui, oni a sainitaka e dua na lawa me biu ina qara ni laione o koya e sega ni masu vei kemuni na tui, e masuta ga e dua tale na kalou se tamata ena loma ni 30 na siga?” E kaya na tui: “Sa matata vinaka tu qori ena lawa ni Mitia kei Perisia, ena sega ni boko rawa.”+
13 Era kaya sara vua na tui: “E sega ni dokai kemuni na tui o Taniela a kau mai vakavesu e Juta,+ kei na vakatatabu oni sainitaka, ni se masu tiko ga vakatolu e veisiga.”+
14 Ni rogoca ga qori na tui e rarawa vakalevu, e tovolea e dua na sala me vakabulai Taniela kina, e sasaga tiko ga me vakabulai koya me yacova ni dromu na siga.
15 Oti era soqoni yani na tagane qori vua na tui, era kaya vua: “Moni nanuma tiko kemuni na tui, ni na sega ni veisau e dua na vakatatabu se lawa e vakatura na tui ena lawa ni Mitia kei Perisia.”+
16 E mani vakarota na tui me kau yani o Taniela me biu ina qara ni laione.+ E kaya na tui vei Taniela: “Ena vakabulai iko na nomu Kalou o qarava tiko ga.”
17 E kau yani e dua na vatu me sogo kina na gusu ni qara qai dregata na tui ena nona mama vakaturaga kei na nodra mama na nona tamata vakaitutu, me kua ni veisautaki na ka me baleti Taniela.
18 E lako sara na tui ina nona vale vakaturaga. E lolo ena bogi oya, e sega ni vinakata me vakalasai,* e sega tale ga ni moce rawa.
19 Ni kida ga na mataka, e duri na tui me vakatotolo ina qara ni laione.
20 Ni volekata na qara, e kaci yani ena rarawa vei Taniela. E tarogi Taniela na tui: “I Taniela na tamata ni Kalou bula, sa vakabulai iko mai vei ira na laione na nomu Kalou o qarava tiko ga?”
21 E kaya sara vua na tui o Taniela: “Kemuni na tui, moni bula balavu mada ga.
22 E tala mai na noqu Kalou na nona agilosi me sogota na gusudra na laione,+ era sega ni vakamavoataki au+ niu sega ni cala e matana, au sega tale ga ni vakayacora e dua na ka ca vei kemuni na tui.”
23 E marau vakalevu na tui, e vakarota me kau cake mai na qara o Taniela. Ni kau cake mai na qara o Taniela, e sega sara ga ni mavoa, ni nuitaka na nona Kalou.+
24 E qai vakarota na tui mera kau yani na tagane era beitaki* Taniela, era mani biu ena qara ni laione, vaka kina na luvedra kei na watidra. Ni bera mada ga nira tau ena boto ni qara, sa katilaki ira na laione, era quruqurulaka kece na suidra.+
25 E qai volavola o Tui Taraiasi vei ira kece na lewe ni veivanua, na veimatatamata, kei na duivosavosa era tiko e vuravura taucoko:+ “Me levu mada ga na nomuni vakacegu!
26 Au sa vakatura e dua na lewa, oya mera sautaninini ra qai doka* na Kalou i Taniela+ na tamata ena vanua kece e lewa na noqu matanitu. Ni Kalou bula ga o koya, e tudei me tawamudu. Ena sega sara ni vakarusai na nona matanitu, ena sega tale ga ni mudu na nona lewa.+
27 E veivakabulai+ o koya, e veisereki qai vakaraitaka na ivakatakilakila kei na ka veivakurabuitaki mai lomalagi kei vuravura,+ ni vakabulai Taniela mai na yava ni laione.”
28 E toso vinaka na veiqaravi nei Taniela qo ena matanitu nei Taraiasi+ kei na matanitu nei Sairusi na kai Perisia.+
iVakamacala e ra
^ Se rawa ni, “sega nira kau yani na daunivakatagi.”
^ Se “vakaucacataki.”
^ Ipe., “rerevaka.”
