Taniela 7:1-28
7 Ena imatai ni yabaki nei Tui Pelisasari+ e Papiloni, e tadra o Taniela e raivotu tale ga ni davo tiko ena nona idavodavo.+ E qai vola o koya na tadra,+ e vola na kena itukutuku taucoko.
2 E kaya o Taniela:
“Au vakararai tiko ena noqu raivotu ena bogi, ia raica! e yavalata na wasawasa levu na va na cagi ni lomalagi.+
3 E qai lako mai wasawasa e va na manumanu lelevu,+ eratou duidui.
4 “Na kena imatai e vaka na laione,+ e tiko vua na taba ni ikeli.+ Au rai tiko ga sa cavu tani na tabana ruarua, e laveti mai na qele me vakaduri ena rua na yavana me vaka na tamata qai soli vua na yalo ni tamata.
5 “Raica! e dua tale na manumanu, na kena ikarua, e vaka na bea.+ E laveta tu e dua na yavana, e katia tiko e tolu na sui ni sarisari e gusuna qai tukuni vua, ‘Tucake, kania vakalevu na lewe.’+
6 “Oti qori au vakararai tiko ga, ia raica! e dua tale na manumanu e vaka na lepate,+ e tiko e dakuna e va na tabana e vaka na taba ni manumanuvuka. E va na ulu ni manumanu qo,+ e soli vua na kaukaua me lewa.
7 “Oti qo au vakararai tiko ga ena raivotu ni bogi au mani raica na ikava ni manumanu, e vakarerevaki, e vakadomobula, e duatani sara na kena kaukaua, e ka lelevu na batina kaukamea. E dau basuraka, e kania, e buturaka e yavana na ka e vo.+ E duatani sara vei ratou na vo ni manumanu e liu vua, e tini na kena ileu.
8 Niu vakananuma tiko na ileu, au raica e dua tale na ileu lailai+ ni tubu ena kedra maliwa, e tacavu mai matana e tolu na ileu sa tu rawa. Raica! e vakamatana na ileu qo me vaka na mata ni tamata, e tiko na gusuna e vosa vakaviavialevu.+
9 “Au vakararai tiko ga sa tuva tu eso na idabedabe vakaturaga qai dabe+ o Koya e Dede sara na nona bula.+ E vulavula na nona isulu me vaka na ucacevata,+ na drauniuluna e vaka na vutinisipi savasava. Na nona idabedabe vakaturaga na yameyame ni bukawaqa, na kena qiqi na bukawaqa.+
10 E drodro qai lako mai vua na uciwai bukawaqa.+ Era qaravi koya e udolu vakaudolu, era duri tu e matana e oba vakaoba.*+ Sa dabe na Mataveilewai+ qai tevu eso na ivola.
11 “Au vakararai tiko ena gauna qori ni rogo tiko na vosa viavialevu e tukuna na ileu,+ au vakararai tiko me vakamatei sara na manumanu, e vakarusai na yagona qai vakamai.
12 Ia o ratou na vo ni manumanu+ e kau tani na nodratou lewa, e vakabalavutaki na nodratou bula me dua na gauna kei na dua na yabaki.
13 “Au vakararai tiko ga ena raivotu ni bogi, ia raica! e lako tiko mai e dua e vaka na luve ni tamata ena o ni lomalagi,+ e vakadonui me lako vei Koya e Dede sara na nona bula,+ era kauti koya voleka yani vua.
14 E soli vua na lewa,+ na lagilagi,+ kei na matanitu mera qaravi koya kece na lewe ni veivanua, na veimatatamata, kei na duivosavosa.+ Na nona lewa na lewa e sega ni mudu, ena sega ni oti, kei na nona matanitu ena sega ni vakarusai.+
15 “Ia o yau o Taniela e rarawa na lomaqu ni vakarerei au na ka au raivotutaka.+
16 Au mani torova e dua vei ira na duri tu e kea meu taroga vua na ibalebale dina ni ka qo. E vosa mai o koya me vakatakila vei au na ibalebale ni ka qo.
17 “‘Na va na manumanu lelevu qo,+ e va na tui eratou na tubu e vuravura.+
18 Ia ena soli na matanitu+ vei ira na yalosavasava nei koya e Cecere,+ era na taukena na matanitu+ me sega ni mudu, io me tawamudu.’
19 “Au via kila eso tale na ka me baleta na ikava ni manumanu ni duidui vei ratou na kena vo, e vakadomobula sara, e kaukamea na batina, e kopa na kena iqaso, e dau basuraka, e kania qai buturaka e yavana na ka e vo,+
20 vaka kina na tini na ileu+ e toka e uluna, kei na dua tale na ileu e tubu mai qai bale e matana e tolu na ileu,+ na ileu qo e vakamatana, e vosa vakaviavialevu na gusuna, e levu toka na kena irairai vei ratou na kena vo.
21 “Au raica tiko ga ni valuti ira na yalosavasava na ileu oya, e qaqa vei ira,+
22 me yacova ni lako mai o Koya e Dede sara na nona bula+ qai tauca na lewa ni tokoni ira na yalosavasava nei koya e Cecere,+ e yaco tale ga na gauna lokuci mera taukena na matanitu o ira na yalosavasava.+
23 “Qo na ka e kaya: ‘Na ikava ni manumanu, oya na ikava ni matanitu ena basika e vuravura. Ena duidui vei ira na vo ni matanitu kece, ena kania na vuravura taucoko, ena butubutulaka qai basubasuraka.+
24 Ia na tini na ileu e tini na tui ena tubu mai ena matanitu oya, ena tubu mai e dua tale me taravi ratou qori, ena duidui vei ratou na liu, ena vakalolovirataka o koya e tolu na tui.+
25 Ena vosavakacacataki koya e Cecere Duadua,+ ena vakacacani ira tiko ga na yalosavasava nei koya e Cecere. Ena via veisautaka na gauna kei na lawa, era na soli vua me dua na gauna, me so na gauna, kei na veimama na gauna.*+
26 Sa dabe na Mataveilewai ra qai kauta tani na nona lewa, mera vakawabokotaki koya, mera vakarusai koya vakadua.+
27 “‘E qai soli vei ira na yalosavasava nei koya e Cecere na matanitu, na lewa, kei na kedra lagilagi na matanitu e ruku i lomalagi taucoko.+ Na nodra matanitu na matanitu e sega ni mudu,+ na veivanua kece era na qaravi ira ra qai talairawarawa vei ira.’
28 “Qo na itinitini ni ka oya. O yau o Taniela, e vakarerei au vakalevu na ka au vakasamataka, e veisau kina na irairai ni* mataqu, ia au tugana e lomaqu na ka qo.”
iVakamacala e ra
^ Se “e tini na udolu vakatini na udolu.”
^ Qo e tolu veimama na gauna.
^ Se “e vulaci kina na.”
