Vakarua 32:1-52
32 “Mo vakatudaliga lomalagi, au na qai vosa,Me rogoca tale ga o vuravura na vosa ni gusuqu.
2 Ena tau vaka na uca noqu ivakasala,Ena mimiri vaka na tegu noqu vosa,Ena vaka na miri ni uca ena veicoEna vaka tale ga na bisa ni uca ena kau.
3 Niu na kacivaka na yaca i Jiova.+
Tukuna na lagilagi ni noda Kalou!+
4 Na Uluvatu, e uasivi nona cakacaka,+Ni dodonu na nona sala kece.+
E Kalou yalodina,+ e sega vakadua ni lewacala,+E yalododonu qai daudina o koya.+
5 O ira ga e ca na nodra ivalavala.+
Era sega ni luvena, e nodra cala ga.+
Era itabatamata takelo qai yalovakatani!+
6 Vakaevei me va qo na ka oni cakava vei Jiova,+Kemuni na tamata yalowai qai lialia?+
E sega ni Tamamu o koya e vakavuna nomu bula,+O koya e buli iko qai vakataudeitaki iko?
7 Nanuma na veisiga makawa,Vakasamataka na veiyabaki ni veitabatamata sa sivi.
Tarogi tamamu, ena qai tukuna vei iko,+Kei ira na nomu qase, era na qai vakatakila vei iko.
8 Ni o Koya e Cecere Duadua e solia nodra ivotavota na veimatanitu,+Ni wasei ira yadudua+ na luvei Atama,*E vakadeitaka o koya na nodra iyalayala ni vanua na veimatatamata+Me vaka na kedra iwiliwili na luvei Isireli.+
9 Ni o ira na tamata i Jiova era nona iwasewase,+O Jekope e nona ivotavota.+
10 A kunei koya ena vanua talasiga+Ena vanua dravuisiga+ tale ga e lala qai rogo voli kina na qoqolou.
E viribaiti koya e veimaroroi, qai karoni koya,+E taqomaki koya tale ga me vaka ga na loa ni matana.+
11 Me vaka na ikeli ni yavalata nona sova,E cakurobaroba vei ira na luvena,E vakatetaba qai kauti ira,E vukataki ira e tabana,+
12 O Jiova duadua ga e tuberi koya*+ voli,E sega ni tiko kei koya e dua na kalou tani.+
13 E cakava me vodo yani ena veivanua cecere kei vuravura,+Me kania kina o koya na vuaniqele.+
E vakabulabulataki koya ena denioni mai na vatuKei na waiwai mai na uluvatu momoto,
14 Na bata mai na qelenibulumakau kei na sucu mai na qelenisipi,Kei na sipi vinaka duadua,*Kei na tamanisipi ni Pasani, kei na me tagane,Kei na witi vinaka duadua,*+O qai gunu waini mai na dra* ni vuanivaini.
15 Ni sa levulevu o Jesuruni,* e teke vakaviavialevu.
O sa levulevu mai, o sa vavaku mai, o sa vuvuce mai.+
Mani biuta na Kalou e buli koya,+Qai beca na Uluvatu e vakabulai koya.
16 Era bukani koya me cudruvi ira vakalevu na kalou tani,+Era vakacudrui koya tiko ena veika vakasevaki.+
17 Era vakacaboisoro tiko vei ira na timoni, sega vua na Kalou,+Vei ira na kalou era sega ni kila,Era se qai ka vou ga mai,Vei ira na kalou era sega ni kila na tukamuni.
18 Oni sa guilecavi koya na Uluvatu+ e tamamuni voli,Oni sega tale ga ni nanuma na Kalou e vakavuna nomuni sucu.+
19 Ni raica qori o Jiova, e besetaki ira+Nira sa vakacudrui koya na luvena tagane kei na luvena yalewa.
20 E mani tukuna o koya, ‘Au na vunia vei ira na mataqu,+Au na raica se cava ena yacovi ira.
Nira itabatamata yalovakatani,+Na gone e sega vei ira na yalodina.+
21 Era vakavuna meu cudru vakalevu* ena vuku ni ka e sega ni kalou,+Era vakacudrui au ena nodra matakau macawa.+
Au na vakavuna gona mera vuvutaka na ka e sega ni tamata,+Au na vakavuna me vakacudrui ira e dua na matanitu sesewa.+
22 Ni sa waqaca na buka na noqu cudru+Ena kama sobu sara ina veivanua titobu ina iBulubulu,*+Ena qai yameca na vuravura kei na vuanaEna vakawaqara tale ga na yavu ni veiulunivanua.
23 Au na vakalevutaka na nodra leqa,Au na vakayagataka kece vei ira na noqu gasau.
24 Era na dadaga mai na walokai+Ena qai vakaoti ira na matetaka kei na rusa vakaloloma.+
Au na tala yani vei ira na bati ni manumanu+Kei na weli gaga ni manumanu qasi ni kuvuniqele.
25 E tuba, era na kau tani ena iseleiwau,+E loma, ena yaco na domobula+Vei rau ruarua na cauravou kei na goneyalewa,Na gonedramidrami kei na tamata ulusikoa.+
26 Au rawa ni kaya: “Au na cakava mera talabusese,Au na bokoca na kedra ivakananumi ena kedra maliwa na tamata,”
27 Au kauaitaka nodra veivakanini na meca,+De na cala nodra nanuma+ na dauveitusaqati.
De ra na kaya: “Keimami sa qaqa ena neimami kaukaua,+E sega ni cakava na ka kece qo o Jiova.”
28 Nira dua na matanitu e sega vei ira na vuku,*E sega tale ga ena kedra maliwa na yalomatua.+
29 Ke ra vuku+ mada ga! Era na vakasamataka vakabibi na ka qo.+
Era na vakasamataka na kedra itinitini.+
30 Ena cemuria vakacava e le 1,000 e dua,Ena cemuria tale ga vakacava e le 10,000 e rua?+
Vakavo sara ke sa volitaki ira+ na nodra UluvatuQai soli ira yani o Jiova.
31 Ni nodra uluvatu e sega ni tautauvata kei na noda Uluvatu,+Era kila mada ga qo na keda meca.+
32 Ni nodra vunivaini na vunivaini ni SotomaMai na veibaba tale ga kei Komora.+
Na kedra vuanivaini na vuanivaini poisoni,Na kedra isoso vuanivaini e gaga.+
33 Na medra waini na weli gaga ni gata lelevu,Na poisoni veivakaleqai ni gata uluraba.*
34 Vakaevei e sega ni maroroi tu vei au,Qai dregati vinaka tu ena noqu valenimaroroi iyau?+
35 E noqu na veisausaumi kei na veitotogitaki,+Ena gauna lokuci ni tidara na yavadra,+Ni sa voleka na siga mera leqa kina,Qai yaco totolo mai na ka sa waraki ira tu.’
36 Ni na lewai ira nona tamata o Jiova,+Ena qai lomani ira* na nona dauveiqaravi+Ni raica ni sa lailai nodra kaukaua,Ra qai vo wale tu ga na vakaloloma kei na malumalumu.
37 Ena qai kaya o koya, ‘I vei na nodra kalou,+Na vatu era lai vaqara vakaruru kina,
38 O koya e dau kania na uro ni nodra isoro,*E gunuva na waini ni nodra isoro livi?+
Mera duri mai qai vukei kemuni.
Mera mai nomuni vanua ni ivakaruru.
39 Raica o yau ga qo—o yau ga o koya,+Qai sega tale ni dua na kalou, o yau ga.+
Au veivakamatei, au veivakabulai+ tale ga.
Au veivakamavoataki,+ au na cakava tale ga me mavo,+Qai sega ni dua e veivakabulai rawa mai ligaqu.+
40 Niu laveta na ligaqu meu bubului,*Au qai bubuluitaka: “Me vaka niu bula tawamudu+ dina,”
41 Keu vagatara na noqu iseleiwau tatibiQai vakarautaka na ligaqu me vakataulewa,+Au na veisausaumi vei ira na kequ meca+Qai veitotogitaki vei ira na cati au.
42 Au na cakava me mateni ena dra na noqu gasau,Ena kania tale ga na lewe na noqu iseleiwau,Kei na nodra dra na mate kei ira na vesu,Kei na uludra na iliuliu ni meca.’
43 Ni marau na veimatanitu kei ira na nona tamata,+Ni na sauma o koya na nodra dra na nona dauveiqaravi,+Ena qai veisausaumi vei ira na kena meca+Ena veisorovaki* ena vuku ni nodra vanua na nona tamata.”
44 E lako gona mai o Mosese qai cavuqaqataka na qaqa ni sere kece qo, nira vakarorogo tu na tamata,+ o koya kei Osia*+ na luvei Nuni.
45 Ni cavuta oti ga o Mosese na vosa kece qo vei ira na Isireli taucoko,
46 e kaya vei ira: “Moni tugana e lomamuni na vosa kece ni noqu ivakasala vei kemuni nikua,+ moni vakaroti ira kina na luvemuni, mera qarauna mera cakava sara na vosa kece ni Lawa+ qo.
47 Ni sega ni vosa wale qo vei kemuni, ni oni na bula kina,+ oni na qai bula dede ena vuku ni vosa qo, ena vanua oni na lai taukena ni oni sa takosova na Joritani.”
48 E vosa vei Mosese ena siga oya o Jiova, e kaya:
49 “Cabe ina ulunivanua qo e Aparimi,+ na Ulu i Nipo+ ena vanua o Moapi e qara yani i Jeriko, qai raica na vanua o Kenani au solia tiko vei ira na Isireli mera taukena.+
50 O na qai mate ena ulunivanua o vakarau cabeta, o na lai davo vata kei ira na wekamu,* vaka ga nona mate e Ulu i Ori+ na tuakamu o Eroni, qai lai davo vata kei ira na wekana,
51 ni drau a sega ni yalodina ruarua vei au ena kedra maliwa na Isireli, ena wai kei Meripa+ mai Ketesa, ena vanua talasiga o Jini, ni drau sega ni vakarokorokotaki au ena matadra na lewe i Isireli.+
52 O na raica tu ga vakayawa na vanua, ia o na sega ni curuma na vanua au sa solia tiko vei ira na lewe i Isireli.”+
iVakamacala e ra
^ Se rawa ni, “na kawatamata.”
^ Oya o Jekope.
^ Ipe., “uro ni.”
^ Ipe., “uro ni ivi ni.”
^ Se “na wai.”
^ Kena ibalebale “O Koya e Yalododonu,” na icavuti vakarokoroko kei Isireli.
^ Se “meu vuvutaka.”
^ Se “Seoli,” oya na ibulubulu ni kawatamata. Raica na iVakamacala ni Vosa.
^ Se rawa ni “didivara ena ivakasala.”
^ Qo e dua na gata poisoni e dau laurai vakalevu e Esia kei Aferika.
^ Se “Ena qai veivutuni ena vukudra.”
^ Se “e dau kania na nodra isoro vinaka duadua.”
^ Ipe., “i lomalagi.”
^ Se “Ena vakasavasavataki.”
^ Yaca taumada i Josua. Osia na ivakaleka ni Osaia, kena ibalebale na “Vakabulai koya o Ja, Veivakabulai o Ja.”
^ Qo na ka e dau tukuni ni dua e mate.
