Vakatakila e Vola o Joni 19:1-21
19 Oti na ka kece qo, au rogoca sara e dua na domolevu e vaka na domo ni dua na ilala levu mai lomalagi. Era kaya: “Vakacaucautaki Ja!*+ E iVakabula na noda Kalou, e lagilagi, e kaukaua,
2 ni dina qai dodonu na nona lewa.+ E sa tauca na kena itotogi na saqamua levu e vakadukadukalitaki vuravura voli ena nona veiyacovi tawadodonu,* e sa sauma vua na nodra dra na nona dauveiqaravi era mate e ligana.”*+
3 Sega ni bera nodra kaya ena ikarua ni gauna: “Moni vakacaucautaki Ja!*+ E kuvu cake tiko ga me tawamudu na kena kubou.”+
4 Era mani tekicuva na 24 na qase+ kei ratou na va na kabula+ mera qarava na Kalou e dabe tiko ena idabedabe vakaturaga, ra qai kaya: “Emeni! Vakacaucautaki Ja!”*+
5 E rogo tale ga mai na idabedabe vakaturaga e dua na domo e kaya: “Ni vakacaucautaka tiko ga na noda Kalou, o kemuni kece na nona dauveiqaravi+ oni rerevaki koya, na vetaira kei na vetaicake.”+
6 Au rogoca sara e dua na rorogo e vaka na domo ni dua na ilala levu, e vaka na vakere ni wai levu kei na vavadugudugu ni kurukuru. Era kaya: “Vakacaucautaki Ja,*+ ni sa tekivu veiliutaki vakatui+ o Jiova* na noda Kalou Kaukaua Duadua!+
7 Meda marau, meda marau vakalevu, meda vakalagilagi koya, ni sa yaco mai na gauna ni nona vakamau na Lami, sa vakarautaki koya tu na watina.
8 Io, e sa vakadonui me vakaisulu ena lineni matailalai, e savasava qai sekavula—ni lineni matailalai e vakaibalebaletaka na nodra cakacaka dodonu na yalosavasava.”+
9 E qai kaya vei au, “Vola: Era marau na sureti ina ivakayakavi ni vakamau ni Lami.”+ E kaya tale ga vei au: “Qo na vosa dina ni Kalou.”
10 Oti ya au tekicuva e yavana meu qaravi koya. Ia e kaya vei au: “Qarauna! Kua ni cakava qori!+ O yau na nomu itokani dauveiqaravi ga, au nodra itokani dauveiqaravi tale ga na tacimu era dau tukuni Jisu.+ Qarava na Kalou,+ na inaki ga ni parofisai me vakatakilai kina o Jisu.”+
11 Au raica ni tadola na lomalagi, au raica sara e dua na ose vula.+ O koya e vodo tiko kina e yacana o Yalodina+ kei na Daudina,+ e veilewai qai vala tale ga ena yalododonu.+
12 Na yalokanimatana na yameyame ni bukawaqa,+ e toka e uluna e levu na isala vakatui.* E volai na yacana e sega tale ni dua e kila, o koya duadua ga,
13 e dara tale tu ga e dua na isulu e sau e takava* tu na dra, e vakatokai ena yaca Na Vosa+ ni Kalou.
14 Kena ikuri, era vodoka tiko na ose vula na mataivalu ni lomalagi era muri koya, era vakaisulu tale ga ena lineni matailalai e vulavula qai savasava.
15 E dara mai gusuna e dua na iseleiwau balavu gata,+ me ravuta kina na veimatanitu, ena vakatawai ira ena ititoko kaukamea.+ E butulaka tale ga o koya na ikeliniwaini ni cudru waqawaqa ni Kalou Kaukaua Duadua.+
16 E volai tale ga ena nona isulu e sau donuya na sagana e dua na yaca, nodra Tui na tui, nodra Turaga na turaga.+
17 Au raica tale ga e dua na agilosi e duri tu ena matanisiga, e kacivaka ena domolevu vei ira na manumanuvuka kece e macawa: “Mai, ni mai soqovata ena ivakayakavi levu e vakarautaka na Kalou,+
18 moni kania na lewedra na tui, na lewedra na komada ni mataivalu, na lewedra na tamata kaukaua,+ na lewedra na ose kei ira na vodoka,+ na lewe ni tamata kece, o ira na galala, o ira na bobula, o ira na vetaira, kei ira na vetaicake.”
19 Au qai raica na manumanu kila, na tui kei vuravura, kei na nodra mataivalu nira soqoni vata mera vala kei koya e vodo ose tiko kei na nona mataivalu.+
20 E qai tobo na manumanu kila vata kei na parofita lasu+ e cakava e matana na ivakatakilakila e vakacalai ira kina na tu vei ira na ivakatakilakila ni manumanu kila,+ kei ira na qarava na kena ivakatakarakara.+ Erau kolotaki bulabula ina drano bukawaqa e caudre tu ena sulifure.+
21 Ia na kena vo era vakamatei ena iseleiwau balavu i koya e vodo tiko ena ose,+ na iseleiwau e dara mai gusuna. Era mamau sara ga na manumanuvuka kece ena lewedra.+
iVakamacala e ra
^ Se “Aleluya!” Na “Ja” na ivakaleka ni yaca Jiova.
^ Kirisi, por·neiʹa. Raica na iVakamacala ni Vosa.
^ Kir., “mai ligana.”
^ Se “Aleluya!” Na “Ja” na ivakaleka ni yaca Jiova.
^ Se “Aleluya!” Na “Ja” na ivakaleka ni yaca Jiova.
^ Se “Aleluya!” Na “Ja” na ivakaleka ni yaca Jiova.
^ Se “na ivauniulu vakatui.”
^ Se rawa ni, “e kureitaki.”
