Vosa Vakaibalebale 29:1-27
29 O koya e domoqa* ni vunauci wasoma+Ena musuki vakasauri qai sega ni vakabulai.+
2 Nira lewe levu na yalododonu era marau na lewenivanua,Ia nira veiliutaki na tamata ca, era vutugu na lewenivanua.+
3 Na tamata e taleitaka na vuku e vakamarautaki tamana,+Ia o koya e veitokani kei ira na saqamua, e vakasabusabutaka na nona iyau.+
4 Ena lewadodonu e vakataudeitaka na tui na vanua,+Ia o koya e qara me vaqumi e vakaleqa.
5 Na tamata e cavilaka na wekanaE tevuka na lawa me corita na yavana.+
6 Ni cakacala na tamata ca e coriti kina,+Ia o koya e yalododonu e kaila ena reki qai marau vakalevu.+
7 Na yalododonu e kauaitaka na nona dodonu na dravudravua,+Ia na tamata ca e sega ni via kauai kina.+
8 O ira na dau tukutukuni ira era vakacudruya na tauni,+Ia o ira na vuku era vakaseavutaka na cudru.+
9 Ni veileti na tamata vuku kei na tamata lialia,Ena tubu na vosavosa kei na veivakalialiai, ia e sega na vakacegu.+
10 O ira na via vakadavedra era cati ira na sega ni cala,+Era via vakamatea na yalododonu.*
11 Na tamata yalowai e talaucaka kece na lomana,+Ia o koya e vuku e galu qai lewa vinaka.+
12 Ni rogoca matua na turaga na vosa lasu,Era na tamata ca kece na nona dauveiqaravi.+
13 Na tamata dravudravua kei na dau veivakalolomataki erau tautauvata:*
O Jiova e vakararamataka na matadrau ruarua.*
14 Na tui e lewai ira vakadodonu na dravudravua,+Ena vakataudeitaki tiko ga na nona idabedabe vakaturaga.+
15 Na kau* kei na ivunau e veivakavukui,+Ia na gone e sega ni lewai ena vakamaduataki tinana.
16 Ni levu mai na tamata ca, e levu na cala,Ia o ira na yalododonu era na raica na nodra bale.+
17 Mo vakavulica na luvemu ena qai vakacegui iko o koya,Ena vakamarautaki iko vakalevu o koya.+
18 Ni sega na raivotu* era lako vakaveitalia na lewenivanua,+Ia era marau o ira na muria na lawa.+
19 E sega ni vinakata na dauveiqaravi me vakadodonutaki ena vosa,E kila tiko ia e sega ga ni muria.+
20 O sa raica na tamata e dau totolo ni vosa?+
Ena vinaka sara nona veisiga nimataka na tamata lialia ni vakatauvatani kei koya.+
21 Ke vakamenemenei na dauveiqaravi ni se gone,Ena sega ni dau vakavinavinaka ena gauna mai muri.
22 O koya e dau cudru e vakatubuveiba,+O koya e dau cudru katakata e levu na nona cala.+
23 Na viavialevu ni tamata ena vakamalumalumutaki koya,+Ia o koya e yalomalumalumu ena vakalagilagi.+
24 O koya e veitokani kei na daubutako e cati koya ga.
De rogoca na kaci me vakamacala,* ia e sega ni tukuna e dua na ka.+
25 Na rerevaka na tamata eda tacori kina,+Ia o koya e nuitaki Jiova ena taqomaki.+
26 Levu era via bose* vata kei na turaga,Ia e vakavuna o Jiova me lewai vakadodonu na tamata.+
27 Na tamata lewa ca era sevaka na yalododonu,+Ia na ivalavala ni tamata yalododonu e sevaka na tamata ca.+
iVakamacala e ra
^ Se “yalokaukaua tiko ga.”
^ Se rawa ni, “Ia na yalododonu e via taqomaka na nona bula.”
^ Ipe., “sota.”
^ Oya ni solia vei rau na bula.
^ Se “ivakavuvuli, itotogi.”
^ Se “raivotu vakaparofisai, vakatakila.”
^ Se “na bubului ni veicudruvi.”
^ Se rawa ni, “vinakata mera lomani.” Ipe., “qara na mata ni.”
