Vunau ni Soro 14:1-57
14 E vosa tale vei Mosese o Jiova, e kaya:
2 “Qo na lawa ena vuku i koya e vukavuka ena siga e vakadeitaki kina nona vakasavasavataki, ni sa kau vua na bete.+
3 Ena lako ena taudaku ni keba na bete qai dikevi koya. Ke sa bula mai na vukavuka o koya e tauvi vukavuka,
4 ena vakaroti koya na bete me kauta yani e rua na manumanuvuka savasava rau se bula tu, na kau sitari, na isulu kulakula, kei na isopi me vakasavasavataki+ kina o koya.
5 Ena vakarota na bete me vakamatei e dua na manumanuvuka ena dela ni itawatawa qele e tu kina na waidranu.
6 Ia me taura o koya na manumanuvuka se bula tiko, kei na kau sitari, na isulu kulakula, kei na isopi, me tonia vata ena dra ni manumanuvuka a vakamatei e dela ni waidranu.
7 Ena qai kureitaka vakavitu vei koya e vakasavasavataki tiko mai na vukavuka, oti me tukuna ni sa savasava o koya, ena qai laiva me vuka yani e lomanivanua+ na manumanuvuka se bula tu.
8 “Me savata na nona isulu o koya e vakasavasavataki tiko, qai toroya na yagona taucoko, me sili tale ga ena wai, ena qai savasava. Oti oya e rawa ni lako i loma ni keba, ia ena tiko ga ena taudaku ni nona valelaca me vitu na siga.
9 Ena ikavitu ni siga, me toroya na drauniuluna kece, na kumina, kei na vacuna. Ni toroya oti kece na vutiniyagona, ena savata na nona isulu, me sili tale ga ena wai, ena qai savasava o koya.
10 “Ena ikawalu ni siga, ena kauta o koya e rua na luvenisipi tagane vinaka, e dua na lami yalewa+ vinaka yabaki dua, e tolu na ikatini na efa* falawa vinaka sara e vakawaiwaitaki me isoro kakana,+ kei na dua na loka* na ivakarau ni waiwai,+
11 na bete tale ga e tukuna ni sa savasava o koya, ena kauta na tamata e vakasavasavataki tiko, kei na isoro, ena mata i Jiova ena icurucuru ni valelaca ni veitavaki.
12 Ena taura na bete e dua na luvenisipi tagane qai cabora me isoro ni cakacala+ kei na dua na loka na ivakarau ni waiwai, ena qai yalovaka me isoro yalovaki ena mata i Jiova.+
13 Ena qai vakamatea na luvenisipi tagane ena vanua vata ga e dau vakamatei+ kina na isoro ni ivalavala ca kei na isoro kama, ena dua na vanua tabu, baleta, me vaka ga na isoro ni ivalavala ca, na isoro ni cakacala e nona na bete.+ Qo e ka tabu sara.+
14 “Ena qai taura na bete eso na dra ni isoro ni cakacala, ena biuta na bete ena belenidaligana imatau o koya e vakasavasavataki tiko, ena idovidovinikakana tale ga ni ligana imatau, kei na iqaqalo levu ni yavana imatau.
15 Ena qai taura na bete eso na waiwai mai na dua na loka na ivakarau ni waiwai+ qai livia ena qeteqeteniligana imawi.
16 Ena qai tonia na bete na iqaqaloniligana imatau ena waiwai e tu ena qeteqeteniligana imawi, qai kureitaka vakavitu ena iqaqaloniligana eso na waiwai ena mata i Jiova.
17 Ena qai biuta na bete eso na waiwai e vo tu ena qeteqeteniligana, ena belenidaligana imatau i koya e vakasavasavataki tiko, ena idovidovinikakana tale ga ni ligana imatau, kei na iqaqalo levu ni yavana imatau, ena dela ni dra ni isoro ni cakacala.
18 Ena biuta na bete na waiwai e vo tu e qeteqeteniligana ena ulu i koya e vakasavasavataki tiko, ena qai sorovaki koya na bete ena mata i Jiova.+
19 “Ena cabora na bete na isoro ni ivalavala ca,+ qai veisorovaki ena vuku i koya e vakasavasavataki tiko mai na nona duka, oti oya ena qai vakamatea o koya na isoro kama.
20 Ena cabora tale ga na bete na isoro kama kei na isoro kakana+ ena icabocabonisoro, ena veisorovaki ena vukuna na bete,+ ena qai savasava+ o koya.
21 “Ia ke dravudravua o koya qai sega ni veirauti na ka e tu vua, ena kauta e dua na luvenisipi tagane me isoro ni cakacala, me isoro yalovaki me veisorovaki ena vukuna, kei na dua na ikatini na efa* falawa vinaka sara e vakawaiwaitaki me isoro kakana, e dua na loka na ivakarau ni waiwai,
22 e rua tale ga na kukuru se rua na ruve gone, me vakatau ga ena ka e rawata. E dua me isoro ni ivalavala ca, dua tale me isoro kama.+
23 Ena ikawalu ni siga,+ ena kauta yani o koya me vakadeitaki kina nona vakasavasavataki vua na bete ena icurucuru ni valelaca ni veitavaki, ena mata i Jiova.+
24 “Ena kauta na bete na luvenisipi tagane e isoro ni cakacala+ kei na dua na loka na ivakarau ni waiwai, ena qai yalovaka na bete me isoro yalovaki ena mata i Jiova.+
25 Ena qai vakamatea na luvenisipi tagane e isoro ni cakacala, ena taura tale ga eso na dra ni isoro ni cakacala na bete qai biuta ena belenidaligana imatau i koya e vakasavasavataki tiko, ena idovidovinikakana tale ga ni ligana imatau, kei na iqaqalo levu ni yavana imatau.+
26 Ena livia na bete eso na waiwai ena qeteqeteniligana imawi,+
27 ena qai kureitaka vakavitu ena dua na iqaqaloniligana imatau ena mata i Jiova eso na waiwai e tu ena qeteqeteniligana imawi.
28 Ena qai biuta na bete eso na waiwai e tu ena qeteqeteniligana ena belenidaligana imatau i koya e vakasavasavataki tiko, ena idovidovinikakana tale ga ni ligana imatau, kei na iqaqalo levu ni yavana imatau, ena vanua vata ga e biuta kina na dra ni isoro ni cakacala.
29 Ena qai biuta na bete na waiwai e vo tu e qeteqeteniligana ena ulu i koya e vakasavasavataki tiko, me veisorovaki ena vukuna ena mata i Jiova.
30 “Ena cabora o koya e dua na kukuru se dua na ruve gone, me vakatau ena ka e rawata,+
31 na ka ga e rawata o koya me isoro ni ivalavala ca, kei na dua tale me isoro kama+ kei na isoro kakana, ena qai veisorovaki na bete ena vuku i koya e vakasavasavataki tiko ena mata i Jiova.+
32 “Qo na lawa me baleti koya a tu vua na mate ni vukavuka, ia e sega tu vua na ka me vakadeitaki kina na nona vakasavasavataki.”
33 E qai kaya vei Mosese kei Eroni o Jiova:
34 “Ni oni sa yaco ina vanua o Kenani,+ au sa solia tiko moni taukena,+ au qai vakadukara e dua na vale ena nomuni vanua ena mate ni vukavuka,+
35 me qai lako o koya e nona na vale me tukuna vua na bete, ‘E laurai e noqu vale e dua na ka e vaka na mate.’
36 Ena vakarota na bete me vakalalai na vale ni bera ni lako yani me lai dikeva na mate, me kua kina ni tukuna ni dukadukali na ka kece e lomanivale, oti oya ena qai curu i loma na bete me vakadikeva na vale.
37 Ena dikeva o koya na vanua e tauva tu na mate, ke vakaduka na lalaga ni vale na tikina kikilo e drokadroka via dromodromo se damudamu, qai laurai ni kakana i loma ni lalaga,
38 ena qai curu i tautuba na bete donuya na katuba ni vale, qai korotinitaka na vale me vitu na siga.+
39 “Ena qai lesu yani na bete ena ikavitu ni siga me vakadidike. Ke sa tete na duka ina lalaga ni vale,
40 ena qai vakarota na bete me kau laivi na vatu era vakadukai tu, qai kolotaki ena taudaku ni koro ena dua na vanua dukadukali.
41 Me qai raica me kari vakavinaka na lomanivale, ia na palasita kei na mota e kau laivi me qai biu ena taudaku ni koro ena dua na vanua dukadukali.
42 Era na qai vakacuruma eso tale na vatu me isosomi ni vatu era sa kauta laivi, ena vakayagataka o koya e duatani na mota, qai palasitataka na vale.
43 “Ke mani basika tale na duka qai tekivu tete ena vale ni sa kau laivi na vatu, kari tale ga na vale qai palasitataki tale,
44 ena qai lako i loma na bete me vakadikeva. Ke sa tete na duka ena vale, qo na vukavuka+ ni vale e sega na kena iwali. E dukadukali na vale.
45 Ena raica me basu na vale—na kena vatu, na kena kau, na palasita kece kei na mota ni vale—qai kau laivi ina taudaku ni koro ina dua na vanua dukadukali.+
46 Ia o koya e curuma na vale ena siga kece e korotinitaki+ kina, ena dukadukali me yacova na yakavi,+
47 kei koya e davo e lomanivale me savata na nona isulu, o koya tale ga e kana e lomanivale me savata na nona isulu.
48 “Ia ke curu na bete qai raica ni sega ni tete e lomanivale na duka ni sa palasitataki tale na vale, ena qai tukuna na bete ni sa savasava na vale, ni sa yali na duka.
49 Me kauta yani e rua na manumanuvuka, na kau sitari, na isulu kulakula, kei na isopi,+ me vakasavasavataki kina na vale mai na dukadukali.*
50 Me vakamatea o koya e dua na manumanuvuka ena dela ni itawatawa qele e tu kina na waidranu.
51 Ena qai taura o koya na kau sitari, na isopi, na isulu kulakula, kei na manumanuvuka se bula tiko, me tonia ena dra ni manumanuvuka e vakamatei ena loma ni waidranu, qai kureitaka vakavitu ina vale.+
52 Ena qai vakasavasavataka na vale mai na dukadukali* ena dra ni manumanuvuka, na waidranu, na manumanuvuka se bula tiko, na kau sitari, na isopi, kei na isulu kulakula.
53 Ena qai laiva o koya me vuka yani na manumanuvuka se bula tiko ena taudaku ni koro, ina lomanivanua, me qai sorovaka na vale o koya, ena qai savasava.
54 “Qo na lawa me baleta e dua na vukavuka, na mate ni kuli ni qavokavoka se na kumi,+
55 na vukavuka ni isulu+ se vale,+
56 me baleta na vuvuce, na karokaro, kei na rama,+
57 me vakadeitaki kina na dukadukali ni dua na ka, kei na savasava+ ni dua na ka. Qo na lawa me baleta na vukavuka.”+
iVakamacala e ra
^ Tolu na ikatini na efa e tautauvata kei na 6.6 na lita (6 na ivakarau mamaca). Raica na iKuri B14.
^ Ipe., “na ivalavala ca.”
^ Ipe., “na ivalavala ca.”
