Vunau ni Soro 21:1-24
21 E kaya vei Mosese o Jiova: “Vosa vei ratou na bete eratou luvei Eroni qai kaya vei ratou, ‘Me kua ni dua me vakadukadukalitaki koya ena vuku ni tamata sa mate ena kedra maliwa na kainona.+
2 Ia e rawa ni cakava qo ena vuku ni wekana voleka vakadra, ena vuku i tinana, tamana, luvena tagane, luvena yalewa se tacina,
3 e rawa tale ga ni vakadukadukalitaki koya ena vuku i ganena, ke se goneyalewa qai voleka vua, e se bera tale ga ni vakawati.
4 Me kua ni vakadukadukalitaki koya me qai beci ena vuku ni yalewa e watina e dua vei ira na kainona.
5 Mera kua ni cakava me cou+ na uludra, se toroya laivi na tutu ni kumidra, se tavalaka na yagodra.+
6 Mera savasava vua na nodra Kalou,+ mera kua tale ga ni beca na yaca ni nodra Kalou,+ nira cabora tiko na isoro i Jiova e cabori ena bukawaqa, na kakana e cabori vua na nodra Kalou, mera savasava+ kina.
7 Mera kua ni vakawatitaka na saqamua,+ na yalewa sa vaqaseni, se yalewa sa veisere kei na watina,+ ni savasava na bete vua na nona Kalou.
8 Mo vakatabui koya,+ ni cabora tiko o koya na kakana vua na nodra Kalou. Me savasava vei iko o koya, ni o yau o Jiova, o koya e vakatabui kemuni tiko, au savasava.+
9 “‘Ke vakadukadukalitaki koya na luvena yalewa na bete ni saqamua voli, sa beci tamana o koya. Me vakamai ena bukawaqa.+
10 “‘O koya e bete levu vei ira na wekana, e livi e uluna na waiwai ni veilumuti+ qai buli* me dara na isulu vakabete,+ me kua ni sakuca na uluna, se dresulaka na nona isulu.+
11 Me kua ni torova e dua na tamata sa mate,+ me kua mada ga ni vakadukadukalitaki koya ena vuku i tamana se tinana.
12 Me kua ni biuta na tikina tabu, me kua tale ga ni beca na tikina tabu ni nona Kalou,+ ni tiko vua na ivakatakilakila ni yalayala, na waiwai ni veilumuti ni nona Kalou.+ O yau o Jiova.
13 “‘Me taura me watina e dua na yalewa e se sega ni taratagane.+
14 Me kua ni vakawatitaka na yada, se yalewa sa sere, se dua sa vaqaseni, se dua na saqamua, ia me taura me watina e dua na goneyalewa mai vei ira na kainona.
15 Me kua ni beci kina na nona kawa ena kedra maliwa na kainona,+ ni o yau o Jiova au vakatabui koya.’”
16 E vosa tale vei Mosese o Jiova, e kaya:
17 “Kaya vei Eroni, ‘Me kua ni toro mai e dua na nomu kawa mai na itabatamata kece, e vakaleqai tu na tikiniyagona, me cabora na kakana vua na nona Kalou.
18 Ke dua na tagane e vakaleqai tu na tikiniyagona me kua ni lako voleka mai: na tagane e mataboko se lokiloki se bulicaki ca na matana,* se balavu sivia e dua na ligana se yavana,
19 na tagane e ramusu na yavana se ramusu na ligana,
20 dua e dakupusi se leka,* se ca e dua na matana, se tutubu na yagona, se kara, se vakaleqai na nona soresore.+
21 Me kua ni dua na kawa i Eroni na bete e vakaleqai tu na tikiniyagona me toro mai me cabora vei Jiova na ka e cabori ena bukawaqa. Ni sa vakaleqai tu na tikiniyagona, me kua ni toro yani me cabora na kakana vua na nona Kalou.
22 E rawa ni kania na kakana e cabori vua na nona Kalou mai na ka e tabu sara+ kei na ka tabu.+
23 Ia me kua ni volekata yani na ilatilati,+ me kua tale ga ni toro yani ina icabocabo,+ ni vakaleqai tu e dua na tikiniyagona, me kua kina ni beca na noqu tikina tabu,+ ni o yau o Jiova au sa vakatabui ira.’”+
24 Sa qai vosa o Mosese vei Eroni, iratou na luvena tagane, kei ira kece na Isireli.
iVakamacala e ra
^ Ipe., “o koya e vakasinaiti na ligana.”
^ Ipe., “se kasei na ucuna.”
^ Se “se lila sivia qai malumalumu.”
