Vunau ni Soro 24:1-23
24 E vosa tale vei Mosese o Jiova, e kaya:
2 “Vakaroti ira na Isireli mera kauta mai vei iko na waiwai olive savasava e vutuki me waiwai ni cina, me waqa tiko ga kina na cina.+
3 Ena taudaku ni ilatilati ni iVakadinadina ena loma ni valelaca ni veitavaki, me raica o Eroni me waqa tu ga na cina mai na yakavi ina mataka ena mata i Jiova. Qo na lawa tudei ena nomuni itabatamata kece.
4 Me dau vakarautaka o koya na cina ena kena itutu+ e caka mai na koula dina ena mata i Jiova.
5 “O na kauta na falawa vinaka sara qai vavia kina e 12 na madrai e buli vaka na mama. Me biu ena ibuli yadua e rua na ikatini na efa.*
6 O na tuva e rua na ibinibini madrai ena dela ni teveli e caka mai na koula dina, me ono e dua na ibinibini,+ ena mata i Jiova.+
7 Mo biuta na drega dina e boivinaka ena ibinibini yadua, qori me madrai ni isoro ni ivakananumi*+ e cabori vei Jiova ena bukawaqa.
8 Me binia vinaka tu ga na madrai ena Siga ni Vakacecegu kece ena mata i Jiova.+ Qo na veiyalayalati tudei vei ira na Isireli.
9 Ena kedratou o Eroni kei ira na luvena tagane,+ era na kania ena dua na vanua tabu,+ ni qo e ka tabu sara vua mai na isoro i Jiova e dau cabori ena bukawaqa, me ivakaro tudei.”
10 A tiko ena kedra maliwa na Isireli e dua na tagane, e tinana na yalewa ni Isireli, e kai Ijipita na tamana,+ rau qai vala kei na dua na tagane ni Isireli ena keba.
11 E rulaka qai vosavakacacataka na yaca ni Kalou na luvei koya na marama ni Isireli.+ Era kauti koya sara vei Mosese.+ Na tinana o Silomeci, na luvei Tipiri yalewa ena yavusa o Tani.
12 Era vesuki koya tiko me yacova ni sa vakamatatataki vei ira na vakatulewa i Jiova.+
13 E qai kaya vei Mosese o Jiova:
14 “Kauti koya e vosa veibeci ena taudaku ni keba, o ira kece era rogoci koya mera tabaka na uluna e ligadra, mera qai vakaviriki koya ena vatu na isoqosoqo taucoko.+
15 Mo qai tukuna vei ira na Isireli, ‘Ke dua na tamata e vosabeca na nona Kalou, ena saumitaro o koya ena nona ivalavala ca.
16 Me vakamatei sara ga o koya e vosavakacacataka na yaca i Jiova.+ Mera vakaviriki koya sara ga na isoqosoqo taucoko. O koya e tiko vulagi me vakamatei me vakataki koya e itaukei ena vuku ni nona vosabeca na yaca ni Kalou.
17 “‘Me vakamatei sara ga o koya e vakamatea e dua na tamata.*+
18 O koya e mokuta mate na nona manumanu e dua tale, me vakaisosomitaka, me isau ni bula na bula.
19 Ke dua e vakamavoataka na wekana, me caka tale vua na ka e cakava.+
20 Me isau ni ramusu na ramusu, me isau ni mata na mata, me isau ni bati na bati, na ka ga e cakava me mavoa kina e dua, qori tale ga na ka me caka vua.+
21 O koya e mokuta mate e dua na manumanu me vakaisosomitaka,+ ia o koya e mokuta mate e dua na tamata, me vakamatei.+
22 “‘Me dua ga na lewa vei kemuni, se mani tiko vulagi se taukei,+ ni o yau o Jiova na nomuni Kalou.’”
23 E qai vosa vei ira na Isireli o Mosese, era qai kauti koya e vosa veibeci ena taudaku ni keba ra qai vakaviriki koya ena vatu.+ Era cakava gona na Isireli na ka e vakaroti Mosese kina o Jiova.
iVakamacala e ra
^ Se “dua na kena iwase me ivakananumi (mata).”
^ Se “e mokuta mate e dua na tamata.”
