Vunau ni Soro 25:1-55
25 E vosa tale vei Mosese o Jiova ena Ulu i Saineai, e kaya:
2 “Vosa vei ira na Isireli qai tukuna vei ira, ‘Ni oni yaco yani ena vanua au sa solia vei kemuni,+ ni kua ni teivaka na qele ni gauna ni vakacecegu vei Jiova.+
3 Ono na yabaki mo kaburaka na sorenikau ena nomu were, ono tale ga na yabaki mo kotiva kina na nomu loganivaini, o na qai kumuna na vuaniqele.+
4 Ia ena ikavitu ni yabaki me yabaki ni vakacecegu vei Jiova, me vakacegu kina na vanua. Mo kua ni kaburaka na sorenikau ena nomu were se kotiva na nomu loganivaini.
5 Mo kua ni tamusuka na covuata e tubu tale vakataki koya ni oti na tatamusuki, kua tale ga ni kumuna na vuata mai na vaini o sega ni kotiva. Me kua ni teivaki na vanua me dua na yabaki.
6 Ia oni rawa ni kania na ka e vuataka na vanua donuya na gauna e vakacegu kina, o iko, na nomu tagane bobula kei na yalewa bobula, o ira na nomu tamata cakacaka saumi, kei ira na kaitani era vakaitikotiko kei iko era rawa ni kania,
7 kei ira na manumanu manoa kei na manumanu kila era tu ena nomuni vanua. E rawa ni laukana na ka kece e vuataka na vanua.
8 “‘O na wilika me vitu taucoko na yabaki ni vakacecegu, me vakavitutaki na vitu na yabaki, ni soqoni vata na vitu na yabaki ni vakacecegu qori, ena 49 taucoko na yabaki.
9 Mo qai uvuca na davui* me rogolevu ena ikavitu ni vula, ena ikatini ni siga ni vula qo, ena Siga ni Veibuluti,+ moni uvuca na davui me rogo ena nomuni vanua taucoko.
10 Moni vakatabuya na ika50 ni yabaki qai kacivaka ena vanua na veisereki vei ira kece na lewenivanua.+ Qori me yabaki ni Jupili* vei kemuni, moni dui taura lesu na nomuni iyau, ni qai dui lesu vei ira na wekamuni.+
11 Ena yabaki ni Jupili vei kemuni na ika50 ni yabaki. Oni na sega ni kaburaka na sorenikau se tamusuka na covuata e tubu tale vakataki koya mai na ivovo ni covuata, se kumuna na vuanivaini mai na vaini e sega ni koti.+
12 Ni qo na Jupili. Me ka tabu vei kemuni. Moni kania ga na vuaniqele e tubu vakataki koya.+
13 “‘Ena yabaki ni Jupili qo, moni dui lesu ina veika oni taukena.+
14 Ke oni volitaka e dua na ka vua na wekamuni se oni volivoli mai vei ira, ni kua ni veivakalolomataki.+
15 Mo volivoli mai vua na wekamu, mo vakasamataka tiko na iwiliwili ni yabaki ni oti na Jupili, me volitaka tale vei iko o koya me vaka na iwiliwili ni yabaki se vo ni tatamusuki.+
16 Ke se vo e levu na yabaki, e rawa ni tosoya cake na kena isau, ke sa vica ga na yabaki e vo, me vakalutuka na kena isau, ni volitaka vei iko me vaka na levu ni itei me tamusuki.
17 Me kua ni dua vei kemuni e vakalolomataka na wekana,+ moni rerevaka na nomu Kalou,+ ni o yau o Jiova na nomuni Kalou.+
18 Ni oni muria na noqu lawa oni qai dei ena noqu lewa, oni na tikovinaka ena vanua.+
19 Ena vuataka na vanua na vuana,+ oni na kana moni mamau, oni na tikovinaka tale ga e kea.+
20 “‘Ia ke oni kaya: “Na cava me keimami kania ena ikavitu ni yabaki, ke keimami sega ni kaburaka na sorenikau se kumuna na neimami vuaniqele?”+
21 Au na vakarota na noqu veivakalougatataki vei kemuni ena ikaono ni yabaki, ena qai vuataka na vuana na vanua me rauta e tolu na yabaki.+
22 Oni na kaburaka na sorenikau ena ikawalu ni yabaki, oni na kana tale ga mai na itei makawa me yacova na ikaciwa ni yabaki. Oni na kana tiko mai na ka makawa, me yacova ni sa basika mai na kena itei.
23 “‘Me kua ni volitaki vakadua na tikiniqele,+ ni noqu na vanua.+ Vei au, oni kaitani oni tiko vulagi wale ga ena vanua.+
24 Ena vanua kece oni taukena, moni solia na veivakadonui me voli lesu na vanua.
25 “‘Ke sa dravudravua na tacimu mani volitaka eso na ka e taukena, me lako yani na dauveivoli lesu e wekana voleka qai volia lesu na ka sa volitaka o tacina.+
26 Ke dua e sega na nona dauveivoli lesu, ia e qai rawaka me volia lesu kina na ka e volitaka,
27 me cakacakataka na kena isau mai na vica vata na yabaki a volitaki tu kina, me qai solia na kena caca vua na tagane a volitaka kina. Oti sa rawa ni lesu o koya ina ka e taukena.+
28 “‘Ke sega ni rawata o koya na ka me taura lesu kina vua, na ka e volitaka ena tiko ga vei koya e volia me yacova sara na yabaki ni Jupili,+ ena qai suka vua ena Jupili, oti sa rawa ni lesu o koya ina ka e taukena.+
29 “‘Ke dua na tamata e volitaka e dua na vale e lomanikoro vakabai, se tu ga vua na dodonu me volia lesu me yacova ni sa oti e dua na yabaki mai na gauna e volitaka kina, na nona dodonu me volia lesu+ ena vakabau tiko me dua taucoko na yabaki.
30 Ia ke sa oti na dua taucoko na yabaki oya, qai sega ni voli lesu, sa na taukena vakadua na vale e tu ena koro vakabai na tamata e volia ena nona itabatamata kece. Me kua ni vakasukai ena Jupili.
31 Ia na vale era tu ena itikotiko era sega ni vakabai mera wili ga me vaka na tikiniqele ena lomanivanua. Me vakabau tiko ga na dodonu ni kena voli lesu na vale qori, me qai vakasukai ena Jupili.
32 “‘Ia na nodra vale na Livai ena nodra koro,+ ena tu ga vei ira na Livai na dodonu mera volia lesu.
33 Ke sega ni voli lesu na nodra iyau na Livai, na nodra vale e volitaki ena koro ena vakasukai ena Jupili,+ ni vale era tu ena nodra koro na Livai e nodra iyau ena kedra maliwa na Isireli.+
34 Ia me kua ni volitaki na vanua veico+ e wavolita na nodra koro, ni qori sa nodra ivotavota tudei.
35 “‘Ke sa dravudravua na tacimu drau tiko veivolekati qai sega ni qarava rawa na nona bula, mo vukei koya+ me vaka ga nomu vukei koya e tiko vulagi kei na kaitani,+ me rawa ni bula tiko kina kei iko.
36 Kua ni taura na tubu, kua tale ga ni rawailavo mai vua.+ Mo rerevaka na nomu Kalou,+ ena qai bula tiko ga kei iko na tacimu.
37 Kua ni lavaka na tubu ni o soli ilavo vua+ se soli kakana mo rawailavo kina.
38 O yau o Jiova na nomuni Kalou, au a kauti kemuni tani mai na vanua o Ijipita+ meu solia vei kemuni na vanua o Kenani, meu vakadinadinataka kina niu nomuni Kalou.+
39 “‘Ke sa dravudravua na tacimu drau tiko veivolekati, mani volitaki koya vei iko,+ mo kua ni vakasaurarataki koya me cakacaka vakabobula.+
40 Me raici me vaka na tamata cakacaka saumi,+ me vaka ga e dua e tiko vulagi. Me veiqaravi kei iko me yacova na yabaki ni Jupili.
41 Ena qai biuti iko o koya kei ira na luvena,* qai suka vei ira na wekana. Me taukena tale na nodra iyau na nona qase.+
42 Nira noqu bobula na luvei Isireli au kauti ira tani mai na vanua o Ijipita.+ Mera kua ni volitaki ira me vaka ni volitaki e dua na bobula.
43 Mo kua ni vakalolomataki koya,+ mo rerevaka tale ga na nomu Kalou.+
44 Na nomuni tagane se yalewa bobula mera lako mai na veimatanitu era wavoliti kemuni, oni rawa ni volia vei ira qori na tagane bobula se yalewa bobula.
45 Oni rawa tale ga ni volia mera nomuni bobula na kaitani era sa tu qori kei kemuni,+ se na luvedra era qai sucu nira sa vakaitikotiko kei kemuni ena nomuni vanua, oni sa na taukeni ira.
46 Moni soli ira mera taukeni vei ira na luvemuni era na taravi kemuni, me ivotavota tudei. Oni rawa ni vakayagataki ira mera tamata cakacaka, ia moni kua ni vakalolomataki ira na tacimuni na Isireli.+
47 “‘Ia ke vutuniyau e dua e tiko vulagi se kaitani e tiko ena kemuni maliwa, mani dravudravua na tacimuni qai volitaki koya vua e tiko vulagi se kaitani era tiko ena kemuni maliwa, se volitaki koya vua e dua na lewe ni nona vuvale e tiko vulagi oya,
48 ni sa volitaki oti, ena tiko ga vua na dodonu me voli lesu. E dua ga vei ira na tacina me voli koya lesu,+
49 se rawa tale ga ni voli koya lesu o tamana levu se tamana lailai, se na luvei tamana levu se tamana lailai, se dua tale na wekana voleka* erau vuvale vata.
“‘Se ke sa vutuniyau o koya, me voli koya lesu+ ga vakataki koya.
50 Na kena isau me rau cakacakataka vata kei koya e voli koya, mai na yabaki e volitaki kina yacova sara na yabaki ni Jupili,+ na ilavo me kena ivoli me tautauvata kei na levu ni yabaki+ sa cakacakataki mai oya. Ena gauna kece oya, me veiqaravi tiko me vaka e dua na tamata cakacaka saumi.+
51 Ke se vo levu na yabaki, me sauma lesu na ilavo e voli kina, ni cakacakataka mai na levu ni yabaki se vo.
52 Ia ke sa vo ga e vica na yabaki me yacova na yabaki ni Jupili, me cakacakataka ga o koya. Me sauma o koya na kena isau e voli lesu kina, me vakatau ena vica na yabaki se vo.
53 Me qaravi koya na kena itaukei e veiyabaki me vaka e dua na tamata cakacaka saumi, mo qai raica me kua sara ni vakalolomataki+ koya na kena itaukei.
54 Ia ke sega ni rawa ni voli koya lesu va qori, ena qai galala o koya ena yabaki ni Jupili,+ o koya kei ira na luvena.*
55 “‘Nira noqu bobula na Isireli. Era noqu bobula au a kauti ira tani mai na vanua o Ijipita.+ O yau o Jiova na nomuni Kalou.
iVakamacala e ra
^ Ipe., “na ileu ni tamanisipi.”
^ Raica na iVakamacala ni Vosa.
^ Ipe., “luvena tagane.”
^ Se “wekana vakadra.”
^ Ipe., “na luvena tagane.”
