Kerea Nodra Veivuke Eso Tale

“E dua e rawa ni vakamalumalumutaka e lewe dua, ia ni rau le rua erau na vorati koya.”—Dauvunau 4:12.

NIRA tokoni keda eso tale, ena rawarawa sara noda valuta e dua na meca. Ke o via qaqa gona ena nomu sasaga mo biuta na vakatavako, ena vinaka mo kerea nodra veivuke na lewenivuvale kei na itokani, se dua o kila ni na tokoni iko dina, ena vosovoso tale ga.

Vacava mo tarogi ira mada era sa biuta rawa na vakatavako. Era na kila vinaka na kemu ituvaki, qai yaga vakalevu nodra ivakasala. E kaya e dua na tacida mai Denmark o Torben “E yaga vakalevu vei au nodra veivuke eso tale.” E vola o Abraham mai Idia: “Na loloma era vakaraitaka na noqu lewenivuvale kei ira na tacida, e vukei au meu muduka na vakatavako.” Ia eso na gauna e sega ni veirauti qori.

E kaya e dua na turaga o Bhagwandas, “E 27 na yabaki noqu kana tavako tu, ia noqu vulica na ka e tukuna na iVolatabu me baleta na itovo dukadukali, au vakatulewataka kina meu muduka na vakatavako. Au saga meu vakalailaitaka noqu kana tavako. Au veisautaka noqu ilala. Au lai taro ivakasala. Vaka e sega ni yaga noqu sasaga. Dua na bogi au sa qai talaucaka na lomaqu vei Jiova ena masu, au kerei koya sara ga me vukei au meu muduka na vakatavako. Au sa qai biuta rawa!”

E bibi tale ga mo vakavakarau ena ituvaki o na rairai sotava. Na cava ya? Ena vakamacalataki qori ena ulutaga tarava.

[Kato ena tabana e 5]

VACAVA MO VAKAYAGATAKA NA WAINIMATE?

E tiko na wainimate e rawa ni muduki kina na vakatavako, me vaka na nicotine patch. Dua na ilavo levu e rawati ena kena volitaki na wainimate qori. Ni bera ni o vakatulewataka mo vakayagataka, mo dikeva mada e vica na taro qo:

Cava na kena yaga? Levu era tovolea qori era kaya ni vakarawarawataka nodra biuta na vakatavako. Ena sala cava? E vakalailaitaka na revurevu ni nodra biuta na tavako. Ia eso era lomatarotarotaka ke na mani dede na kena yaga se sega.

Leqa cava e rawa ni vakavuna? Eso na wainimate e tiko na kena revurevu, me vaka na lualua, lomabibi, eso tale ga era via vakamatei ira ga. Eso na kena veiqaravi vakavuniwai me vaka na nicotine-replacement therapies, e vakayagataki kina e dua tale na waigaga e leqataki kina na bula. Kena ibalebale, o ira na vakayagataka qori era se bobula tiko ga ena waigaga.

E tiko e dua tale na ka e rawa ni caka? E caka e dua na vakadidike me baleti ira na biuta na vakatavako, e laurai ni 88 na pasede era biuta ga vakasauri na vakatavako era sega ni vakayagataka na wainimate.