E VEIVAKURABUITAKI dina na ka e vakayacora na batikaciwa ena nona biubiu me gole ina dua tale na vanua. Ena vuka tiko na manumanuvuka qo me sivia e walu na siga, ena kovuta e rauta ni 11,000 na kilomita.

Vakasamataka mada qo: Era vakabauta na dauvakadidike ni tiko eso na mataqali manumanuvuka era dau vakayagataka na idre kei vuravura me nodra idusidusi, e vaka ga e tiko ena nodra mona e dua na kabasi. Kena irairai, nira dau vakayagataka tale ga na batikaciwa me nodra idusidusi na matanisiga ena siga kei na kalokalo ena bogi. Era rawa tale ga ni kidava ni sa voleka e dua na cagi kaukaua, ra qai vakayagataka qori me totolo kina na nodra vuka. Ia era se kurabuitaka tiko ga na kenadau na ka era cakava na manumanuvuka qori me vakasakiti kina na nodra ilakolako ina dua tale na vanua. E kaya na dauvakadidike o Bob Gill: “Sa 20 na yabaki na noqu vakadikeva tiko na manumanuvuka qo, ia au se qoroya tiko ga na ka au dikeva kina.”

Na cava o nanuma? E bula vakaidewadewa na nodra idusidusi na batikaciwa se buli?